Gud Nius wea Iumi Evriwan Need for Herem

“Gud nius . . . hem showimaot paoa bilong God and hem savve sevem eniwan wea garem faith.”—ROM. 1:16.

1, 2. Why nao iu talemaot “gud nius abaotem kingdom,” and wanem nao main samting wea iu storyim?

‘MI HAPI for talemaot gud nius evriday.’ Iu tu maet talem or tingim sem samting. From iu wanfala Jehovah’s Witness, iu luksavve hem important for talemaot “gud nius abaotem kingdom.” Maet iu tingim profesi wea Jesus talem abaotem datwan.​—Matt. 24:14.

² Taem iu talemaot “gud nius abaotem kingdom,” datwan showimaot iu gohed for duim waka wea Jesus nao startim. (Readim Luke 4:43.) Maet main samting wea iu storyim hem hao klosap nao God bae stretem olketa nogud samting wea kasem olketa man. Long taem bilong “bigfala trabol,” Jehovah bae finisim evri religion wea sei olketa Christian and bae finisim tu olketa nogud pipol and nogud samting wea happen distaem. (Matt. 24:21) Maet iu storyim tu hao Kingdom bilong God bae mekem earth kamap paradaes moa and evriwan bae hapi and stap long peace. Tru tumas, disfala “gud nius abaotem kingdom” hem join witim “gud nius [wea God talem] long Abraham, taem hem sei: ‘Bikos long iu pipol long evri kantri bae kasem blessing.’”​—Gal. 3:8.

3. Why nao aposol Paul mekhae long gud nius long leta wea hem raetem for olketa long Rome?

³ Bat maet iumi no storyim tumas gud nius wea pipol need for herem! Long leta wea aposol Paul raetem for olketa long Rome, hem storyim “kingdom” wanfala taem nomoa, bat hem iusim toktok “gud nius” 12-fala taem. (Readim Romans 14:17.) Wanem gud nius nao Paul storyim staka taem? Why nao datfala gud nius hem important? And why nao iumi shud tingim datwan taem iumi talemaot “gud nius bilong God” long pipol long territory?​—Mark 1:14; Rom. 15:16; 1 Thess. 2:2.

Wanem Olketa Long Rome Needim

4. Long firstaem wea Paul stap long prison long Rome, wanem nao hem preach abaotem?

⁴ Hem gud for tingim olketa subject wea Paul raet abaotem taem hem firstaem stap long prison long Rome. Bible sei taem staka Jew kam visitim Paul, hem ‘barava storyim gud (1) kingdom bilong God and (2) Jesus.’ Wanem nao tingting bilong pipol hia abaotem wanem Paul storyim? “Samfala bilivim samting wea hem talem bat olketa narawan no laek bilivim hem.” Bihaen datwan, Paul ‘hapi for story long eniwan wea kam for lukim hem. Hem no fraet for preach abaotem (1) kingdom bilong God long olketa, and teachim olketa abaotem (2) Lord Jesus Christ.’ (Acts 28:17, 23-31) Hem tru, Paul mekhae long Kingdom bilong God, bat wanem moa hem storyim? Hem storyim important samting wea join witim datfala Kingdom, wea hem nao waka bilong Jesus insaed plan bilong God.

5. Long leta wea Paul raetem for olketa long Rome, wanem nao hem sei olketa need for savve long hem?

⁵ Evriwan need for savve abaotem Jesus and showimaot faith long hem. Paul mekhae long datwan long leta wea hem raetem for olketa long Rome. Bifor hem storyim datwan, hem sei: “Mi strong for worshipim [God] long wei for talemaot gud nius abaotem Son bilong hem.” Hem sei tu: “Mi no shame for talemaot datfala gud nius. Gud nius hia hem showimaot paoa bilong God and hem savve sevem eniwan wea garem faith.” Bihaen hem sei tu: “Followim wanem mi talemaot long datfala gud nius, diswan bae showaot long taem wea God iusim Christ Jesus for judgem olketa man long samting wea olketa duim haed.” And hem sei moa: “So mi talemaot gud nius abaotem Christ start long Jerusalem and go raon long evri ples go kasem Illyricum.”a (Rom. 1:9, 16; 2:16; 15:19) Long tingting bilong iu, why nao Paul storyim Jesus Christ long pipol long Rome?

