Spiritual Samting wea Iumi Kasem From Jehovah

1. Wanem nao Jehovah givim long olketa man for helpem olketa?

JEHOVAH hem stap for olowe, and hem talem iumi wanem iumi mas duim mekem iumi savve laef olowe. Samting wea Jehovah talem iumi for duim hem no change. Bible sei: “Toktok bilong Jehovah hem stap for olowe.” (1 Pet. 1:23-25) Iumi tinghae long wei wea Jehovah givim iumi disfala important information insaed long Bible!

2. God laekem iumi for savve long wanem samting abaotem hem?

² Jehovah laekem iumi evriwan for savve long nem bilong hem. Firstaem wea Bible talem nem bilong God, Jehovah, hem long story abaotem taem wea hem wakem skae and earth. (Gen. 2:4) Taem Jehovah raetem Tenfala Komandment long olketa ston, hem raetem tu nem bilong hem. Olsem example, firstfala komandment hem start witim disfala toktok: “Mi nao God bilong iu, Jehovah.” (Ex. 20:1-17) Devil hem trae for finisim Bible mekem iumi no savve long God and nem bilong Hem. Bat Jehovah no letem datwan for happen.—Ps. 73:28.

3. Wanem moa God laekem iumi for lanem from Bible?

³ Pipol bilivim staka samting abaotem God wea no stret. Bat Jehovah laekem iumi evriwan for savve long truth. Iumi hapi bikos Bible talem iumi wanem nao hem tru. (Readim Psalm 43:3, 4.) Hem olsem iumi garem laet bat pipol long world stap long darkness.—1 John 1:6, 7.

IUMI GAREM SPESOL SAMTING FROM JEHOVAH

4, 5. Wanem spesol privilege nao iumi kasem long 1931?

⁴ Maet pipol wea stap long sem ples garem semkaen wei, kastom, and living wea olketa kasem from olketa grani bilong olketa. Long sem wei tu, iumi Olketa Jehovah’s Witness kasem samfala spiritual samting from Jehovah. Jehovah helpem pipol bilong hem for minim Bible, olketa tru samting abaotem Hem, and olketa plan bilong hem. Iumi kasem tu spesol privilege for garem nem bilong Hem.

⁵ Iumi kasem nem bilong iumi long 1931, long wanfala convention long Colombus, Ohio, long America. Olketa printim tufala leta “JW” long program bilong datfala convention. Wanfala sista sei olketa brata and sista tingse tufala leta hia minim “Just Wait” or “Just Watch.” Samfala guess stret and sei tufala leta hia minim “Jehovah’s Witnesses.” Bifor datfala convention, nem bilong iumi hem Olketa Bible Student, bat long datfala spesol tok long July 26, 1931, evriwan long audience agree for garem nem, Olketa Jehovah’s Witness. Evriwan hapi for kasem datfala niu nem wea kam from Bible. (Readim Isaiah 43:12.) Wanfala brata sei: “Hard for mi forgetim bigfala shout and klap bilong evriwan.” No eni narawan long world laek for garem datfala nem, bat God letem iumi for garem datfala spesol nem for winim 80 year finis.

6. Wanem nao narafala samting wea iumi kasem?

⁶ Narafala samting wea iumi kasem hem information from Bible abaotem pipol wea worshipim God bifor, wea hem stret and wea savve helpem iumi. Olsem example, Bible talem iumi samting wea happen long Abraham, Isaac, and Jacob. Masbi plande taem thrifala hia and famili bilong olketa story abaotem wanem olketa mas duim for mekem Jehovah hapi. Iumi sure kaen story olsem nao helpem Joseph for no durong witim waef bilong Potiphar. (Gen. 39:7-9) Long first century, olketa Christian sharem information abaotem God witim narawan. Paul storyim long kongregeson long Corinth samting wea Jesus teachim long hem abaotem Evening Kaikai Bilong Lord. (1 Cor. 11:2, 23) Evri samting hia stap long Bible for teachim iumi hao for worshipim God. (Readim John 4:23, 24.) Tru nao, Bible hem for evri man, bat iumi pipol bilong Jehovah barava tinghae long hem.

7. Wanem promis nao Bible talem for iumi?

⁷ Jehovah helpem pipol bilong hem long distaem tu. (Ps. 118:7) Insaed long olketa pablikeson bilong iumi, iumi savve read abaotem samting wea hem duim for protectim pipol bilong hem. Diswan mekem iumi feel sef, nomata taem pipol persecutim iumi. Promis long Bible hem sei eni samting wea pipol duim for spoelem iumi, bae no win. And sapos olketa narawan trae for accusim pipol bilong God long kot, gogo bae olketa no win tu, bikos iumi duim samting wea Jehovah sei hem raeteous. (Isa. 54:17) No eni samting wea Satan duim savve spoelem iumi for olowe.

8. Wanem nao bae iumi storyim long disfala study and long next study?

⁸ Satan hem trae for finisim Bible, stopem pipol for no savve long nem bilong Jehovah, and for haedem truth. Bat Satan hem no win. Long disfala study and long next wan tu, bae iumi storyim 3-fala samting. (1) Wanem God duim for protectim Bible. (2) Wanem Jehovah duim for mek sure pipol savve long nem bilong hem. (3) Wanem God duim mekem iumi fit for savve long truth distaem.

