Waswe, Iu Remember?

Waswe, iu enjoyim olketa Wastaoa wea iu readim insaed olketa month wea go pas finis? Sapos olsem, trae for ansarem olketa kwestin long daon:

• Why nao firstfala sin, wea hem nao wei wea Adam no obey, hem olsem wanfala sik wea man born witim?

Hem olsem wanfala sik bikos Adam pasim sin go long olketa pikinini bilong hem. So iumi kasem wei for no perfect olsem samfala pikinini kasem wanfala sik from parents bilong olketa.—8/15, page 5.

• Wanem nao olketa main samting wea kosim raf fasin for kamap big tumas distaem?

Satan trae for mekem pipol lusim Jehovah long wei for putim raf fasin insaed heart bilong olketa thru long movie, music, and olketa computer game wea encouragem man for duim barava raf and nogud samting. Raf fasin long television, movie, and video nao kosim man for duim plande raf samting.—9/1, page 29.

• Hu nao Pontius Pilate?

Hem man from Rome wea garem position long community and luk olsem maet hem joinim army. Emperor bilong Rome, Tiberius, markem Pilate olsem governor bilong province bilong Judaea long 26 C.E. Taem olketa kotem Jesus, Pilate nao lisin long olketa samting wea olketa leader bilong Jew accusim Jesus long hem. For mekem sekson wea hipap hapi, hem letem olketa killim dae Jesus.—9/15, page 10-12.

• Wanem nao “saen” wea Matthew 24:3 story abaotem?

Disfala saen garem plande part wea join tugeta. Samfala samting long datfala saen nao hem war, kaikai bae short, nogud sik, and olketa earthquake, and diswan bae helpem olketa follower bilong Jesus for luksavve hem “stap moa,” and tu, for luksavve long “end bilong disfala world.”—10/1, page 4-5.

• Wea nao olketa ples wea olketa Jew stap?

Long taem bilong olketa aposol, olketa main ples wea olketa Jew stap hem long Syria, Asia Minor, Babylon, and Egypt, and samfala smol community long Europe wea Rome rulim.—10/15, page  12.

• Waswe, wanfala Christian savve keepim gudfala conscience sapos hem duim waka wea hem mas karem gun?

For duim waka wea man mas karem gun or nara weapon, hem disison bilong man wanwan. Bat kaen waka olsem maet mekem man killim dae narawan sapos hem mas iusim gun bilong hem, and tu, hem stap long danger for garekil or dae from narawan attakim hem or pei bak. Wanfala Christian wea karem gun or weapon bae no fit for kasem olketa spesol privilege insaed kongregeson. (1 Timothy 3:3, 10)—11/1, page 31.

• From datfala word “Armageddon” hem kam from toktok “Maunten bilong Megiddo,” waswe, disfala faet bilong Armageddon bae kamap long wanfala maunten long Middle East?

Nomoa. No eni Maunten bilong Megiddo stap, only wanfala smol hill nomoa stap long datfala valley long Israel. Datfala area hem no big fitim evri “king bilong earth and olketa army bilong olketa.” Bigfala war bilong God bae kamap evriwea long earth, and bae finisim evri war. (Revelation 16:14, 16; 19:19; Psalm 46:8, 9)—12/1, page 4-7.