Hao Nao Dae Bilong Jesus Sevem Iumi?
“Man wea showimaot faith long Son hem kasem laef olowe. Man wea no obeyim Son bae no kasem laef, bat God bae kros long hem.”—JOHN 3:36.
1, 2. Why nao olketa brata start for pablisim Zion’s Watch Tower?
WANFALA Watchtower long October 1879 sei: “Sapos man studyim gud Bible, hem bae luksavve dae bilong Christ hem barava important samting.” Lastfala toktok long datfala study hem talem disfala important samting: “Iumi mas againstim eni samting wea mekem iumi for ting nating long wei wea Christ dae for sin bilong iumi.”—Readim 1 John 2:1, 2.
2 Start long July 1879, olketa brata pablisim Zion’s Watch Tower for mekhae long wanem Bible teachim abaotem hao Jesus givim laef bilong hem olsem price for sevem pipol. Disfala magasin givim ‘kaikai long barava taem’ bikos gogo for end long mek-19 century, staka wea sei olketa Christian daotem sapos dae bilong Jesus savve sevem olketa. (Matt. 24:45) Staka start for bilivim teaching abaotem evolution, wea againstim wanem Bible teachim. Bible sei firstaem man hem perfect, then gogo hem sin. Bat olketa wea teachim evolution sei man hem gogo for kamap gud and olketa no needim eniwan for sevem olketa. Dastawe aposol Paul talem disfala kaonsel long Timothy: “Lukaftarem gud samting wea iu kasem, no herem olketa wea tok spoelem holy samting and no herem olketa laea toktok wea pipol sei hem nao gudfala ‘savve.’ From samfala laek mekhae long savve olsem, olketa lusim faith nao.”—1 Tim. 6:20, 21.
3. Iumi bae ting raonem olketa wanem kwestin?
3 Iumi barava no laek for “lusim faith.” Dastawe hem gud for ting raonem olketa kwestin hia: Why nao samwan mas dae for mi? Wanem nao price for sevem mi? Wanem nao mi mas duim for kasem gud samting from dae bilong Jesus mekem God no kros long mi?
Iumi Savve Sev From Kros Bilong God
4, 5. Wanem nao showimaot God kros long disfala nogud world?
4 Samting wea Bible talem and olketa samting wea kasem olketa man showimaot God ‘kros’ long olketa man start from taem wea Adam sin. (John 3:36) Samting wea showimaot diswan nao, evri man gogo for dae. Nomata rul bilong Satan wea hem againstim rul bilong God bat hem nating fit for stopem evri problem wea kasem olketa man. And no eni gavman bilong man savve mekem pipol kasem wanem olketa needim. (1 John 5:19) Olketa man gohed for garem problem olsem war, pipol brekem law, and olketa poor.
5 So evri samting wea happen showimaot Jehovah no blessim disfala nogud world. Paul sei: “God long heven showimaot kros bilong hem long pipol wea no obeyim hem.” (Rom. 1:18-20) So olketa wea no obeyim God and no repent bae kasem nogud samting. Long distaem, kros bilong God hem showaot long olketa strongfala toktok wea hem talem againstim world bilong Satan. Olketa toktok hia stap long olketa pablikeson bilong iumi.—Rev. 16:1.
6, 7. Wanem waka nao olketa anointed Christian leadim? Wanem chance nao stap yet for pipol long world bilong Satan?
6 Waswe, hem tu leit nao for olketa man lusim world bilong Satan and savve fren bak witim Jehovah? Nomoa, chance hem stap yet for olketa duim datwan. Olketa anointed Christian “talemaot toktok bilong Christ” and leadim preaching waka for talem pipol long evri kantri for “fren bak moa witim God.”—2 Cor. 5:20, 21.
