Kwestin From Reader
Waswe, hem olraet for wanfala Jehovah’s Witness for attendim marit bilong wanfala relative or fren wea hem no wanfala Witness?
Marit hem taem bilong hapi, and hem normal nomoa for wanfala Christian for laek share long datwan. Hem tru, olketa young wan wea kasem invitation for attendim wanfala marit shud obeyim olketa wea garem raet for mekem disison saed long datwan, wea hem nao parents or man wea lukaftarem olketa. (Ephesians 6:1-3) Bat waswe sapos man wea no wanfala Jehovah’s Witness hem askem Christian waef bilong hem for go witim hem long wanfala marit insaed long church? Maet conscience bilong hem letem hem for go olsem man wea go for lukluk nomoa and wea disaed for no tekpart long eni ceremony bilong religion.
So for go long wanfala marit or nomoa hem samting wea man seleva nao disaedem. Nomata olsem, each Christian shud luksavve hao hem mas givim ansa long Jehovah and hem need for tingim samfala Bible principle taem hem disaed for attendim marit bilong wanfala relative or fren wea hem no wanfala Witness.
Samting wea shud barava important long wanfala Christian nao hem for God hapi long hem. Jesus sei olsem: “God hem wanfala Spirit, and olketa wea worshipim hem mas worship witim spirit and truth.” (John 4:24) So Olketa Jehovah’s Witness no tekpart long olketa samting wea join witim nara religion, olsem prea and olketa ceremony wea againstim truth wea stap insaed long Bible.—2 Corinthians 6:14-17.
Wanfala Christian hem luksavve hao disison wea hem mekem savve affectim tu olketa narawan. Sapos iu disaed for go, waswe, olketa relative bilong iu bae feel nogud sapos iu no tekpart long olketa marit celebration? Iu need for tingim tu olketa Christian brata and sista bilong iu. (Romans 14:13) Nomata sapos iu or olketa narawan long famili bilong iu tingse wei for attendim marit bilong wanfala relative or fren wea no wanfala Witness hem no savve affectim iu, waswe, bae hem affectim olketa spiritual brata and sista bilong iu? Waswe, bae hem spoelem conscience bilong samfala?
Marit ceremony bilong olketa relative wea no Witness savve mekem samfala problem kamap. Waswe sapos olketa askem iu for standap witim boy and gele wea bae marit? Or waswe sapos partner bilong iu hem no wanfala Witness and hem laekem iu for tekpart long evri samting wea olketa duim? Sapos datfala marit hem front long magistrate and no insaed long wanfala church, wei for attendim datwan hem olsem iumi go for lukluk nomoa long wanfala marit wea followim law.
Long narasaed, marit ceremony wea olketa duim insaed long church or wea wanfala bigman bilong church hem duim savve mekem samfala kwestin kamap. For followim conscience bilong iu wea kasem training from Bible and for stap klia long wei for duim samting wea againstim biliv bilong iu, or duim samting wea maet mekem tufala wea marit and parents bilong tufala for feel shame, maet iu disaed for no go long datfala marit. (Proverbs 22:3) Iu bae stopem olketa problem for kamap for iu and famili bilong iu sapos iu explainim firstaem olketa biliv bilong iu, and talem wanem iu willing for duim and no willing for duim.
Bihaen samfala Christian ting raonem olketa samting hia, maet olketa disaed hem olraet nomoa for attendim marit bilong wanfala relative wea no Witness olsem man wea just go for lukluk bat no share insaed long ceremony. Bat sapos wanfala Christian luksavve hao taem hem go maet hem kasem test for no followim olketa Bible principle, maet hem disaed hem moabeta for no go. Sapos hem disaed for no attendim marit ceremony bat from olketa invaetem hem, bae hem go long marit feast bihaen, hem shud disaed strong for “duim evri samting long wei wea givim glory long God.” (1 Corinthians 10:31) For mekem olketa disison olsem, “evri man bae karem lod bilong hemseleva” saed long diswan. (Galatians 6:5) So nomata wanem iu disaedem, tingim hao wei for keepim gudfala conscience front long Jehovah God hem important.