6, 7. Hao nao maet kongregeson long Rome hem start and hu nao long datfala kongregeson?

⁶ Iumi no savve hao nao kongregeson long Rome hem start. Maet olketa Jew and olketa wea followim religion bilong olketa Jew, kamap Christian long Pentecost 33 C.E. and olketa nao go bak long Rome. (Acts 2:10) Or maet olketa Christian wea duim bisnis or olketa wea savve travel nao talemaot gud nius long Rome. Nomata wanem nao happen, datfala kongregeson long Rome start longtaem finis bifor Paul raetem leta bilong hem long samting olsem 56 C.E. (Rom. 1:8) Wanem kaen pipol nao stap long datfala kongregeson?

⁷ Samfala hem olketa Jew. Paul talem hello long Andronicus and Junias and hem kolem tufala “relative bilong mi.” Nara tufala Jew hem Aquila and waef bilong hem Priscilla. (Rom. 4:1; 9:3, 4; 16:3, 7; Acts 18:2) Bat luk olsem staka brata and sista wea Paul talem hello long olketa hem olketa wea no Jew. Maet samfala hem olketa slave and olketa bigman wea “waka long haos bilong King.”​—Phil. 4:22; Rom. 1:6; 11:13.

8. Wanem nogud samting nao olketa long Rome kasem?

⁸ Evri Christian long Rome kasem nogud samting wea iumi tu kasem. Paul sei: “Evriwan sin and no savve showimaot olketa nambawan wei bilong God.” (Rom. 3:23) Tru tumas, evriwan wea readim leta bilong Paul need for luksavve olketa sin and olketa mas showimaot faith long wanem God duim for sevem olketa.

Pipol Need for Luksavve Olketa Sin

9. Wanem gud samting nao Paul storyim wea man savve kasem taem hem savve long datfala gud nius?

⁹ Long leta wea Paul raetem for olketa long Rome, hem storyim gud samting wea man savve kasem taem hem savve long datfala gud nius. Hem sei: “Mi no shame for talemaot datfala gud nius. Gud nius hia hem showimaot paoa bilong God and hem savve sevem eniwan wea garem faith. Olketa Jew nao herem firstaem, then bihaen, pipol bilong Greece tu herem.” Tru tumas, God savve sevem eniwan, bat olketa mas garem faith. Paul mekhae long diswan taem hem talem toktok long Habakkuk 2:4. Hem sei: “Man wea raeteous bae gohed for laef bikos hem garem faith.” (Rom. 1:16, 17; Gal. 3:11; Heb. 10:38) Bat hao nao gud nius wea savve sevem man hem join witim wei wea iumi “evriwan sin”?

10, 11. Why nao samfala minim bat samfala no minim wanem Romans 3:23 talem?

¹⁰ Man mas luksavve hem sin bifor hem savve garem faith. Olketa wea biliv long God and wea savve long Bible luksavve long datwan. (Readim Ecclesiastes 7:20.) Nomata olketa agree witim datwan or nomoa, olketa minim wanem Paul talem taem hem sei: “Evriwan sin.” (Rom. 3:23) Bat taem iumi duim ministry, maet iumi meetim staka wea no minim wanem Paul talem.

¹¹ Long samfala kantri, pipol tingse taem olketa born, olketa no kasem sin from eniwan. Hem tru, maet olketa luksavve olketa savve duim mistek, garem samfala nogud wei, and maet duim samfala nogud samting bifor. And olketa luksavve olketa narawan tu duim sem samting. Bat olketa no barava minim why olketa duim olketa samting hia. Long samfala languis, sapos iu talem narawan hem sin, maet pipol tingse iu kolem datfala man wanfala criminal or man wea no obeyim law. Tru tumas, man wea big kam long ples wea pipol garem kaen tingting olsem maet tingse hem no born sin and no minim wanem Paul talem.