JEHOVAH PROTECTIM BIBLE

9-11. Wanem nao Jehovah duim for protectim Bible?

⁹ Staka pipol trae for finisim Bible, bat Jehovah protectim datwan. Wanfala Catholic Encyclopedia talem hao long 1229, olketa bigman bilong church long France stopem pipol for no iusim Bible long languis bilong olketa seleva. Long 1234, long Spain, olketa bigman bilong church duim sem samting. Long 1559, Pope tu stopem pipol for no printim or ownim Bible long languis bilong olketa seleva sapos Catholic church no letem.

¹⁰ Nomata pipol trae for finisim Bible, Jehovah no letem olketa for duim datwan. Long samting olsem 1382, John Wycliff wakem firstfala Bible transleison long English. William Tyndale tu hem transleitim Bible long English. From hem duim datwan, olketa killim hem dae long 1536. Olketa taengem hem long wanfala timba post, and hem singaot and sei: “Lord, openem eye bilong king bilong England.” Then olketa skwisim nek bilong hem and bonem body bilong hem long fire.

¹¹ Long year 1535, Miles Coverdale tu hem transleitim Bible long English. Long samfala part, Coverdale iusim Bible wea Tyndale transleitim and hem transleitim olketa nara part from Latin languis and from Bible wea Martin Luther transleitim long German languis. Distaem, iumi garem Niu World Bible, Matthew—Revelation. Iumi hapi for garem disfala transleison wea hem klia, stret, and isi for iusim long preaching waka bilong iumi. Nomata Satan or eni man, olketa no savve finisim Bible.

JEHOVAH MEK SURE IUMI SAVVE LONG NEM BILONG HEM

12. Hao nao New World Translation helpem pipol for savve long nem bilong Jehovah?

¹² Nomata pipol aotem nem bilong Jehovah from staka Bible, Jehovah mek sure nem bilong hem stap long samfala Bible. Taem olketa brata wakem New World Translation, olketa putim bak nem bilong God, Jehovah, long evri ples wea olketa man wea raetem Bible long firstaem olketa putim datfala nem. Long olketa Hebrew Scripture, datfala nem hem stap 6,973 taem, and 237 taem long olketa Christian Greek Scripture. Distaem New World Translation hem long winim 116 languis, and olketa printim winim 178,545,862 copy.

13. Wanem nao showimaot pipol savve long nem bilong God start kam long taem bilong Adam and Eve?

¹³ Firstfala man and woman, Adam and Eve, savve long nem bilong Jehovah and tufala iusim datfala nem. Noah tu iusim datfala nem. Hem sei: “Praisem Jehovah, God bilong Shem.” (Gen. 4:1; 9:26) God iusim nem bilong hem taem hem story witim pipol. Hem sei: “Mi nao Jehovah. Hem nao nem bilong mi. Iufala mas mekhae long mi nomoa.” God hem sei tu: “Mi nao Jehovah, and no eniwan moa hem stap. No eni nara God hem stap.” (Isa. 42:8; 45:5) Jehovah mek sure pipol evriwea long earth savve long nem bilong hem. Hem bigfala privilege for iumi iusim datfala nem, Jehovah, and for iumi olketa Witness bilong hem! Hem olsem iumi sei: “Bae iumi praisem nem bilong God bilong iumi.”—Ps. 20:5.

14. Waswe, nem bilong God hem stap long Bible nomoa? Storyim samfala example.

¹⁴ Nem bilong God no stap long Bible nomoa. Olsem example, nem bilong hem stap long datfala Moabite Ston, wea olketa faendem long Dhiban (Dibon), wea hem 21 kilometer east long Dead Sea. Raeting long datfala ston hem storyim King Omri bilong Israel, and hem storyim tu samting wea King Mesha bilong Moab talem abaotem taem wea hem faetem Israel. (1 Ki. 16:28; 2 Ki. 1:1; 3:4, 5) Datfala Moabite Ston garem nem bilong God, wea olketa raetem long fofala Hebrew leta YHWH, wea olketa kolem Tetragrammaton. Datfala Tetragrammaton hem stap staka taem tu long Lachish Letters, wea hem nao olketa pis clay wea olketa faendem long Israel.

15. Wanem nao Septuagint, and why nao olketa wakem datwan?

¹⁵ Winim 2,000 year go finis, olketa transleitim olketa Hebrew Scripture long Greek languis. Olketa kolem datfala transleison Septuagint. Why nao olketa mas transleitim olketa Hebrew Scripture long Greek languis? Olketa Jew stap prisoner long Babylon for 70 year finis. Taem olketa kamap free long year 537 B.C.E., samfala disaed for stap long Babylon and no go bak long Israel. Bat gogo, plande Jew muv go for stap long Alexandria, long Egypt, wea pipol story long Greek languis. Olketa Jew hia needim olketa Hebrew Scripture wea olketa transleitim long Greek languis. Samfala copy bilong datfala Greek Septuagint garem nem bilong God long Hebrew raeting.

