Showimaot Interest—Long Wei for Preach Long Evri Difren Kaen Man
1 Long wanfala vision, aposol John lukim wanfala angel hem flae long skae, and hem talemaot gud nius bilong olowe long pipol bilong “evri nation and tribe and languis and pipol.” (Rev. 14:6) Waswe, iumi followim example bilong datfala angel long wei for preach long evri difren kaen man? Bat maet iumi laekem wankaen pipol and no mas interest long olketa nara pipol. Tingting wea iumi garem abaotem pipol iumi meetim savve affectim wei wea iumi storyim gud nius long olketa. Dastawe iumi mas showimaot trufala wei for kea abaotem pipol taem iumi preach long olketa wea garem difren living or kam from difren ples.
2 Tingim Territory Bilong Iu: Waswe, pipol from difren kantri or island stap long territory bilong iu? Iumi nao for duim samting firstaem for meetim and trae for savve gud long olketa. Wanem nao olketa needim, wari abaotem, laekem and no laekem, and tingting bilong olketa abaotem nara pipol? Traem best for mekem story bilong iu abaotem Kingdom hem fitim olketa. (1 Cor. 9:19-23) Olsem aposol Paul, iumi garem responsibility for sharem gud nius long evriwan long territory bilong iumi, and diswan minim tu, pipol from difren kantri, pipol wea garem difren kastom, pipol wea iusim difren languis, and pipol wea barava rich.—Rom. 1:14, ftn.
3 Bat, hao nao bae iu preach long man wea iusim difren languis? Iusim datfala buklet Gud Nius for Pipol Bilong Evri Nation. Hem gud tu for keepim long basket samfala tract or brochure long olketa languis wea pipol iusim long territory bilong iu. (Lukim July 2003 Kingdom Ministry Bilong Iumi, p. 4, par. 2-3.) Nara samting tu, samfala pablisa trae hard for lanem toktok for sei hello and simpol wei for startim story long olketa difren languis. Pipol savve tinghae tumas long wei wea man trae for story long languis bilong olketa nomata hem no barava savve gud, and diswan savve mekem olketa interest for herem gud nius.
4 Followim Example Bilong Jehovah: Taem iumi preach long pipol wea garem difren living, iumi followim example bilong God bilong iumi, Jehovah, wea no teksaed. Hem “will bilong hem nao for evri difren kaen man mas sev and kasem stretfala savve abaotem truth.”—1 Tim. 2:3, 4.