Jehovah Hem Sevem Man wea Kasem Hard Taem

“Staka trabol kasem man wea raeteous, bat Jehovah sevem hem from evri trabol hia.”—PSALM 34:19.

1, 2. Wanem problem nao wanfala faithful Christian feisim, and why nao iumi savve garem olketa feeling olsem tu?

WANFALA young woman wea nem bilong hem Keiko,a hem wanfala Jehovah’s Witness for winim 20 year finis. For lelebet taem, hem serve olsem regular pioneer, wea minim hem talemaot Kingdom full taem. Hem barava lovem tumas datfala privilege. Bat no longtaem go nomoa, Keiko start for barava feel olsem hem no garem eni hope and hem stap seleva. Hem sei: “Mi gohed for krae olowe.” Hem trae for deal witim olketa feeling hia thru long wei for duim moa study. Hem sei: “Nomata mi duim datwan, mi no savve stopem olketa feeling olsem, gogo, mi barava garem sorre feeling wea no savve finis and mi just laek for dae nomoa.”

² Waswe, enitaem iu stragol witim olketa nogud feeling olsem? From iu wanfala Jehovah’s Witness, iu garem staka reason for hapi bikos long fasin for lovem God wea “garem promis for laef distaem, and tu, laef wea bae kam.” (1 Timothy 4:8) Distaem, iu stap long wanfala spiritual paradaes! Bat waswe, datwan minim iu kasem protection from evri nogud samting? Barava nomoa nao! Bible hem sei: “Staka trabol kasem man wea raeteous.” (Psalm 34:19) Iumi no sapraes long diswan, bikos “full world hem stap anda long paoa bilong wicked wan,” Satan. (1 John 5:19) Long samfala wei, iumi evriwan experiencem samting wea kamaot from wei wea Devil kontrolem world.—Ephesians 6:12.

Nogud Samting wea Kamaot From Hard Taem

3. Storyim olketa example from Bible abaotem olketa servant bilong God wea experiencem bigfala hevi.

³ Wei for deal witim wanfala hevi for longfala taem savve mekem iumi barava lus hope. (Proverbs 15:15) Tingim datfala raeteous man Job. Long taem wea hem barava kasem hard taem, Job hem sei: “Man, wea born from woman, garem shortfala laef and kasem staka trabol.” (Job 14:1) Hapi bilong Job hem barava finis nao. For lelebet taem hem tingse Jehovah lusim hem tu. (Job 29:1-5) Job hem no only servant bilong God wea experiencem barava bigfala hevi. Bible talem iumi hao ‘soul bilong Hannah hem barava feel nogud,’ bikos hem no garem eni pikinini. (1 Samuel 1:9-11) From hem barava feel nogud long samting wea happen insaed famili bilong hem, Rebekah hem sei: “Mi barava heitim disfala laef bilong mi.” (Genesis 27:46) Taem hem ting go bak long olketa mistek wea hem duim, David hem sei: “Long full day mi wakabaot sorre nomoa.” (Psalm 38:6) Tu-thri example hia showimaot klia hao olketa man and woman wea fraet long God bifor long taem bilong Jesus go thru long olketa barava hard taem.

4. Why nao iumi no sapraes for savve hao olketa “soul wea feel sorre” stap long kongregeson distaem tu?

⁴ Waswe long olketa Christian? Aposol Paul lukim need for talem olketa long Thessalonica for “tok kaen long olketa soul wea feel sorre.” (1 Thessalonians 5:14) Wanfala buk talem hao Greek word wea olketa transleitim “olketa soul wea feel sorre,” savve minim olketa wea “for lelebet taem, kasem hevi wea barava hard tumas for deal witim.” Toktok bilong Paul showimaot hao samfala long datfala kongregeson long Thessalonica wea spirit anointim, olketa wikdaon. Plande Christian savve garem sorre feeling distaem tu. Bat why nao olketa kasem feeling olsem? Bae iumi storyim thrifala main samting wea kosim diswan.

Wei wea Iumi No Perfect Savve Mekem Iumi Feel Sorre

5, 6. Wanem comfort nao iumi savve kasem from Romans 7:22-25?

⁵ Olketa wea wicked “no garem eni stretfala tingting saed long fasin,” bat olketa tru Christian barava feel sorre long wei wea olketa sinner. (Ephesians 4:19) Maet olketa feel olsem Paul, wea sei: “Mi barava hapi tumas long law bilong God, bat mi lukim tu hao nara law stap insaed long mi wea faet againstim law bilong mind bilong mi and wea leadim mi for kamap prisoner long law bilong sin wea insaed long mi.” Then Paul hem sei: “Mi wanfala iusles man nomoa!”—Romans 7:22-24.