12. Why nao staka pipol no bilivim iumi evriwan sin?

¹² Nomata long olketa kantri wea pipol sei olketa Christian, staka no bilivim hao iumi born sin. Why nao olsem? Nomata olketa go long church samfala taem, olketa tingse story wea Bible talem abaotem Adam and Eve hem no tru. Olketa narawan big kam long ples wea pipol no worshipim God. From olketa no bilivim God wea Barava Hae hem stap, olketa no minim hao God markem olketa standard for olketa man and wei for no followim olketa standard hia mekem man sin. Olketa olsem samfala pipol long first century wea Paul sei olketa “no garem hope” and “no savve long God.”​—Eph. 2:12.

13, 14. (a) Wanem nao wanfala reason wea pruvim hao olketa wea no biliv long God and long sin no garem eni excuse? (b) Wei for no biliv long God and long sin hem mekem staka pipol for duim wanem?

¹³ Long leta wea Paul raetem for olketa long Rome, hem talem tufala reason why pipol hia no garem eni excuse for no biliv long God. Firstfala reason, olketa samting wea God wakem showimaot God hem stap. (Readim Romans 1:19, 20.) Long leta wea Paul raetem for olketa Hebrew taem hem stap long Rome, hem sei: “Evri haos man nao wakem, bat man wea wakem evri samting hem God.” (Heb. 3:4) Datfala scripture showimaot wanfala man stap wea wakem evri samting long universe.

¹⁴ So Paul pruvim hao eniwan wea worshipim olketa idol nomata hem wanfala Israelite, olketa “no garem eni excuse for no biliv long God.” Pipol wea laek duim dirty samting tu, olsem olketa woman wea no laek sleep witim man bat laek sleep witim woman nomoa, no garem eni excuse tu for no biliv long sin. (Rom. 1:22-27) From olketa duim kaen samting olsem, Paul talem hao “olketa Jew and pipol bilong Greece, evriwan sin.”​—Rom. 3:9.

Samting wea Showimaot Iumi Sin

15. Wanem samting nao iumi evriwan garem, and datwan mekem iumi for no duim wanem?

¹⁵ Leta wea Paul raetem for olketa long Rome showimaot tu nara reason why pipol shud luksavve olketa sin and needim help for stretem datfala problem. Paul raet abaotem Law wea God givim for olketa Israelite. Hem sei: “Evriwan wea stap anda long law and wea sin, bae law nao judgem olketa.” (Rom. 2:12) Paul gohed for storyim hao pipol wea no Jew “duim samting wea law bilong God talem” nomata olketa no savve long datfala Law. Olketa savve hem no stret for durong witim olketa long famili, killim man dae, or steal! Paul talem reason why olketa no duim kaen samting olsem. Olketa garem konsens.​—Readim Romans 2:14, 15.

16. Why nao wei for garem konsens no minim man bae no sin?

¹⁶ Nomata olsem, for garem konsens no minim man bae followim konsens bilong hem evritaem. Wanem hem happen long olketa Israelite showimaot datwan. Olketa Israelite garem konsens and Law wea God givim wea sei man mas no steal and no duim adultery. Nomata olsem, olketa no followim konsens bilong olketa and Law bilong Jehovah. (Rom. 2:21-23) Olketa duim olketa nogud samting wea showimaot olketa sin. Olketa no followim olketa standard bilong God and no duim wanem hem laekem. Datwan barava spoelem wei wea olketa fren witim Jehovah.​—Lev. 19:11; 20:10; Rom. 3:20.

17. Long leta wea Paul raetem for olketa long Rome, wanem encouragement nao iumi kasem?

¹⁷ Wanem iumi lanem from leta wea Paul raetem for olketa long Rome maet mekem iumi for tingim nogud samting wea iumi evriwan kasem. Bat Paul gohed for storyim gud samting. Hem raetem sem toktok wea David tu talem long Psalm 32:1, 2. Paul sei: “Olketa wea God forgivim sin bilong olketa and samting wea olketa duim wea hem no stret, bae hapi. Man wea Jehovah no tingim moa sin bilong hem bae hapi.” (Rom. 4:7, 8) Tru tumas, God followim olketa raeteous standard bilong hem and mekem wei for iumi kasem forgiveness for olketa sin bilong iumi.