7 Aposol Paul sei Jesus “sevem iumi mekem God no kros long iumi long day bilong hem.” (1 Thess. 1:10) Long datfala taem, Jehovah bae showim kros bilong hem long olketa man wea no repent and finisim olketa for olowe. (2 Thess. 1:6-9) Hu nao bae stap sef? Bible sei: “Man wea showimaot faith long Son hem kasem laef olowe. Man wea no obeyim Son bae no kasem laef, bat God bae kros long hem.” (John 3:36) So olketa wea laef long datfala taem and wea gohed for showimaot faith long Jesus and tinghae long price wea hem peim for sevem pipol, bae stap sef taem God showimaot kros bilong hem for finisim world.
Laef Bilong Jesus Sevem Pipol
8. (a) Wanem nambawan samting nao Adam and Eve shud kasem? (b) Wanem nao showimaot Jehovah hem God wea duim stret samting evritaem?
8 Firstaem Adam and Eve perfect. Sapos tufala gohed obeyim God, earth bae Paradaes and tufala bae stap gud witim evri pikinini bilong tufala. Bat firstfala dadi and mami bilong iumi disaed for no obeyim God. So God judgem tufala for dae for olowe and raosem tufala from Paradaes. Gogo taem Adam and Eve garem olketa pikinini, olketa pikinini hia tu kasem sin. Then tufala kamap olo and dae. Diswan showimaot Jehovah no savve laea and evritaem hem duim stret samting. Jehovah talem finis long Adam sapos hem kaikaim frut wea hem tambuim, Adam bae dae, and hem nao samting wea happen.
9, 10. (a) Why nao olketa pikinini bilong Adam dae? (b) Hao nao iumi savve laef olowe?
9 From iumi kam from laen bilong Adam, iumi born sin, and gogo for dae. Taem Adam sin, hem pasim kam sin long iumi evriwan. So iumi tu savve dae. Jehovah hem laea nao sapos hem letem olketa man for no dae and hem no peim price for sevem olketa. Dastawe Paul sei: “Iumi savve God nao givim datfala Law. Bat mi man nomoa ia wea mi slave bilong sin. Mi ia, mi iusles man nomoa! Hu nao bae sevem mi from disfala body wea bae mekem mi dae nomoa?”—Rom. 7:14, 24.
10 Jehovah nomoa fit for givim wanem olketa man needim mekem hem savve forgivim sin bilong olketa and for olketa no dae. Hem sendem Son wea hem lovem from heven for born olsem man wea perfect, and Jesus givim laef bilong hem, wea datwan hem price for sevem pipol. Jesus hem difren from Adam bikos no enitaem hem sin. Peter sei: “Hem no duim eni sin.” (1 Pet. 2:22) Jesus fit for garem olketa perfect pikinini and startim wanfala famili laen bilong olketa perfect man. Nomata olsem, hem letem olketa enemy bilong God for killim hem dae mekem hem savve adoptim olketa pikinini bilong Adam wea sin. Then olketa wea showimaot faith long hem savve kasem laef olowe. Bible sei: “Wanfala God hem stap, and Christ Jesus nomoa man wea leadim pipol go long God. Hem givim perfect laef bilong hem, wea datwan hem price for sevem evriwan.”—1 Tim. 2:5, 6.
11. (a) Wanem tokpiksa nao helpem iumi minim hao laef bilong Jesus sevem pipol? (b) Hu nao kasem gud samting from dae bilong Jesus?
11 Wanfala tokpiksa savve helpem iumi for minim hao laef bilong Jesus hem price for sevem pipol. Staka pipol putim selen long bank bat gogo olketa lusim evri selen hia bikos olketa wea ownim bank stealim selen and datwan mekem olketa for garem bigfala kaon. From datwan, olketa putim olketa man hia wea ownim bank long prison. Bat waswe long olketa wea lusim evri selen? Olketa savve kasem gud samting nomoa sapos wanfala man wea rich tumas and kaen, peim datfala bank and givim bak evri selen bilong olketa mekem olketa no garem kaon. Long sem wei, Jehovah God and Son wea hem lovem, peim olketa pikinini bilong Adam witim blood bilong Jesus and datwan changem kaon wea olketa garem from olketa sin. Dastawe John Baptaesa sei olsem abaotem Jesus: “Lukim go man hia, hem nao Pikinini Sheepsheep bilong God wea aotem sin bilong evri pipol long disfala world!” (John 1:29) Jesus aotem sin bilong pipol wea laef and wea dae finis.