⁶ Waswe, enitaem iu garem sem feeling olsem Paul? Hem no rong for iu barava feelim tumas wei wea iu sinner, bikos diswan savve strongim long iu hao sin hem serious samting and hem savve mekem iu barava disaed strong for stap klia long olketa nogud samting. Bat diswan no minim iu need for evritaem barava feel sorre abaotem olketa wik point bilong iu. Bihaen datfala toktok bilong hem abaotem sorre wea hem feelim, Paul hem sei: “Thankiu long God thru long Lord bilong iumi Jesus Christ!” (Romans 7:25) Tru nao, Paul barava feel sure blood bilong Jesus savve sevem hem from sin wea hem kasem from Adam.—Romans 5:18.

7. Wanem nao savve helpem man for no feel sorre tumas bikos long wei wea hem sinner?

⁷ Sapos iu faendem hem barava hard for deal witim wei wea iu wanfala sinner, iu savve kasem comfort from toktok bilong aposol John, wea raet: “Sapos eniwan sin, iumi garem wanfala man for helpem iumi wea stap witim Dadi bilong iumi, Jesus Christ, wea hem man wea raeteous. And hem wanfala sakrifaes wea kavarem sin bilong iumi, no for iumi nomoa bat for full world tu.” (1 John 2:1, 2) Sapos iu feel nogud bikos long wei wea iu wanfala sinner, evritaem rememberim hao Jesus hem dae for olketa sinner, no for perfect pipol. Tru nao, “evriwan sin and no kasem glory bilong God.”—Romans 3:23.

8, 9. Why nao iumi shud rejectim wei for judgem iumiseleva?

⁸ Bat tingim sapos iu duim bigfala sin bifor. For sure iu storyim diswan finis long Jehovah thru long prea, and maet iu duim datwan plande taem. Iu kasem spiritual help from olketa Christian elder. (James 5:14, 15) Iu barava repent, wea datwan mekem iu fit for gohed kaban witim kongregeson. Or maet iu lusim organization bilong God for lelebet taem, bat bihaen, iu repent and kasem bak wei for stap klin front long Jehovah. Nomata wanem nao samting wea happen, maet iu tingim yet sin wea iu duim, and datwan mekem iu feel sorre tumas. Sapos olsem, no forgetim hao Jehovah hem forgivim “long bigfala wei” olketa wea really repent. (Isaiah 55:7) And tu, hem no laekem iu for feel olsem hem judgem iu and iu no garem eni hope nao. Satan nao wan wea laekem iu for garem tingting olsem, no Jehovah. (2 Corinthians 2:7, 10, 11) Jehovah bae distroem Satan bikos hem nao samting wea fitim for hem kasem, bat Satan laekem iu for tingse iu fit for kasem sem judgment tu. (Revelation 20:10) No letem Satan win long goal bilong hem for distroem faith bilong iu. (Ephesians 6:11) “Stand strong againstim hem” long diswan, olsem iu duim long olketa nara samting tu.—1 Peter 5:9.

⁹ Long Revelation 12:10, Bible kolem Satan “datwan wea accusim olketa brata bilong iumi,” wea hem nao olketa anointed Christian. Hem “accusim olketa day and naet” front long God. Wei for ting raonem datfala verse savve helpem iu for minim hao Satan, datfala man for accusim man rong, bae hapi sapos iu accusim and judgem iuseleva, nomata Jehovah no accusim and judgem iu. (1 John 3:19-22) Hem nogud for barava feel sorre abaotem olketa wik point bilong iu, gogo iu laek for givap nao. No letem Satan spoelem wei wea iu fren witim God. No letem Satan stopem iu for tingim hao Jehovah ‘garem mercy and kaenfala fasin, slow for kros and fulap witim loving-kaeness and truth.’—Exodus 34:6.

Olketa Samting Iumi No Fit for Duim Savve Mekem Iumi Wikdaon

10. Long olketa wanem wei nao maet olketa samting wea iumi no fit for duim hem mekem iumi feel wikdaon?

¹⁰ Samfala Christian wikdaon bikos long samting wea stopem olketa for duim moa samting for servem God. Waswe, iu olsem tu? Maet wanfala big sik, wei for olo, or olketa nara samting stopem iu for share long ministry long sem wei wea iu duim bifor. Hem tru, olketa Christian kasem encouragement for mekius long evri chance for servem God. (Ephesians 5:15, 16) Bat waswe sapos olketa problem wea iu no savve kontrolem hem stopem iu for duim moa samting long ministry, and diswan mekem iu feel wikdaon?

