Jesus Mekhae Long Raeteous Wei Bilong God
“God sendem Christ for dae olsem wanfala sakrifaes mekem olketa man wea garem faith long blood bilong hem savve fren bak witim God. God hem duim diswan for showimaot hem raeteous.”—ROM. 3:25.
1, 2. (a) Wanem nao Bible talem abaotem olketa man? (b) Olketa wanem kwestin nao bae iumi ting raonem?
STAKA pipol savve long story long Bible abaotem nogud samting wea happen long Eden. Iumi evriwan kasem nogud samting bikos Adam hem sin. Bible sei: “Sin hem kasem evriwan long world bikos long wanfala man nomoa. From olketa sin, olketa dae, dastawe evriwan dae bikos evriwan sin.” (Rom. 5:12) Nomata iumi trae hard for duim stret samting, iumi savve mistek and from datwan iumi laekem God for forgivim iumi. Aposol Paul tu tok sorre olsem: “Gudfala samting wea mi laek for duim, mi no duim. Bat nogud samting wea mi no laek for duim, hem nao mi savve duim. Mi ia, mi iusles man nomoa!”—Rom. 7:19, 24.
2 From iumi evriwan born sin, hem gud for ting raonem olketa kwestin hia: Hao nao Jesus no born sin, and why nao hem baptaes? Long wanem wei nao Jesus mekhae long raeteous wei bilong Jehovah? Important samting nao, wanem gud samting nao kamap from Christ dae?
Daot Kamap Abaotem Raeteous Wei Bilong God
3. Wanem nao Satan duim for trikim Eve?
3 Adam and Eve, firstfala dadi and mami bilong iumi, krangge tumas for no laekem God for rulim olketa. Bat olketa laekem “snek bilong bifor kam, wea hem Devil and Satan” for rulim olketa. (Rev. 12:9) Tingim samting wea happen. Satan askem Eve sapos Jehovah God rul long raeteous wei or nomoa. Hem sei: “Waswe, hem barava tru God talem iu for no kaikai from evri tree long garden?” Eve talem hao God sei wanfala tree nomoa olketa mas no kaikaim mekem olketa no dae. Samting wea Satan talem long Eve, hem olsem hem sei God hem laea. Satan sei: “Iu bae nating dae.” Hem trikim Eve for mekem hem tingse God no laek givim hem gudfala samting and sapos hem kaikaim frut hia, hem bae kamap olsem God and savve disaedem evri samting seleva.—Gen. 3:1-5.
4. Hao nao Satan start for rulim olketa man?
4 Hem olsem Satan sei, olketa man bae barava hapi sapos olketa savve disaedem evri samting seleva and no needim God. Adam no mekhae long raeteous rul bilong God bikos hem herem waef bilong hem and tufala kaikaim frut wea God tambuim. From datwan, Adam no perfect nao, hem no fren witim Jehovah, and iumi evriwan sorre from iumi kasem sin and dae. Nara samting tu, Satan wea hem “god bilong disfala world” start for rulim olketa man.—2 Cor. 4:4; Rom. 7:14.
5. (a) Wanem nao Jehovah duim wea showimaot hem no savve laea? (b) Wanem hope nao God givim for olketa pikinini bilong Adam and Eve?
5 Jehovah no savve laea so hem judgem Adam and Eve for dae. (Gen. 3:16-19) Nomata olsem, datwan nating spoelem firstfala plan bilong God! Taem Jehovah judgem Adam and Eve, hem givim nambawan hope for olketa pikinini bilong tufala. Hem bae sendem kam wanfala “pikinini” and Satan bae killim leg bilong hem. Bat Pikinini hia bae kamap gud moa and bae “killim hed bilong [Satan].” (Gen. 3:15) Bible sei olsem abaotem Jesus Christ: “Son bilong God hem kam for finisim olketa samting wea Devil duim.” (1 John 3:8) Bat hao nao wei bilong Jesus and dae bilong hem mekhae long raeteous wei bilong God?
