Olketa Nogud Samting​—Waswe, Hem Panis From God?

LEFT LEG BILONG LUZIA DAE. Taem hem smol gele hem kasem poliomyelitis. Diswan hem sik wea spred kwiktaem, and hem spoelem nervous system bilong body. Taem Luzia 16 year, woman wea hem waka for hem sei, “God nao panisim iu and mekem iu kasem polio bikos iu no obey and no respectim mami bilong iu.” Staka year bihaen, Luzia still tingim hao hem feel nogud tumas taem woman hia talem datwan.

TAEM DAMARIS FAENDAOT HEM GAREM BRAIN CANCER, dadi bilong hem sei: “Ating iu duim eni rong samting nao diswan kasem iu! Dastawe God panisim iu.” Damaris feel nogud tumas long wanem dadi bilong hem talem.

From bifor kam pipol bilivim sik hem panis from God. Buk Manners and Customs of Bible Lands, sei pipol long taem bilong Christ bilivim “samting wea kosim sik hem sin bilong man, or sin bilong dadi and mami bilong hem, and hem panis from God.” Buk Medieval Medicine and the Plague sei long olketa year start long 500 CE kasem 1500 CE, “samfala bilivim nogud sik wea olketa kolem plague hem panis from God for sin bilong pipol.” So waswe, taem staka million pipol long Europe dae from sik hia, God nao panisim olketa for sin bilong olketa? Or waswe, infection bilong bacteria nao kosim sik hia, wea hem nao olketa scientist faendaot bihaen? Maet samfala laek savve, waswe, hem tru God iusim sik for panisim pipol for sin bilong olketa?a

TINGIM DISWAN: Sapos God iusim sik and nogud samting for panisim pipol, why nao Jesus healim pipol wea sik? Sapos datwan hem tru, wanem Jesus duim hem againstim justice and raeteous standard bilong God, iaman? (Matthew 4:23, 24) Hard tumas for Jesus againstim wanem God duim. Jesus sei: “Mi evritaem duim samting wea hem laekem” and, “mi duim samting wea Dadi talem long mi.”—John 8:29; 14:31.

Bible talem tru samting. Jehovah God “no save duim eni nogud samting.” (Diutronomi 32:4) Olsem example, God bae no mekem wanfala aeroplane foldaon bikos hem laek panisim samwan insaed aeroplane hia bat long semtaem staka handred pipol wea innocent tu olketa dae! Abraham, wea hem faithful sei hard tumas for God wea raeteous “kilim dae olketa nogud pipol tu wetem olketa gudfala pipol.” Hem sei “hemi no wei blong [God] ya.” (Jenesis 18:23, 25) Bible sei tu “God hemi no save duim eni rong samting.”—Job 34:10-12.

WANEM IUMI LANEM LONG BIBLE

Taem nogud samting kasem iumi, datwan no bikos God panisim iumi for eni sin wea iumi duim. Jesus storyim klia diswan taem hem and olketa disaepol lukim wanfala man wea born blind. “Olketa disaepol askem Jesus: ‘Teacher, sin bilong hu nao hem mekem disfala man for blind taem hem born? Waswe, hem sin bilong dadi and mami bilong hem or sin bilong hemseleva?’ Jesus sei: ‘Hem no sin bilong disfala man or sin bilong dadi and mami wea mekem hem blind. Bat diswan hem for mekem pipol lukim samting wea God savve duim.’”—John 9:1-3.

From staka pipol long datfala taem garem rong tingting abaotem diswan, masbi olketa disaepol sapraes taem Jesus sei hem no sin bilong man hia or bilong dadi and mami nao mekem hem blind. Taem Jesus mekem blind man hia lukluk moa, hem pruvim tingting bilong pipol wea sei God iusim nogud samting for panisim man hem rong. (John 9:6, 7) Olketa wea garem big sik distaem hapi for savve sik hia hem no panis from God.

Bible encouragem iumi

• “No eniwan savve switim God for duim nogud samting and God tu no switim eniwan for duim nogud samting.” (JAMES 1:13) Tru nao, klosap nao God bae finisim olketa “nogud samting” wea spoelem olketa man for staka handred year olsem sik, pain, and dae.

• Jesus Christ “healim evriwan wea sik.” (MATTHEW 8:16) Taem hem healim evriwan hia, datwan showimaot wanem Kingdom bilong God bae duim taem hem rul ovarem full earth.

• “Hem [God] bae draem evri tias long eye bilong olketa. No eniwan bae dae and no enitaem bae pipol sorre or krae or feelim pain tu. Olketa samting wea happen bifor hem nomoa nao.”—REVELATION 21:3-5.

HU NAO KOSIM OLKETA NOGUD SAMTING?

So, why nao iumi olketa man kasem staka nogud samting and safa tumas? For staka handred year finis olketa man no savve long ansa for kwestin hia. Sapos God no kosim olketa samting hia, hu nao kosim? Next article bae ansarem olketa kwestin hia.