11. Hao nao kaonsel bilong Paul long Galatians 6:4 savve helpem iumi?

¹¹ Bible barava encouragem iumi for no lesy bat for “followim example bilong olketa wea thru long faith and patient fasin kasem olketa promis.” (Hebrews 6:12) Iumi savve duim diswan only sapos iumi lukluk gud long gudfala example bilong olketa and trae for garem sem faith. Bat hem bae no helpem iumi for markem samting wea iumi savve duim witim samting olketa narawan duim and tingse samting wea iumi duim hem no inaf and no fitim. Dastawe, hem gud for followim kaonsel bilong Paul. Hem sei: “Hem gud for evri man mas lukluk gud long waka bilong hemseleva, and then hem bae garem reason for hapi long samting wea hemseleva duim, and no long wei for markem hemseleva witim narafala man.”—Galatians 6:4.

12. Why nao iumi savve hapi long service wea iumi givim long Jehovah?

¹² Olketa Christian garem gudfala reason for hapi, nomata olketa mas deal witim bigfala problem saed long health wea stopem olketa for duim staka samting. Bible hem promis olsem: “God hem no wicked mekem hem forgetim waka bilong iufala and love wea iufala showimaot for nem bilong hem.” (Hebrews 6:10) Maet samting wea iu no savve kontrolem mekem hem hard for iu duim sem waka for servem Jehovah wea iu duim bifor. Bat witim help from Jehovah, maet iu savve share long olketa nara wei for duim ministry wea iu fit for duim, olsem telephone or enitaem witnessing, or wei for raetem leta. Iu savve sure Jehovah bae blessim iu for service wea iu givim witim full strong bilong iu and love wea iu showimaot for hem and olketa narawan.—Matthew 22:36-40.

Olketa “Nogud Taem” Savve Mekem Iumi Wikdaon

13, 14. (a) Long olketa wanem wei nao olketa “nogud taem” hia savve mekem iumi wikdaon? (b) Hao nao wei wea olketa insaed famili no garem love for each other hem showaot distaem?

¹³ Nomata iumi luk forward for garem laef insaed raeteous niu world bilong God, distaem iumi stap long olketa “nogud taem wea hard for deal witim.” (2 Timothy 3:1) Hem comfortim iumi for savve hao olketa nogud samting wea happen showimaot hao salvation bilong iumi hem klosap nao. Nomata olsem, olketa nogud samting wea gohed raonem iumi hem affectim iumi. Olsem example, waswe sapos iu no savve faendem waka for selen? No staka waka hem stap, and maet bihaen plande month iu start for daotem sapos Jehovah hem savve long problem bilong iu or herem prea bilong iu. Or maet samwan hem duim samting long iu wea no followim justice. Nomata wei for readim niuspepa or herem nius long radio tu savve mekem iu feel olsem datfala raeteous man Lot, wea “feel nogud tumas” (“wikdaon,” Young’s Literal Translation of the Holy Bible) bikos long olobaot fasin bilong olketa wea stap raonem hem.—2 Peter 2:7.

¹⁴ Iumi mas tingim tu narafala samting abaotem olketa last day. Bible talem hao plande bae “no garem love wea olketa long famili shud garem for each other.” (2 Timothy 3:3) Kaen love olsem hem barava nomoa nao long plande famili. Tru nao, olsem datfala buk, Family Violence storyim, “olketa report showimaot hao luk olsem staka taem nao hem olketa famili member wea killim or spoelem nara famili member long physical wei or saed long feeling, no man wea no famili member. Man shud kasem love and feel sef taem hem stap witim famili, bat for samfala pikinini and narawan, hem danger tumas for stap witim olketa famili member.” Olketa wea famili bilong olketa hem olsem taem olketa pikinini, savve experiencem olketa sorre feeling and wari taem olketa big. Waswe sapos iu tu garem olketa feeling olsem?

15. Hao nao love bilong Jehovah hem winim love bilong eni man?

¹⁵ Datfala man wea raetem psalm, David, hem sei: “Sapos dadi bilong mi and mami bilong mi lusim mi, Jehovah nao bae lukaftarem mi.” (Psalm 27:10) Hem comfortim iumi for savve hao love bilong Jehovah hem winim love bilong eni mami or dadi! Nomata iu savve barava feel sorre from wei wea parents no showimaot love long iu, lusim iu, or deal long raf wei witim iu, diswan no affectim wei wea Jehovah hem kea for iu. (Romans 8:38, 39) No forgetim hao God pullim kam long hem olketa wea hem lovem. (John 3:16; 6:44) Nomata long hao olketa narawan deal witim iu, Dadi bilong iu long heven hem lovem iu!

Olketa Samting Iumi Savve Duim for Feel Moabeta

16, 17. Taem man hem wikdaon, wanem nao hem savve duim for keepim hemseleva strong long spiritual wei?

