Waka Tugeta for Helpem Famili Worshipim Jehovah
PIPOL wea laekem famili bilong olketa for lovem Jehovah and worshipim hem mas willing for waka tugeta. Taem Jehovah wakem Adam and Eve, hem talem tufala for waka tugeta. Eve mas waka witim Adam from hem “barava fitim” Adam. (Gen. 2:18) Hasband and waef mas waka tugeta for helpem tufala. (Eccl. 4:9-12) Evriwan long famili mas waka tugeta tu mekem olketa savve duim wanem God markem olketa for duim long famili.
Famili Worshipim God Tugeta
Barry and Heidi garem faevfala pikinini. Tufala sei samting wea helpem famili bilong olketa gohed strong nao hem taem tufala waka tugeta for duim famili Bible study. Barry hem sei: “Taem mifala duim famili study, samfala taem mi givim assignment long olketa pikinini. Maet mi askem olketa for readim wanfala story long Awake! magasin and storyim wanem olketa lanem long famili. Mifala savve redyim story bilong mifala tu for preaching waka, mekem evri pikinini savve story taem mifala go preach.” Heidi hem sei: “Mifala evriwan garem olketa spiritual goal wea mifala laek kasem, and staka taem mifala storyim olketa goal hia mekem mifala luksavve sapos mifala kasem olketa.” Barry and Heidi talem tu hao long samfala evening, full famili no lukluk long television mekem olketa wanwan garem chance for readim olketa buk bilong iumi.
Kongregeson Meeting
Mike and Denise garem wanfala gele and 3-fala boy. Wanem gud samting nao famili bilong olketa kasem from olketa waka tugeta? Mike hem sei: “Nomata mifala plan gud, samfala taem mifala arrive leit long meeting. Nomata olsem, taem mifala waka tugeta, datwan helpem mifala for kam early long olketa meeting.” Denise hem sei: “Taem olketa pikinini start for big, mifala givim samfala waka long olketa for duim long haos. Dota bilong mifala Kim hem help for kukim kaikai and putim olketa pleit and spoon long tebol bifor mifala kaikai.” Boy bilong olketa Michael hem ting go bak olsem: “Evri Tuesday evening, mifala garem kongregeson meeting long haos bilong mifala. So mifala klinim rum for meeting, klinim floor, and putim olketa chair for pipol sidaon long hem.” Nara boy Matthew hem sei: “Long olketa naet wea mifala garem meeting, dadi bilong mifala evritaem finis waka early mekem hem savve helpem mifala pikinini redi for meeting.” Wanem gud samting nao olketa kasem?
Mifala Kasem Staka Gud Samting
Mike hem sei: “Long 1987, mitufala Denise start for pioneer. Long datfala taem, thrifala boy bilong mifala stap long haos witim mifala yet. Gele bilong mifala witim wanfala boy, tufala pioneer tu. Nara tufala boy waka long olketa Bethel construction project. Famili bilong mifala hapi for helpem 40 pipol for dedicate long Jehovah and baptaes. Mifala full famili waka long olketa difren construction project long kantri bilong mifala and long olketa nara kantri tu.”
Tru tumas, taem famili waka tugeta, evriwan bae kasem gud samting. Waswe, iu savve tingim olketa nara samting wea famili bilong iu savve waka tugeta for duim? Taem evriwan long famili bilong iu waka tugeta, datwan bae helpem famili for worshipim Jehovah.
[Piksa long page 28]
Taem famili redyim wanem for talem, datwan helpem olketa for preach