Waswe, Iu Savve Duim Moa Samting for Warnim Pipol?

Wanfala movie wea no garem saond hem garem title A Trip Down Market Street. Pipol interest tumas for lukim disfala movie wea showim laef bilong pipol long datfala taon San Francisco, long U.S.A., long start bilong mek-20 century. Olketa wea wakem datfala movie taengem wanfala movie camera front long wanfala cable car and tekem movie taem datfala cable car go followim road. Samfala samting insaed datfala movie hem olketa wagon wea horse pullim, olketa car bilong datfala taem, pipol wea go shopping, and olketa boy wea salem niuspepa.

Samting wea mekem man wea lukim disfala movie feel sorre hem bikos luk olsem olketa tekem datfala movie long April 1906, just bifor wanfala nogud earthquake and fire hem happen long April 18. Datwan killim dae plande thousand pipol and distroem big haf bilong datfala taon. Maet samfala pipol wea insaed datfala movie olketa dae long datfala earthquake. Scott Miles wea hem grani bilong wanfala man wea tekem datfala movie hem sei: “Mi lukim pipol insaed datfala movie wea nating savve wanem nao klosap for happen, and datwan mekem man sorre long olketa.”

Iumi savve comparem datwan witim samting wea klosap for happen. Iumi tu feel sorre long olketa pipol distaem. Olketa duim nomoa wanem olketa duim evriday, and nating savve klosap nao disfala world bae finis. No eniwan savve warnim narawan bifor earthquake hem happen, bat iumi garem lelebet taem yet for warnim pipol abaotem judgment day bilong Jehovah. Maet iu markem taem evri week for preach long haos tu haos, bat waswe, iu savve duim moa samting for warnim pipol?

JESUS EVRITAEM WILLING AND REDI FOR PREACH

Jesus hem nambawan example bikos hem evritaem willing and redi for preach. Hem preach long evriwan wea hem meetim. Hem preach long man wea tekem tax wea hem meetim long road, and long wanfala woman wea hem meetim taem hem rest long wanfala well long midolday. (Luke 19:1-5; John 4:5-10, 21-24) Wantaem Jesus plan for rest lelebet, bat taem hem lukim chance for teachim pipol, hem willing for duim datwan. From hem sorre long pipol, hem traem best for story long olketa. (Mark 6:30-34) Jesus ting long waka bilong hem for preach olsem barava important samting. Hao nao samfala distaem followim example bilong hem?

OLKETA IUSIM EVRI CHANCE

Melika hem stap long wanfala building wea garem security. Staka student from nara kantri tu stap long datfala sem building. Hem tinghae long chance wea hem garem for storyim olketa spiritual samting taem hem meetim olketa student hia and olketa narawan wea stap long datfala building. Hem sei: “Mi ting long diswan olsem territory bilong mi.” Evritaem Melika garem olketa pablikeson long difren languis long basket bilong hem, and plande pipol hapi for tekem olketa tract and magasin. Hem storyim long olketa tu abaotem jw.org Web site bilong iumi long Internet and hem startim samfala Bible study.

Sonia tu lukaotem eni chance for preach long pipol. Hem waka long wanfala clinic and hem garem goal for preach long evri wakfren bilong hem. Firstaem, hem trae for savve long wanem nao olketa wakfren wanwan interest long hem, and hao hem savve helpem olketa. Then hem iusim taem for lunch for sidaon witim olketa wanwan and storyim olketa spiritual samting. From Sonia duim olsem, hem startim tufala Bible study. Hem garem plan tu for iusim samfala brek taem for story witim olketa wea weit for lukim doctor.

MEKIUS LONG CHANCE WEA IU GAREM

Wanfala man wea no dae long datfala earthquake long 1906 hem sei “no eni disaster long nara province or taon hem winim datwan.” Bat klosap nao evri disaster bae smol nomoa sapos iumi comparem witim day wea God bae panisim “olketa wea no savve long [Hem].” (2 Thess. 1:8) Jehovah laekem tumas for pipol changem tingting and heart bilong olketa and obeyim warning wea olketa Witness bilong hem preach abaotem.—2 Pet. 3:9; Rev. 14:6, 7.

Iu garem privilege for helpem pipol luksavve iumi stap long olketa last day and for helpem olketa no duim nomoa wanem olketa seleva laekem mekem olketa savve worshipim Jehovah. (Zeph. 2:2, 3) Waswe, iu savve iusim evri chance for preach long olketa wakfren, neiba, and nara pipol wea iu meetim evriday? Waswe, bae iu duim moa samting for warnim pipol?