Wei for Stand Strong Long Olketa Test Helpem Mifala for Trustim Jehovah

Story Bilong Ada Dello Stritto

Joel hem sei: “Mi just finis for copyim text for tuday long notebuk bilong mi. Nomata mi 36 year finis, hem tekem mi tufala hour for raetem datwan. Why nao hem longtaem tumas? Mami bilong mi nao bae storyim.”

MI AND hasband bilong mi baptaes long 1968 for kamap Jehovah’s Witness. Bihaen mi bornem tufala healthy son, David and Marc, mi garem mek-thri son, Joel. Long 1973 long Belgium, mi bornem Joel long hospital long Binche, wea hem samting olsem 60 kilometer south long Brussels. Joel hem born early, and long datfala taem hem 1.7 kilogram nomoa. Taem mi lusim hospital, Joel mas stap bihaen bikos hem smol tumas.

Samfala week bihaen Joel luk semsem nomoa, so mitufala Luigi wea hem hasband bilong mi, tekem hem long doctor bilong olketa pikinini. Bihaen datfala doctor chekim Joel, hem sei: “Mi sorre tumas. Luk olsem Joel garem staka problem wea tufala brata bilong hem no garem.” Mifala evriwan kwaet for lelebet longtaem. Long datfala taem, mi luksavve baby bilong mitufala garem olketa nogud health problem. Then doctor story witim hasband bilong mi and sei: “Baby bilong iu garem trisomy 21,” wea nara nem bilong datwan hem Down syndrome.a

Mitufala sorre tumas taem doctor storyim disfala sik, so mitufala disaed for lukim nara spesol doctor moa. Klosap wanfala hour nao doctor chekim Joel, and hem nating talem eni samting. Mitufala Luigi tingse hem longtaem tumas. Gogo, doctor hem luk kam and sei, “Pikinini bilong iutufala bae barava needim help bilong iutufala.” Then, long kaenfala wei hem sei, “Bat Joel bae hapi bikos parents bilong hem lovem hem!” From mi barava sorre tumas, mi karem gud Joel, and mitufala tekem hem go long haos. Long datfala taem, hem eit week nomoa.

Christian Meeting and Ministry Strongim Mifala

Olketa nara medical test showimaot Joel garem tu nogud heart problem, and nara nogud sik (rickets) wea mekem bone bilong hem soft, and liver and spleen bilong hem big. Bikos heart bilong hem big tumas, datwan pressim nao lung bilong hem wea mekem hem isi for kasem enikaen sik. Taem Joel foa month, hem kasem pneumonia and mifala mas tekem hem go bak long hospital, wea olketa putim hem long separate rum. Mifala barava feel nogud tumas taem mifala lukim hem stragol. For tenfala week mifala sorre tumas bikos olketa no letem mifala for tasim and holem hem. Mitufala no savve duim eni samting bat lukluk nomoa, so mitufala trae for comfortim each other and prea.

Long datfala nogud taem, mifala gohed for attendim olketa kongregeson meeting witim David and Marc, wea 6 and 3 year. Taem mifala long Kingdom Hall, mifala feel olsem Jehovah barava lukaftarem mifala. Olketa taem wea mifala stap witim olketa Christian brata and sista, hem helpem mifala for torowem hevi bilong mifala long Jehovah, and diswan mekem mifala feel gud lelebet. (Ps. 55:22) Olketa nurse wea lukaftarem Joel sei olketa luksavve, taem mifala attendim olketa Christian meeting hem helpem mifala for gohed gud.

Long datfala taem tu, mi askem Jehovah for strongim mi for duim field service. Winim wei for stap long haos and krae, mi laek for storyim why mi trustim promis bilong God abaotem world wea bae free from sik and hao diswan strongim mi. Evritaem mi duim ministry, mi luksavve Jehovah ansarem olketa prea bilong mi.

“Diswan Hem Sapraesing Samting!”

