Gud Samting Kamaot From Wei for Showimaot Gudfala Fasin
LONG wanfala smol island long south Japan, wanfala mami and thrifala pikinini bilong hem start for studyim Bible witim Olketa Jehovah’s Witness. Long datfala area pipol strong tumas for followim kastom, and taem olketa lukim diswan olketa no laek story long datfala mami. Mami hia hem sei: “Samting wea mekem mi feel nogud winim wei wea pipol no laek story long mi, hem wei wea olketa no kaen long olketa pikinini and hasband bilong mi.” Nomata olsem, hem sei long olketa pikinini bilong hem: “Iumi mas gohed for hello long pipol from iumi duim diswan for Jehovah.”—Matthew 5:47, 48.
Hem teachim olketa pikinini bilong hem long haos for showimaot gudfala fasin nomata pipol no kaen long olketa. Taem olketa gogo long car, olketa pikinini savve practice for talem hello bifor olketa kasem olketa hot spring wata wea olketa savve go long there samfala taem. Taem olketa go insaed datfala building, olketa pikinini hapi and evritaem sei long pipol, “Konnichiwa!,” wea minim “hello!” Datfala famili gohed patient for hello long evriwan wea olketa meetim nomata pipol no kaen long olketa. Nomata olsem, pipol luksavve long gudfala fasin wea olketa pikinini hia showimaot.
From evritaem olketa hello long pipol, gogo samfala difren wan start for talem bak “Konnichiwa” long olketa. Bihaen tufala year, klosap evriwan long taon savve hello long datfala famili nao. Olketa start for hello and moa kaen long each other tu. Bigman bilong taon laek for mekhae long olketa pikinini hia for part wea olketa duim for mekem disfala change kamap. Bat mami bilong olketa talem datfala bigman hao olketa pikinini hia duim nomoa samting wea olketa Christian shud duim. Bihaen datwan, wanfala son bilong datfala woman storyim long wanfala competition for duim speech for full Island, hao mami bilong hem trainim famili for hello long kaenfala wei, nomata pipol no kaen long olketa. Hem winim first prize for datfala speech and olketa printim datfala speech insaed niuspepa bilong datfala taon. Famili barava hapi hao wei for followim olketa Christian principle barava lead go long gudfala samting. Hem moa isi for talemaot gud nius taem pipol showimaot kaenfala fasin.