Chapter 1 (Mek-tu haf)
Organized to Do Jehovah’s Will, pages 7-10
ORGANIZATION BILONG JEHOVAH WEA STAP LONG HEVEN
Profet Isaiah, Daniel, and Ezekiel lukim long olketa vision organization bilong Jehovah wea stap long heven. (Isa., chap. 6; Ezek., chap. 1; Dan. 7:9, 10) Aposol John tu kasem vision abaotem disfala arrangement long heven and hem givim iumi lelebet idea abaotem diswan long buk bilong Revelation. Hem lukim Jehovah sidaon long wanfala nambawan throne witim olketa angel wea singaot: “Holy, holy, holy nao Jehovah God, datfala Olmaeti wan, wea hem stap bifor and wea stap distaem and wea bae kam.” (Rev. 4:8) John lukim tu ‘wanfala lamb hem stand klosap long throne.’ Hem nao Lamb bilong God, Jesus Christ.—Rev. 5:6, 13, 14; John 1:29.
Vision bilong John showimaot hao hed bilong organization bilong Jehovah long heven hem Jehovah God wea sidaon long throne bilong hem. First Chronicles 29:11, 12 hem sei olsem abaotem hem and haefala position bilong hem: “Bilong iu nao, O Jehovah, hem wei for nambawan and maeti paoa and wei for luk naes tumas and bigfala honor and respect; from evri samting long heven and long earth hem bilong iu. Datfala kingdom hem bilong iu, O Jehovah, wea iu nao liftim iuseleva hae olsem hed ovarem evri samting. Iu nao givim riches and glory, and iu nao bossim evri samting; and insaed hand bilong iu hem paoa and strong, and hand bilong iu fit for mekem samting kamap nambawan and givim strong long evriwan.”
From hem waka witim Jehovah, Jesus Christ garem haefala position long heven and Jehovah givim hem paoa ovarem staka samting. Tru nao, God “putim evri samting anda long leg bilong hem, and mekem hem hed ovarem evri samting long kongregeson.” (Eph. 1:22) Aposol Paul hem sei olsem abaotem Jesus: “God givim hem wanfala barava hae position and hem kaen tumas for givim hem datfala nem wea winim evri narafala nem, mekem long nem bilong Jesus evriwan long heven and long earth and andanit long graon mas nildaon, and evri tongue mas talemaot Jesus Christ nao hem Lord wea datwan nao givim glory long God wea hem Father.” (Phil. 2:9-11) Dastawe, iumi barava fit for trustim hao Jesus Christ bae lead long raeteous wei.
Long wanfala vision, profet Daniel lukim Datwan from taem bifor kam hem sidaon long throne bilong Hem and olketa angel wea namba bilong olketa hem “plande thousand thousand gohed for servem hem, and ten thousand taems ten thousand gohed for standap front long hem.” (Dan. 7:10) Bible kolem disfala army bilong olketa angel long heven “olketa spirit for duim pablik service, wea go aot for servem olketa wea bae kasem salvation.” (Heb. 1:14) Evri spirit hia organize long olketa difren position olsem ‘olketa king, lord, gavman, and olketa wea garem paoa.’—Col. 1:16.
Taem iumi ting raonem olketa difren part bilong organization bilong Jehovah long heven, iumi savve minim feeling bilong Isaiah taem hem kasem datfala vision wea hem “lukim Jehovah, wea sidaon long wanfala throne,” and “olketa seraph standap long ples antap long hem.” Isaiah hem sei: “Trabol for mi! From hem olsem mi nating savve toktok nao, bikos mi wanfala man wea lips bilong mi dirty, and mi stap midolwan long pipol wea lips bilong olketa dirty, from eye bilong mi barava lukim King nao, Jehovah bilong olketa army!” Tru nao, Isaiah barava tinghae and feel hambol taem hem luksavve long staka samting wea gohed insaed long organization bilong Jehovah. From diswan barava muvim hem, taem wanfala invitation kam from heven for duim wanfala spesol waka for talemaot olketa judgment bilong Jehovah, hem sei: “Mi long hia! Sendem mi.”—Isa. 6:1-5, 8.
From pipol bilong Jehovah luksavve and tinghae long organization bilong hem, olketa garem semkaen feeling olsem Isaiah. Taem disfala organization hem muv ahed, iumi willing and strong for trae for muv followim hem. Iumi duim best for showimaot iumi trustim organization bilong Jehovah distaem.
ORGANIZATION BILONG JEHOVAH HEM MUV AHED
Long chapter 1 long profesi bilong Ezekiel, hem storyim vision wea Jehovah raedem wanfala mamaeti chariot long heven. Disfala nambawan chariot hem piksarem datfala part bilong organization bilong Jehovah wea iumi no savve lukim. Taem Bible sei Jehovah raedem disfala chariot, datwan minim hem directim and iusim organization bilong hem for fitim gudfala samting wea hem bae duim.—Ps. 103:20.
Each wheel long disfala chariot garem moa wanfala wheel insaed long hem—big bilong olketa hem semsem and wei wea olketa join tugeta luk olsem wanfala ball. Dastawe Bible sei olketa wheel hia savve “rol go long fofala saed wea olketa garem.” (Ezek. 1:17) Olketa wheel hia savve stretawe tan go long eni difren wei bikos olketa wheel hem point long evri saed. Bat diswan no minim no eniwan kontrolem or givim direction for disfala chariot. Jehovah no letem organization bilong hem go olobaot nomoa. Ezekiel 1:20 hem sei: “Olketa go long ples wea spirit muvim olketa for go.” So Jehovah nao wan wea mekem organization bilong hem muv go long ples wea spirit bilong hem muvim hem for go. Kwestin wea iumi mas askem iumiseleva hem olsem, ‘Waswe, mi muv followim hem?’
Moa samting hem insaed long wei for muv followim organization bilong Jehovah winim wei for attendim olketa meeting and tekpart long field ministry nomoa. Main samting insaed long diswan hem for muv ahed and kamap moa strong long spiritual wei. Iumi mas “mek sure long olketa samting wea moa important” and savve gud long olketa niu information wea iumi kasem thru long arrangement bilong Jehovah for feedim iumi long spiritual wei. (Phil. 1:10; 4:8, 9; John 17:3) Iumi mas no forgetim tu hao pipol mas organize and waka gud tugeta for mekem wanfala organization gohed gud. So iumi mas luksavve hao hem barava important for iusim gud olketa spiritual and material samting wea Jehovah givim long iumi for duim waka bilong hem. Taem iumi muv followim chariot bilong Jehovah long heven, laef bilong iumi hem fitim message wea iumi talemaot.
Organization bilong Jehovah helpem iumi evriwan for muv ahed saed long wei for duim will bilong God. No forgetim hao Jehovah nao wan wea raedem datfala chariot long heven. So, wei for muv followim datfala chariot long heven showimaot iumi respectim Jehovah and trustim “ston” bilong iumi. (Ps. 18:31) Bible hem promis olsem: “Jehovah seleva bae givim strong long pipol bilong hem. Jehovah seleva bae blessim pipol bilong hem witim peace.” (Ps. 29:11) From iumi insaed long organization bilong Jehovah distaem, iumi kasem strong from hem and kasem peace wea hem givim long pipol bilong hem wea organize. Tru nao, bae iumi gohed for kasem olketa nambawan blessing taem iumi duim will bilong Jehovah distaem and for olowe.