Subject wea Mekem Pipol Konfius

PIPOL garem enikaen tingting abaotem laef and dae. Samfala tingse bihaen olketa dae bae olketa change go long difren samting, or go stap long nara ples. Olketa narawan tingse taem olketa dae bae olketa born moa and garem difren laef. Bat samfala moa tingse taem man dae datwan hem end bilong evri samting.

Maet biliv bilong iu abaotem diswan hem difren bikos iu followim wanem famili bilong iu bilivim, or wanem pipol long ples bilong iu bilivim. From pipol garem staka difren tingting abaotem samting wea happen long man taem hem dae, waswe, iumi savve faendem truth abaotem disfala subject long eni ples, or from eniwan?

For staka handred year olketa bigman bilong religion teachim pipol abaotem wei wea soul bilong man no savve dae. Pipol wea insaed olketa bigfala religion olsem religion wea sei olketa Christian, Hindu, Jew, Muslim, and samfala religion moa, evriwan hia bilivim soul bilong man no savve dae. Olketa sei soul lusim body taem man dae and kamap wanfala spirit. Bat olketa Buddhist bilivim man savve born moa staka taem, go kasem taem hem kasem Nirvana, wea diswan minim hem free nao from wei for safa.

Olketa teaching olsem mekem staka pipol long world bilivim taem man dae, bae hem go stap long narafala ples. Staka pipol tingse dae hem important part long laef and hem will bilong God for olketa man. Bat wanem nao Bible talem abaotem disfala subject? Plis readim nextfala article. Maet bae iu sapraes long wanem Bible talem abaotem diswan.