Wanem Nao Price for Sevem Pipol?
12, 13. Wanem nao iumi savve lanem from wei wea Abraham willing for sakrifaesim Isaac?
12 Hem hard tumas for iumi barava minim price wea Dadi bilong iumi long heven and Son bilong hem peim for iumi. Bat samfala story long Bible savve helpem iumi for ting raonem datwan. Tingim hao Abraham mas feel taem hem gogo for thrifala day long Moriah for obeyim komand bilong God. God sei: “Tekem plis, son bilong iu Isaac, wea iu lovem tumas, and go long Moriah and sakrifaesim hem long maunten wea mi bae showim long iu.”—Gen. 22:2-4.
13 Abraham kasem nao datfala ples. Tingim hao Abraham mas sorre tumas taem hem taemapem hand and leg bilong Isaac and leim hem daon long altar wea hemseleva wakem. Abraham mas feel nogud tumas taem hem holem naef for killim dae son bilong hem! Tingim feeling bilong Isaac taem hem leidaon long altar and weit for dae. Angel bilong Jehovah stopem Abraham long barava taem. Samting wea Abraham and Isaac duim helpem iumi for minim feeling bilong Jehovah taem hem letem pipol wea followim Satan for killim dae Son bilong hem. Isaac willing for duim wanem Abraham talem. Datwan piksarem wei wea Jesus willing for safa and dae for iumi.—Heb. 11:17-19.
14. Wanem samting wea happen long laef bilong Jacob nao helpem iumi tinghae long price wea Jehovah peim for sevem pipol?
14 Iumi savve lane abaotem price wea God peim for sevem pipol, from laef bilong Jacob. Son wea Jacob lovem tumas nao hem Joseph. Olketa brata bilong Joseph jealous and heitim hem. Bat Joseph willing for go herem nius from olketa brata bilong hem taem Jacob talem hem for go. Long datfala taem, olketa lukaftarem sheepsheep bilong Jacob long ples long north wea samting olsem 100 kilometer from Hebron, hom bilong olketa. Tingim feeling bilong Jacob taem olketa son bilong hem tekem kam bak kaleko bilong Joseph wea fulap witim blood! Jacob sei: “Diswan hem kaleko bilong son bilong mi! Masbi wanfala wild animal kaikaim hem! Joseph hem dae nao!” From datwan Jacob hem sorre tumas for longfala taem. (Gen. 37:33, 34) Tingting bilong Jehovah no barava semsem olsem man. Nomata olsem, taem iumi ting raonem samting wea kasem Jacob, maet datwan helpem iumi minim lelebet feeling bilong Jehovah taem olketa man spoelem and killim dae Son wea hem lovem tumas.
Kasem Gud Samting From Dae Bilong Christ
15, 16. (a) Hao nao Jehovah showimaot hem acceptim price wea Christ givim for sevem pipol? (b) Wanem gud samting nao iu kasem from Christ givim laef bilong hem for sevem pipol?
15 Jehovah God mekem Son bilong hem wea faithful for laef bak olsem spesol angel. (1 Pet. 3:18) For 40-fala day bihaen Jesus laef bak and stap yet long earth, hem kam story witim olketa disaepol. Hem strongim faith bilong olketa and redyim olketa for bigfala waka for preach. Then hem go bak long heven and hem givim price bilong blood bilong hem long God. Hem duim diswan for olketa wea followim hem and showimaot faith long sakrifaes bilong hem. Jehovah God showimaot hem acceptim datfala price wea Christ givim for sevem pipol taem hem letem Jesus givim kam holy spirit long olketa disaepol wea hipap long Jerusalem long Pentecost 33 C.E.—Acts 2:33.