Why Nao Jesus Baptaes?
6. Hao nao iumi savve Jesus no born sin?
6 Jesus mas kamap barava semsem olsem Adam wea long firstaem hem perfect. (Rom. 5:14; 1 Cor. 15:45) So Jesus mas perfect taem hem born. Hao nao olsem? Angel Gabriel sei long Mary, mami bilong Jesus: “Holy spirit bae kam long iu and paoa bilong Barava Haefala God bae protectim iu. Dastawe datfala pikinini wea born bae hem holy and olketa bae kolem hem Son bilong God.” (Luke 1:35) Taem Jesus smol boy yet, Mary witim Joseph wea adoptim Jesus, tufala lukaotem Jesus gogo olketa faendem hem long temple. Jesus sei: “Iufala shud savve finis, mi mas stap long haos bilong Dadi bilong mi!” (Luke 2:49) Luk olsem from taem hem smol, Jesus savve hem Son bilong God. Hem barava important tumas long Jesus for mekhae long raeteous wei bilong God.
7. Wanem nao barava spesol tumas abaotem Jesus?
7 Jesus showimaot hem barava interest long olketa spiritual samting. Hem evritaem go long olketa meeting for worshipim Jehovah. From tingting bilong hem perfect, hem fit for minim and rememberim evri samting wea hem herem and readim long Hebrew Scripture. (Luke 4:16) Hem garem perfect body tu wea hem savve sakrifaesim for olketa man. Taem Jesus baptaes, hem prea, and maet hem ting raonem profesi long Psalm 40:6-8.—Luke 3:21; readim Hebrews 10:5-10.a
8. Why nao John Baptaesa trae stopem Jesus for no baptaes?
8 Firstaem, John Baptaesa no laek baptaesim Jesus. Why nao olsem? Bikos olketa Jew sin againstim Law, John baptaesim olketa for showimaot olketa repent. From John hem kasin brata bilong Jesus, hem mas savve Jesus hem raeteous and no need for repent. Jesus helpem John for luksavve hem fitim for Hem mas baptaes. Jesus sei: “No stopem diswan, mekem iumi savve duim evri samting wea God hem laekem.”—Matt. 3:15.
9. Why nao Jesus baptaes?
9 Long firstaem, Adam fit for garem olketa perfect pikinini. From Jesus perfect, hem fit for duim datwan tu. Bat Jesus no tingim datwan bikos hem savve hem no plan bilong Jehovah for hem duim olsem. God sendem Jesus for kam long earth for kamap Messiah, or Pikinini wea hem promisim. Jehovah laekem tu for Jesus sakrifaesim perfect laef bilong hem. (Readim Isaiah 53:5, 6, 12.) Bat reason why Jesus baptaes hem no semsem olsem iumi. Jesus no need for dedicate long Jehovah bikos hem wanfala Israelite wea olketa dedicate finis long God. Jesus baptaes for givim hemseleva for duim wanem God laekem olsem wanem Scripture talem abaotem Messiah.
10. Wanem nao samfala samting wea God laekem Messiah for duim? Hao nao Jesus ting long datwan?
10 Jehovah laekem Jesus for preachim gud nius abaotem Kingdom, teachim pipol for kamap disaepol, and olketa hia bae teachim nara pipol tu for kamap disaepol. From Jesus laekem Jehovah God nomoa for rul bikos Hem raeteous, Jesus willing for letem pipol spoelem hem and killim hem dae long nogud wei. Jesus barava lovem Dadi bilong hem, dastawe hem hapi tumas for duim wanem God laekem and for sakrifaesim body bilong hem. (John 14:31) Hem hapi tu from hem savve God bae iusim price bilong perfect laef bilong hem for sevem olketa man from sin and dae. Waswe, God hapi long Jesus from hem willing for duim olketa important samting hia? Barava nao!