Mifala hapi tumas taem mifala savve tekem Joel go aot from hospital and go bak long haos! Bat long next day, mifala sorre moa. Joel hem sik fogud, so mifala mas kwiktaem tekem hem go bak long hospital. Bihaen olketa doctor chekim hem, olketa sei: “Joel bae laef for sixfala month nomoa.” Bihaen nara tufala month, taem hem eit month nomoa, luk olsem samting wea doctor talem bae tru bikos Joel barava sik go moa. Wanfala doctor kam and sidaon witim mifala, hem sei: “Mi barava sorre tumas. No eni samting moa mifala savve duim.” Then hem sei moa: “Long disfala taem, Jehovah nomoa savve helpem hem.”

Mi go bak long hospital rum bilong Joel. Nomata mi feel nogud tumas and mi barava taed, mi no laek for lusim hem. Samfala Christian sista stap witim mi bikos Luigi mas lukaftarem David and Marc. Bihaen wanfala week, seknomoa Joel kasem heart attak. Olketa nurse kwiktaem kam long rum bat no savve duim eni samting for helpem hem. Bihaen samfala minute wanfala nurse tok smol and sei, “Hem dae nao . . .” Mi krae and wiki tumas and lusim datfala rum. Mi trae for prea long Jehovah, bat mi sorre tumas and no savve wanem for talem. Bihaen 15 minute wanfala nurse singaot kam, “Joel start for gud bak nao!” Hem holem hand bilong mi and sei, “Kam and lukim hem distaem.” Taem mi kasem Joel, heart bilong hem waka bak moa! Kwiktaem nomoa evriwan herem datfala nius. Olketa nurse and doctor kam for lukim hem and staka sei, “Diswan hem sapraesing samting!”

Taem Hem Foa Year, Nara Sapraesing Samting Moa

Long taem wea Joel start for big kam, datfala doctor bilong olketa pikinini evritaem sei, “Joel needim staka love.” Bihaen Joel hem born, mitufala Luigi barava feelim love and kea bilong Jehovah. From datwan, mitufala laek for duim sem samting tu for Joel. Bikos Joel needim help long evri samting, mitufala garem staka chance for showimaot love and kea long hem.

Evri year, go kasem taem Joel hem seven year, mifala duim sem samting. From October go kasem March, hem kasem wanfala health problem then olketa narawan moa. So mifala mas tekem hem go long hospital evritaem. Long semtaem, mi traem best for iusim staka taem witim David and Marc. Tufala tu barava helpem Joel and mifala sapraes for lukim hem kamap gud long samfala samting. Olsem example, samfala doctor talem mifala hao Joel bae no savve wakabaot. Bat taem Joel hem foa year, Marc hem sei, “Kam Joel, showim Mami iu savve wakabaot!” Mi barava sapraes for lukim Joel start for wakabaot! Mifala barava hapi tumas, and mifala full famili prea for sei thankiu long Jehovah. Taem Joel duim eni smol samting and kamap gud long datwan, mifala evritaem praisem hem.

Gudfala Samting Kamaot From Wei for Lanem Pikinini Abaotem God

Long evritaem wea fitim, Joel kam long olketa meeting long Kingdom Hall witim mifala. For protectim hem from olketa sik, mifala putim hem insaed wanfala spesol basket wea garem plastic kava. Nomata datfala samting kavarem hem, hem hapi for stap witim kongregeson.

Olketa Christian brata and sista nao showimaot love and givim help wea strongim mifala. Wanfala brata evritaem talem toktok long Isaiah 59:1 wea sei: “Hand bilong Jehovah no short tumas for mekem hem no sevem man, or hem no earpas mekem hem no herem samting.” Disfala toktok comfortim and helpem mifala for trustim Jehovah.

Taem Joel start for big, mifala trae hard for helpem hem for servem Jehovah. And datwan mas important samting long laef bilong hem. Long evri chance wea mifala garem, mifala story abaotem Jehovah long wei for helpem Joel lovem Dadi long heven. Mifala barava askem Jehovah for blessim hard waka bilong mifala for trainim Joel.