16. Storyim wanfala buk wea iusim nem bilong God long year 1640.

¹⁶ First buk wea olketa wakem long olketa British colony long America hem wanfala transleison bilong Psalms wea garem nem bilong God insaed. Olketa transleitim diswan from Hebrew languis go long English. Nem bilong diswan hem Bay Psalm Buk and olketa printim olketa first copy long 1640. Wanfala ples wea olketa iusim nem bilong God, and spellim olsem Iehovah, hem long Psalm 1:1, 2. Datfala psalm hem sei gudfala man hem no followim advaes bilong nogud pipol, bat hem laekem tumas “law bilong Iehovah.” For kasem moa information abaotem nem bilong God, lukim datfala brochure, The Divine Name That Will Endure Forever.

JEHOVAH MEK SURE IUMI FIT FOR SAVVE LONG TRUTH

17, 18. (a) Wanem nao truth? (b) Wanem nao olketa “tru teaching wea [iumi] kasem from datfala gud nius”?

¹⁷ Iumi hapi tumas for worshipim ‘Jehovah, wea hem evritaem talem tru samting.’ (Ps. 31:5) Wanem nao datfala toktok “tru samting” or “truth” hem minim? Long olketa languis wea olketa raetem Bible long hem firstaem, hem savve minim samting wea tru, stret, and wea iumi savve trustim.

¹⁸ Jehovah mek sure iumi fit for savve long truth distaem. And hem gohed helpem iumi for savve long olketa tru teaching. (2 John 1, 2) Iumi savve long diswan bikos long samting wea Proverbs 4:18 hem talem. Hem sei: “Road bilong olketa wea raeteous hem olsem laet from sun wea kamap moa braet go kasem big daylaet.” Jesus prea long God olsem: ‘Toktok bilong iu hem tru.’ (John 17:17) Insaed long Bible hem olketa “tru teaching wea [iumi] kasem from datfala gud nius,” wea hem nao evri teaching wea iumi olketa Christian bilivim. (Gal. 2:14) Wanem nao samfala tru teaching hia? Hem truth abaotem nem bilong Jehovah, rul bilong hem, sakrifaes bilong Jesus, resurrection, and Kingdom. Distaem bae iumi storyim wanem God duim for protectim olketa tru teaching, nomata Satan hem trae for haedem.

JEHOVAH NO LETEM SATAN HAEDEM TRUTH

19, 20. Hu nao Nimrod, and wanem nao olketa man trae for duim taem hem rul?

¹⁹ Bihaen long Flood, wanfala man wea savve tumas for hunting wea nem bilong hem Nimrod, hem againstim Jehovah. (Gen. 10:9) From Nimrod againstim Jehovah God, hem duim nao wanem Satan hem laekem. Nimrod hem olsem olketa wea againstim Son bilong God. Jesus hem sei olsem long olketa: “Devil nao dadi bilong iufala and iufala laek for duim samting wea dadi bilong iufala laekem.” Hem “no gohed followim samting wea tru.”—John 8:44.

²⁰ Nimrod hem rul ovarem Babel and olketa nara taon wea stap midolwan long Tigris River and Euphrates River. (Gen. 10:10) Maet hem nao start for wakem datfala taon, Babel, and taoa bilong Babel long samting olsem 2269 B.C.E. Jehovah no laekem olketa man for stap long wanfala ples nomoa, bat pipol wea wakem Babel sei: “Kam, iumi wakem wanfala taon and wanfala taoa wea hae go kasem skae, mekem iumi garem bignem, and mekem iumi stap long hia nomoa and no long eni ples moa long earth.” From God “mekem pipol long earth story long olketa difren languis,” narawan no minim toktok bilong narawan, gogo olketa no fit for wakem datfala taoa. So olketa lusim Babel and go stap long olketa nara ples. (Gen. 11:1-4, 8, 9) Goal bilong Satan hem for finisim tru worship and mekem evriwan worshipim hem. Bat Jehovah protectim tru worship, and distaem staka pipol start for worshipim hem.

21, 22. (a) Why nao hem stret for sei no enitaem false religion klosap finisim tru worship? (b) Wanem nao bae iumi storyim long next study?

²¹ No enitaem false religion klosap finisim tru worship. Why nao hem stret for sei olsem? Bikos Nambawan Teacher bilong iumi, Jehovah, hem mek sure iumi garem Bible, iumi savve long nem bilong hem, and iumi savve long truth. (Isa. 30:20, 21) Taem iumi worshipim God long stretfala wei, iumi savve barava hapi. Bat iumi mas bilivim nomoa olketa tru teaching, and followim direction wea iumi kasem from holy spirit bilong Jehovah.

²² Long next study, bae iumi storyim hao samfala religion start for teachim olketa laea samting abaotem God. Bae iumi lanem hao olketa samting hia no kam from Bible. And bae iumi lukim wei wea Jehovah blessim iumi taem hem givim iumi tru information abaotem hem. Iumi tinghae long olketa spesol samting hia wea iumi kasem from Jehovah.