¹⁶ Iu savve duim olketa samting for deal witim wei for wikdaon. Olsem example, samting wea bae encouragem iu nao hem for share evribit long olketa Christian waka. Ting raonem Word bilong God, especially taem iu barava feel wikdaon. Man wea raetem psalm hem sing olsem: “Taem mi sei: ‘Leg bilong mi bae no stedy taem hem muv,’ loving-kaeness bilong iu, O Jehovah, hem gohed for strongim mi. Taem plande tingting for wari kamap insaed long mi, olketa toktok bilong iu for givim comfort nao lukaftarem soul bilong mi.” (Psalm 94:18, 19) Wei for readim Bible evritaem bae help for fulimap mind bilong iu witim olketa toktok and encouragement wea savve strongim and comfortim iu.

¹⁷ Prea tu hem barava important. Nomata sapos iu faendem hem hard for explainim long Jehovah samting wea iu feelim, Jehovah hem savve long wanem iu trae for talem. (Romans 8:26, 27) Man wea raetem psalm talem disfala promis: “Torowem hevi bilong iu long Jehovah, and hem nao bae sapotim iu. Hem bae no letem raeteous wan for seksek.”—Psalm 55:22.

18. Olketa wanem samting nao man wea garem bigfala sorre feeling savve duim for deal witim datwan?

¹⁸ Samfala barava wikdaon bikos long sorre feeling wea big tumas and wea no savve finis.b Sapos iu nao garem feeling olsem, trae for tingim niu world bilong God and taem wea “no eniwan bae sei: ‘Mi sik.’” (Isaiah 33:24) Sapos sorre feeling bilong iu hem big tumas and no savve finis, maet hem wise for iu go lukim doctor for diswan. (Matthew 9:12) Hem important tu for lukaftarem health bilong iu. Maet gudfala kaikai and wei for duim lelebet exercise savve help. Mek sure iu kasem inaf rest. Sleep early. No duim kaen hapitaem wea savve mekem iu taed long physical wei and saed long feeling. Main samting nao, gohed for duim olketa waka and narafala samting wea mekem God hapi! Nomata iumi no kasem taem yet for Jehovah “aotem krae from eye” bilong iumi, hem bae helpem iumi for no givap.—Revelation 21:4; 1 Corinthians 10:13.

Wei for Stap “Anda Long Maeti Hand Bilong God”

19. Wanem nao Jehovah hem promisim long olketa wea safa?

¹⁹ Bible promisim hao nomata olketa trabol bilong raeteous wan hem staka, “Jehovah sevem hem from evri trabol hia.” (Psalm 34:19) Hao nao God duim diswan? Taem aposol Paul hem evritaem prea for Jehovah sevem hem from datfala “nila long body” wea hem garem, Jehovah talem hem: “Paoa bilong mi kamap perfect long man wea wik.” (2 Corinthians 12:7-9) Wanem nao Jehovah promisim long Paul, and wanem nao hem promisim long iu? Hem no promis for aotem sik distaem, bat hem promis for givim iumi strong wea iumi needim for deal witim datwan and no givap.

20. Nomata iumi go thru long olketa hard taem, 1 Peter 5:6, 7 talem wanem promis?

²⁰ Aposol Peter hem raet olsem: “Kamap hambol anda long maeti hand bilong God, mekem gogo hem savve apim iufala long taem wea hem markem; taem iufala torowem evri wari bilong iufala long hem, bikos hem kea for iufala.” (1 Peter 5:6, 7) From Jehovah hem kea for iu, bae hem no lusim iu. Hem bae sapotim iu nomata long olketa hardfala samting wea iu deal witim. No forgetim hao olketa faithful Christian stap “anda long maeti hand bilong God.” Taem iumi servem Jehovah, hem givim iumi strong wea iumi needim for no givap. Sapos iumi faithful long hem, no eni samting savve spoelem spiritual saed bilong iumi for olowe. So iumi mas gohed faithful long Jehovah mekem iumi savve enjoyim laef olowe long niu world wea hem promisim and lukim datfala day wea hem barava sevem for olowe olketa wea go thru long olketa hard taem!

[Footnotes]

Waswe, Iu Remember?

• Why nao olketa hard taem savve affectim tu olketa servant bilong Jehovah?

• Wanem nao samfala samting wea savve kosim samfala wea servem Jehovah for feel wikdaon?

• Hao nao Jehovah helpem iumi for deal witim olketa wari bilong iumi?

• Long wanem wei nao, iumi “anda long maeti hand bilong God”?

[Piksa long page 18]

Nomata olketa kasem hard taem, pipol bilong Jehovah garem reason for hapi

[Piksa long page 21]

Wei for witness thru long telephone hem wanfala wei for givim best bilong iumi long Jehovah