From taem Joel 13 year, mifala hapi tumas for lukim hem garem wei for laek storyim Bible truth witim pipol. Bihaen wanfala big operation taem hem 14 year, mi barava hapi tumas bikos Joel askem mi, “Mami, hem olraet sapos mi givim long doctor disfala buk You Savvy Stop All-the-way long Paradise long Earth?” Bihaen tu-thri year, Joel needim nara operation. Mifala savve maet hem dae. Bifor Joel operate, hem givim long doctor wanfala leta wea mifala raetem tugeta. Hem explainim wanem hem disaedem saed long blood. Doctor askem Joel, “Waswe, iu agree witim diswan tu?” Joel talem stret, “Ia.” Mifala barava tinghae long son bilong mifala wea trustim Creator and disaed strong for duim samting wea Hem hapi long hem. Mifala barava thankiu long olketa wea waka long hospital bikos olketa sapotim mifala tumas.

Wei wea Joel Gohed Gud Long Truth

Taem Joel 17 year hem baptaes for showimaot hem dedicate long God. Mifala no savve forgetim datfala day! Mifala barava hapi tumas taem mifala lukim hem gohed gud long truth. Kam kasem distaem, hem gohed yet for lovem Jehovah and strong long truth. Tru tumas, Joel hapi for sei long evriwan wea hem meetim, “Truth hem laef bilong mi!”

Taem Joel klosap 20 year, hem lane hao for read and raet. Hem barava hard samting for hem. Evri smolfala word wea hem raetem hem big samting long hem. Start long datfala taem, evri morning hem ting raonem text from Lukluk Long Olketa Scripture Evriday. Bihaen datwan, Joel barava waka hard for copyim text from Bible long wanfala note buk, wea kam kasem distaem hem hipimap staka note buk!

Long olketa day bilong meeting, Joel mek sure mifala redi kwiktaem bikos hem laek for welkamim olketa brata and sista long Kingdom Hall. Long olketa meeting, hem hapi tumas for givim koment and duim olketa demonstration. Hem help witim olketa microphone and duim olketa nara waka. Evri week, sapos hem no sik tumas, hem kam preaching witim mifala. Long 2007, olketa announcem long kongregeson Joel kasem appointment for serve olsem ministerial servant. Mifala hapi narawe. Datwan hem blessing from Jehovah!

Mifala Luksavve Jehovah Nao Helpem Mifala

Long 1999, mifala feisim nara test moa. Wanfala trak bangam trak bilong mifala and Luigi garekil nogud. From datwan, olketa doctor mas aotem wanfala leg bilong Luigi and hem kasem samfala big operation moa long baksaed bilong hem. Datfala taem tu, mifala mas trustim Jehovah and kasem strong wea hem givim long pipol bilong hem. (Phil. 4:​13) Nomata Luigi hem disable, mifala trae for tingim gud samting nomoa. From Luigi no savve waka for selen, hem garem moa taem for lukaftarem Joel. Diswan helpem mi for garem extra taem for duim olketa spiritual samting. Luigi garem moa taem for lukaftarem gud spiritual need bilong famili and olketa long kongregeson. Luigi gohed olsem chairman bilong olketa elder long kongregeson.

From hard samting wea kasem famili bilong mifala, datwan mekem mifala for garem moa taem for stap tugeta. Gogo, mifala lane for balance and for no expectim staka samting winim wanem mifala fit for duim. Long olketa day wea mifala feel wikdaon, mifala prea long Jehovah abaotem datwan. Sorre nao, taem David and Marc big and stap difren, isisi tufala lusim Jehovah. Mifala hope tufala bae kam bak long Jehovah.​—Luke 15:17-​24.

Long olketa hard taem hia, mifala lukim hao Jehovah helpem mifala and datwan lanem mifala for depend long hem. Mifala tinghae tumas long toktok wea stap long Isaiah 41:13 wea sei: “Mi nao Jehovah, God bilong iufala. Mi holem strong raet hand bilong iufala and tok olsem long iufala, ‘Iufala no fraet, bae mi helpem iufala.’ ” Bikos mifala savve Jehovah hol strong long hand bilong mifala, datwan nao comfortim mifala. Tru nao, wei for stand strong long olketa test helpem mifala for trustim Dadi bilong iumi long heven, Jehovah.

[Footnote]

[Olketa piksa long page 16, 17]

Joel and mami bilong hem, Ada

[Piksa long page 18]

Ada, Joel, and Luigi

[Piksa long page 19]

Joel hapi for welkamim olketa brata and sista long Kingdom Hall