11. Wanem nao showimaot Jehovah hapi long Jesus wea hem nao datfala Messiah?
11 Fofala Gospel talemaot Jehovah God barava hapi taem Jesus kamaot from wata long Jordan River. John Baptaesa sei: “Mi lukim datfala spirit wea olsem wanfala kurukuru kam daon from skae, and hem stap long [Jesus] . . . Miseleva mi lukim datwan and mi talemaot tu, man hia nao hem Son bilong God.” (John 1:32-34) Taem Jesus baptaes, Jehovah sei: “Diswan nao Son bilong mi wea mi lovem and wea mi hapi long hem.”—Matt. 3:17; Mark 1:11; Luke 3:22.
Faithful Go Kasem Taem Hem Dae
12. Bihaen Jesus baptaes, wanem nao hem duim for thri and haf year?
12 Long thri and haf year, Jesus barava waka hard for teachim pipol abaotem Dadi bilong hem and abaotem rul bilong hem wea raeteous. From hem baeleg go long staka ples long Promis Land, hem mas taed tumas, bat nomata olsem, hem gohed for talemaot olketa tru samting long pipol. (John 4:6, 34; 18:37) Jesus teachim pipol abaotem Kingdom bilong God. Taem hem duim mirakol for healim pipol wea sik, givim kaikai long staka pipol wea hangre, and mekem samfala wea dae for laef bak moa, hem showimaot olketa samting wea Kingdom bae duim for olketa man.—Matt. 11:4, 5.
13. Jesus teachim iumi for prea abaotem wanem?
13 From Jesus barava hambol, taem hem duim olketa mirakol and teachim pipol, hem talem pipol for praisem Jehovah and no praisem hem. (John 5:19; 11:41-44) Jesus talemaot tu olketa barava important samting wea iumi mas prea abaotem. Iumi mas prea for nem bilong God, Jehovah, for “stap holy,” and rul bilong hem wea raeteous mas finisim nogud rul bilong Satan. Then God bae ‘duim samting wea hem plan for duim long earth, long sem wei wea hem duim datwan long heven.’ (Matt. 6:9, 10) Jesus encouragem iumi tu for followim wanem iumi prea abaotem taem hem sei: “Evritaem kingdom and olketa samting wea God sei hem stret mas first samting long laef bilong iufala.”—Matt. 6:33.
14. Nomata Jesus perfect, why nao hem no isi for hem duim wanem God laekem?
14 Taem Jesus klosap for dae, hem barava wari and tingim bigfala responsibility wea hem garem. For plan bilong Dadi bilong hem kamap tru and for nem bilong God stap holy, Jesus mas gohed faithful taem pipol kotem hem long wei wea no stret and hem mas dae long nogud wei. Faevfala day bifor Jesus dae, hem prea olsem: “Mi barava wari tumas nao, and wanem moa bae mi talem? Dadi, sevem mi from disfala hard taem. Nomata olsem, hem nao samting wea mi kam for hem.” From Jesus hem man nomoa, hem talemaot feeling bilong hem firstaem then bihaen hem talemaot samting wea barava important. Hem prea olsem: “Dadi, mekhae long nem bilong iu.” Semtaem nomoa Jehovah sei: “Mi mekhae long nem bilong mi finis, and bae mi mekhae long hem moa.” (John 12:27, 28) Test wea Jesus kasem for faithful long God or nomoa, hem hard winim eni nara test wea eni man kasem. Nomata olsem, hem willing for feisim datwan. Taem Jesus herem wanem Dadi bilong hem long heven talem, datwan strongim Jesus for mekhae long Jehovah and wei wea hem nomoa fit for rul. Jesus barava win for duim datwan!
