Waswe, Faithful Fasin Hem Gud Samting?
“BRO disfala company iu waka for hem nating peim iu big nomoa ia. Sapos iu lusim olketa, bae iu savve kasem moa selen.” Diswan nao samting wea Jack talem long fren bilong hem Peter.
“Maet samting iu talem hem tru,” Peter hem sei. “Bat, mi waka longtaem for olketa finis and evritaem olketa savve helpem mi sapos mi kasem trabol, so mi laek for gohed faithful for waka for olketa.”
“For faithful hem gud,” Jack hem sei. “Bat plande taem sapos iu faithful bae iu no kasem big selen!”
Jack hem tok tru. Plande taem wei for faithful savve mekem man lusim chance for kasem staka selen. And tu, samfala taem wei for faithful minim man mas givim taem, strong, and feeling bilong hem for narawan. So waswe, hem gud for faithful?
Plande Tinghae Long Faithful Fasin Bat Plande No Showimaot Datwan
Taem Allensbach Opinion Research Institute mekem wanfala survey long Germany, olketa lukim hao 96 percent long pipol wea olketa story witim sei faithful fasin hem gud samting. Mek-tu survey bilong Allensbach wea olketa duim midolwan olketa wea 18 go kasem 24 year, hem showimaot hao big haf long olketa sei hem gud for man faithful.
Nomata plande pipol tinghae long faithful fasin, wei for showimaot hem difren from wei for tinghae long hem. Olsem example, long plande kantri long Europe, plande taem olketa wea marit or olketa famili member nating showimaot faithful fasin long each other. Plande taem olketa fren no savve faithful long each other. And tu, wei for faithful midolwan boss and wakman, company and kastoma, hem barava nomoa nao distaem. Why nao olsem?
Samfala taem from laef hem busy tumas hem mekem pipol no garem taem or strong for showimaot faithful fasin long pipol. And tu, from samwan spoelem trust bilong narawan, maet datwan wea feel nogud hol bak for faithful long eniwan nao. Samfala narawan olketa les for tingim hao olketa mas faithful long narawan.
Nomata wanem reason nao mekem pipol no faithful, disfala fasin hem samting wea plande tinghae long hem bat plande no showimaot. From datwan, tingim olketa kwestin hia: Waswe, faithful fasin hem gud samting? Sapos olsem, hu nao iumi shud faithful long hem, and hao nao for duim datwan? Wanem gud samting nao iu kasem from wei for faithful?
[Blurb long page 3]
Plande tinghae long faithful fasin bat plande no showimaot datwan