Pipol Need for Herem Gud Nius Abaotem Jesus

18, 19. (a) Wanem gud nius nao Paul mekhae long hem long leta wea hem raetem for olketa long Rome? (b) Wanem nao iumi mas luksavve long hem mekem iumi kasem olketa blessing taem Kingdom hem rul?

¹⁸ Maet iu sei: “Wanem God duim hem barava gud nius!” Datwan hem tru. Hem mekem iumi for tingim gud nius wea Paul mekhae long hem long leta wea hem raetem for olketa long Rome. Hem sei: “Mi no shame for talemaot datfala gud nius. Gud nius hia hem showimaot paoa bilong God and hem savve sevem eniwan wea garem faith.”​—Rom. 1:15, 16.

¹⁹ Datfala gud nius hem abaotem waka wea Jesus duim insaed plan bilong God. “Followim wanem [Paul] talemaot long datfala gud nius,” hem luk forward long taem wea God bae “iusim Christ Jesus for judgem olketa man long samting wea olketa duim haed.” (Rom. 2:16) Taem Paul talem datwan, hem no ting smol long “kingdom bilong Christ and bilong God” or wanem Kingdom bilong God bae duim. (Eph. 5:5) Bat Paul storyim hao for iumi laef and enjoyim olketa blessing taem Kingdom hem rul, iumi mas luksavve (1) hao long tingting bilong God iumi sin and (2) for God forgivim sin bilong iumi, iumi mas showimaot faith long Jesus Christ. Taem man minim and acceptim olketa samting hia wea join witim plan bilong God and luksavve hao diswan mekem hem garem hope for future, datwan bae mekem hem for sei, “Tru tumas, diswan hem gud nius!”

20, 21. (a) Taem iumi duim ministry, why nao iumi shud evritaem tingim datfala gud nius abaotem Jesus Christ? (b) Wanem gud samting nao iumi savve kasem?

²⁰ Taem iumi duim ministry, iumi shud evritaem tingim datfala gud nius abaotem Jesus Christ. Paul storyim profesi bilong Isaiah abaotem Jesus. Hem sei: “No eniwan wea garem faith long hem bae sorre.” (Rom. 10:11; Isa. 28:16) Maet disfala message abaotem Jesus hem no niu samting for olketa wea savve long wanem Bible talem abaotem sin. Bat for olketa narawan, maet disfala message hem niu samting, from olketa no savve long datwan bifor or pipol long ples bilong olketa no bilivim datwan. Taem olketa hia start for biliv long God and trustim wanem Bible talem, bae iumi need for explainim long olketa waka bilong Jesus insaed plan bilong God. Long next study, bae iumi lanem samfala important samting abaotem gud nius long Romans chapter 5. Datfala study savve helpem iu long ministry.

²¹ Hem nambawan samting for helpem pipol wea hambol for minim gud nius wea Paul mekhae long hem long leta wea hem raetem for olketa long Rome. Datfala gud nius “hem showimaot paoa bilong God and hem savve sevem eniwan wea garem faith.” (Rom. 1:16) Iumi bae kasem reward and lukim olketa narawan agree witim toktok bilong Isaiah wea Paul talem long Romans 10:15. Hem sei: “Leg bilong olketa wea talemaot gud nius abaotem olketa gudfala samting hem luk naes tumas!”​—Isa. 52:7.

[Footnote]

Waswe, Iu Tingim Yet?

• Leta wea Paul raetem for olketa long Rome mekhae long wanem gud nius?

• Wanem tru samting nao iumi need for helpem pipol minim?

• Hao nao “gud nius abaotem Christ” savve mekem iumi and olketa narawan kasem olketa blessing?

[Blurb long page 8]

Gud nius wea Paul mekhae long hem, hem abaotem waka wea Jesus duim insaed plan bilong God

[Piksa long page 9]

Iumi evriwan born sin!