Gud Samting Kamaot From Jesus Dae
15. Taem Jesus klosap for dae, why nao hem sei: “Mi duim finis evri samting wea iu askem mi for duim”?
15 Taem Jesus hange long post and klosap for dae, hem sei: “Mi duim finis evri samting wea iu askem mi for duim!” (John 19:30) Jesus duim olketa nambawan samting from God helpem hem long thri and haf year, start long taem wea hem baptaes go kasem taem hem dae! Taem Jesus dae, bigfala earthquake happen and bigman bilong olketa soldia sei: “Barava son bilong God nao disfala man!” (Matt. 27:54) Luk olsem datfala bigman herem samfala tok spoelem Jesus from hem sei hem nao Son bilong God. Nomata Jesus kasem staka nogud samting, hem gohed faithful long God and showimaot Satan hem barava nogud man for laea. Satan talem wanfala toktok abaotem evriwan wea laekem God nomoa for rul. Hem sei: “Taem man hem klosap for dae, hem bae willing for givim evri samting wea hem garem for sevem laef bilong hem.” (Job 2:4, Complete Jewish Bible) From Jesus faithful long God, hem showimaot Adam and Eve tu fit for faithful long God taem tufala kasem test wea no hard tumas. Bat important samting nao, taem Jesus laef and taem hem dae, hem mekhae long raeteous wei wea Jehovah hem rul. (Readim Proverbs 27:11.) Waswe, eni gud samting moa kamaot from dae bilong Jesus? Ia!
16, 17. (a) Why nao Jehovah savve ting long olketa Witness wea stap bifor Christ olsem olketa raeteous? (b) Wanem gud samting nao Jesus kasem from hem faithful long Jehovah? Wanem nao Lord Jesus Christ gohed for duim?
16 Bifor Jesus kam long earth, staka pipol nao worshipim Jehovah. God ting long olketa hia olketa raeteous and garem hope for laef bak moa. (Isa. 25:8; Dan. 12:13) Bat hao nao Jehovah fit for givim olketa nambawan blessing olsem long olketa man wea born sin? Bible sei: “God sendem [Jesus] Christ for dae olsem wanfala sakrifaes mekem olketa man wea garem faith long blood bilong hem savve fren bak witim God. God hem duim diswan for showimaot hem raeteous bikos long bifor kam hem forgivim pipol wea duim sin and hem patient witim olketa. Long distaem tu God laek for showimaot hem raeteous taem hem ting long man wea garem faith long Jesus olsem hem raeteous.”—Rom. 3:25, 26.b
17 Taem Jesus laef bak moa, Jehovah givim hem position wea hae winim position wea hem garem bifor hem kam long earth. Distaem Jesus hem barava spesol angel long heven wea no savve dae. (Heb. 1:3) Lord Jesus Christ wea Hae Priest and King hem gohed for helpem olketa wea followim hem for mekhae long raeteous wei bilong God. And iumi hapi tumas from Dadi bilong iumi, Jehovah, givim gud samting long evriwan wea mekhae long raeteous wei bilong hem and worshipim hem long faithful wei and wea followim example bilong Son bilong hem!—Readim Psalm 34:3; Hebrews 11:6.
18. Wanem nao study bihaen bae storyim?
18 Evri faithful man start long Abel kam kasem distaem savve fren gud witim Jehovah bikos olketa showimaot faith long Pikinini wea God promisim. Jehovah savve Son bilong hem bae gohed faithful long hem, and dae bilong datfala Son bae fit for aotem “sin bilong evri pipol long disfala world.” (John 1:29) Pipol distaem tu savve kasem gud samting from dae bilong Jesus. (Rom. 3:26) So wanem gud samting nao iu savve kasem from Christ givim laef bilong hem? Study bihaen bae storyim diswan.
[Olketa Footnote]
a Aposol Paul talem toktok wea stap long Psalm 40:6-8 long Greek Septuagint wea sei: “Iu redyim finis body bilong mi.” Olketa no faendem datfala toktok long olketa oldfala Hebrew Scripture wea stap distaem.
b Lukim “Kwestin From Reader” long page 6 and 7.
Wanem Nao Ansa Bilong Iu?
• Hu nao kwestinim sapos God hem raeteous, and hao nao hem duim datwan?
• Why nao Jesus baptaes?
• Wanem gud samting nao kamaot from dae bilong Jesus?
[Piksa long page 9]
Iu savve why nao Jesus baptaes?