2007 “Followim Christ!” Distrik Convention Bilong Olketa Jehovah’s Witness
1, 2. (a) Long wanem wei nao Moses encouragem olketa long Israel for kasem gud samting from wei for hipap tugeta? (b) Wanem nao iumi mas plan for hem distaem?
1 Moses givim instruction for evriwan long Israel and olketa man long difren ples wea stap witim olketa for hipap tugeta evri sevenfala year, mekem olketa savve herem datfala Law. Why nao olsem? Mekem “olketa savve lisin and lane.” (Deut. 31:10-12) Jehovah lukim hao wei for hipimap pipol bilong hem long olketa bigfala grup olsem bae helpem olketa. Klosap nao pipol bilong Jehovah bae hipap for olketa thri-day “Followim Christ!” Distrik Convention.
2 Waswe, iu start plan for diswan finis, and storyim long boss hao iu needim taem off for kam long disfala convention? Waswe, iu savve helpem olketa Bible student and eni famili bilong iu wea no biliv for kam witim iu long disfala convention? Waswe, eniwan insaed long kongregeson wea iu savve helpem hem for attend? Waswe, iu plan for go long convention long narafala ples? Bae iu needim ples for stap? For iu redi, iu needim olketa information long hia.
3. (a) Hao nao Isaiah 25:6 hem fulfill distaem? (b) Wanem nao iumi luksavve long hem abaotem namba bilong pipol wea kam long Friday bilong convention, and wanem nao iumi wanwan savve duim?
3 Attendim Thrifala Day Evriwan: Jehovah givim plande spiritual kaikai long pipol bilong hem. (Isa. 25:6) Insaed diswan hem bigfala spiritual feast wea iumi kasem long olketa convention bilong iumi evri year. Samting wea iumi lukim nao hem wei wea namba bilong pipol wea kam long Friday hem no staka tumas. Putim goal for iu attendim and enjoyim thrifala day evriwan bilong convention wea organization bilong Jehovah hem readim for iumi! Sapos iu need for askem boss for no waka long olketa taem hia, bae hem gud for prea long Jehovah abaotem datwan. Taem iu savve long taem wea convention bilong iu bae kamap, “no fraet” for go story witim boss bilong iu. (1 Thess. 2:2; Neh. 2:4, 5) Maet hem gud for explainim long boss hao convention bilong iu evri year hem part long worship bilong iu. Maet wei wea iu duim diswan kwiktaem bae givim chance long boss bilong iu for changem samfala samting saed long waka mekem iu fit for attend.
4. Wanem nao iumi savve duim for redyim olketa Bible student and olketa famili member wea no biliv for kam long convention?
4 Redyim Olketa Bible Student and Famili Bilong Iu: Bae hem mekem iu hapi tumas sapos olketa Bible student bilong iu savve kam witim iu long convention, and for olketa lukim love wea olketa Christian brata and sista showimaot insaed “long big kongregeson”! (Ps. 22:25) No delay for storyim diswan long olketa, mekem olketa tu savve plan for attend. Storyim olketa gud samting wea iuseleva kasem taem iu go long olketa convention. Iu savve showim samfala long olketa video kaset bilong iumi long samfala convention bifor, olsem disfala video, United by Divine Teaching, mekem student hem savve wanem nao bae gohed long datfala taem. Talemaot tu olketa plan bilong iu long olketa famili member bilong iu wea no biliv. Maet olketa savve plan for kam lukluk long drama, or kam long eni day long thrifala day hia.
5, 6. (a) Hao nao iumi savve showimaot kaen fasin wea stap long 1 Timothy 6:18? (b) Wanem arrangement nao stap for helpem eniwan wea maet needim help for faendem ples for stap?
5 Helpem Olketa Brata and Sista Bilong Iu: Aposol Paul hem encouragem olketa Christian wea rich long material wei “for duim gud samting, for duim staka gudfala waka, for no hol bak, redi for share.” (1 Tim. 6:17, 18) Iumi savve showimaot olketa fasin hia wea Paul talem, sapos iumi tingim need bilong olketa wea olo, sik, olketa long full-taem service, olketa famili wea garem dadi or mami nomoa, or maet samfala moa insaed kongregeson wea needim help for go long convention. Main wan wea garem responsibility for helpem olketa nao, hem famili bilong olketa wea insaed truth, bat olketa elder and olketa narawan tu savve showimaot kaenfala fasin and help long eni samting wea olketa hia needim. —Gal. 6:10; 1 Tim. 5:4.
6 Sapos eniwan long kongregeson needim help for faendem ples for stap, Kongregeson Service Komiti nao shud disaedem sapos datfala pablisa bae kasem wanfala Spesol Need Rum Form (CO-5-SP). Bifor olketa givim disfala pepa long convention Rooming Department, olketa mas followim instruction wea stap long disfala pepa.
7, 8. (a) Wanem nao olketa redyim finis for iumi bifor iumi kam long ples bilong convention? (b) Long wanem wei nao iumi savve showimaot iumi tinghae long waka wea olketa duim for iumi? (Readim Hebrews 13:17.)
7 Waka Tugeta Followim Arrangement: Taem iumi kasem ples bilong convention, iumi savve lukim bigfala waka wea olketa brata duim for redyim ples for iumi. Olketa brata wea waka long attendant showimaot love and welkamim iumi, givim iumi olketa program, and faendem ples for iumi sidaon. Olketa brata and sista klinim gud ples and mekem stage luk naes. Olketa brata duim bigfala waka tu for redyim olketa tok long program, arrangem ples for stap for olketa wea needim, and duim staka nara samting moa.
8 Saed long each convention, hem tekem plande month for samfala brata for redyim olketa samting for convention, and olketa famili bilong olketa brata hia tu help, long wei for letem olketa for mekem olketa arrangement olsem. Waswe, iumi tinghae long olketa sakrifaes wea olketa mekem for helpem iumi? Iumi savve showimaot iumi tinghae long diswan taem iumi followim olketa instruction long disfala article and eni nara instruction wea iumi maet herem bifor convention bilong iumi. (Heb. 13:17) Wei wea evriwan willing for waka tugeta bae mekem ‘evri samting followim stretfala wei and order.’ —1 Cor. 14:40.
9. (a) Why nao hem barava important for pipol bilong Jehovah hipap tugeta long taem bilong iumi? (b) Wanem nao iumi wanwan savve duim distaem?
9 Taem iumi “lukim hao datfala day hem kakam moa klos,” hem barava important for pipol bilong Jehovah hipap tugeta. (Heb. 10:25) Long olketa Christian hipap bilong iumi, faithful and wise slave provaedem olketa information wea savve helpem iumi for “followim evri toktok” wea Jehovah laekem iumi for followim. (Deut. 31:12) Start distaem for mekem plan for attendim thrifala day evriwan bilong “Followim Christ!” Distrik Convention, and kasem gud samting from evri spiritual instruction and naesfala wei for hipap witim olketa brata and sista!
[Piksa long page 3]
Taem Bilong Program
Friday and Saturday
9:20 a.m. - 5:05 p.m.
Sunday
9:20 a.m. - 4:10 p.m.