16 Olketa anointed Christian start for talem pipol for baptaes long nem bilong Jesus Christ mekem God forgivim and sevem olketa. (Readim Acts 2:38-40.) Start long datfala taem kam kasem distaem, staka million pipol long evri kantri fren gud witim God bikos olketa garem faith long dae bilong Jesus. (John 6:44) Dastawe hem gud for ting raonem tufala kwestin hia: Waswe, iumi kasem hope for laef olowe bikos long gudfala samting wea iumiseleva duim? From iumi garem disfala nambawan hope, waswe, datwan minim iumi hard for lusim nao?
17. Hao nao iumi shud ting long nambawan blessing wea iumi garem for fren witim God?
17 From iumi sin, iumi no fit for kasem laef olowe. Nomata olsem, staka million pipol showimaot faith long dae bilong Christ and fren gud witim God and garem hope for laef olowe long paradaes earth. Bat nomata sapos iumi fren witim God distaem, sapos iumi no gohed for tinghae long dae bilong Jesus, bae iumi savve lusim disfala wei for fren witim Jehovah. For stap laef long day bilong kros bilong Jehovah, iumi mas gohed for tinghae long datfala “price wea Christ Jesus peim for sevem” pipol.—Rom. 3:24; readim Philippians 2:12.
Showimaot Faith Long Dae Bilong Jesus
18. Wanem nao hem minim for showimaot faith long dae bilong Jesus?
18 Theme scripture bilong disfala study, John 3:36, hem sei sapos iumi laek showimaot faith long Lord Jesus Christ, iumi mas obeyim hem. Taem iumi tinghae long dae bilong Jesus, datwan savve helpem iumi for followim wanem hem teachim, and for stap klia long olketa nogud samting. (Mark 7:21-23) Olketa wea no repent bat gohed for durong, or mekfani long rabis samting and “evri samting wea no klin,” wea minim tu man wea gohed for lukluk long rabis piksa, ‘bae God hem judgem olketa.’—Eph. 5:3-6.
19. Wanem nao iumi savve duim for showimaot iumi tinghae long dae bilong Jesus?
19 Sapos iumi tinghae long dae bilong Jesus, bae iumi busy for “duim wanem God laekem from [iumi] barava lovem hem.” (2 Pet. 3:11) Iumi mas markem inaf taem for prea, study seleva, go long olketa meeting, duim famili worship, and preach abaotem Kingdom. Dastawe iumi mas “no forget for duim gudfala samting and for sharem samting witim nara pipol, from God hem hapi tumas long olketa sakrifaes olsem.”—Heb. 13:15, 16.
20. Evriwan wea gohed for showimaot faith long dae bilong Jesus bae kasem wanem blessing?
20 Taem Jehovah showimaot kros bilong hem long disfala nogud world, iumi bae hapi tumas bikos iumi showimaot faith long dae bilong Jesus and gohed for tinghae long datwan! Then long niu world wea God promisim, iumi bae thankiu long Jehovah for nambawan wei wea hem sevem iumi from kros bilong hem for olowe.—Readim John 3:16; Revelation 7:9, 10, 13, 14.
Wanem Nao Ansa Bilong Iu?
• Why nao iumi needim Jesus for dae for iumi?
• Wanem nao price for sevem pipol?
• Wanem gud samting nao iumi savve kasem from dae bilong Jesus?
• Hao nao iumi showimaot faith long dae bilong Jesus?
[Piksa long page 13]
Taem hem stap yet for pipol fren bak witim Jehovah
[Piksa long page 15]
Taem iumi ting raonem samting wea kasem Abraham, Isaac, and Jacob, datwan helpem iumi for tinghae long dae bilong Jesus