Love—Main Samting for Garem Gudfala Ministry
1 “Kam long mi, . . . and mi bae strongim iufala.” (Matt. 11:28) Olketa naesfala toktok olsem showimaot bigfala love wea Jesus garem for pipol. From iumi olketa Christian minister, iumi laek for followim example bilong Jesus saed long wei for showimaot love long olketa wea feel nogud insaed disfala world wea pipol no garem love. Hao nao iumi savve duim diswan taem iumi duim preaching waka?
2 Long Toktok: From Jesus lovem pipol, hem mekius long evri chance for talemaot gud nius. (John 4:7-14) Love bae helpem iumi for no hol bak for duim enitaem witnessing. Wanfala gele wea six year hem witness long wanfala woman wea sidaon saed long hem insaed rum for weitim doctor. Wanem nao muvim hem for duim datwan? Smol gele hia hem sei: “Mi lukim woman hia hem need for savve abaotem Jehovah.”
3 Iumi savve showimaot iumi interest long pipol taem iumi smile and tok long kaenfala wei. And tu, taem iumi lisin gud long wanem pipol talem, and talemaot iumi minim wei wea olketa feel nogud long samfala samting, and barava interest long man wanwan, datwan showimaot love. (Prov. 15:23) Long wei wea followim example bilong Jesus, iumi shud mekhae long Kingdom message wea encouragem man, and bigfala love wea Jehovah garem for pipol.—Matt. 24:14; Luke 4:18.
4 Samting Iumi Duim: Jesus hem kwiktaem for luksavve long need bilong pipol and for helpem olketa. (Matt. 15:32) Iumi tu savve garem olketa chance for showimaot kaenfala fasin and love taem iumi duim ministry. Wanfala sista hem lukim wanfala woman wea story long telephone hem no minim important samting wea man wea hem story witim hem talem. Sista hia hem sei hem willing for transleitim samting wea datfala man hem talem. Wei wea sista hia showimaot love hem mekem wei for hem savve storyim Bible witim datfala woman, and hem acceptim wanfala Bible study. Wanfala brata hem duim return visit long wanfala man, bat taem hem kasem haos, datfala man stragol for muvim wanfala chair wea long olsem bed. Brata hia helpem hem for muvim datfala chair and no longtaem bihaen, tufala sidaon long datfala chair and hem startim Bible study witim man hia wea tinghae long help bilong hem.
5 Taem iumi share insaed long ministry, iumi showimaot love for God and olketa neiba bilong iumi. (Matt. 22:36-40) Wei for showimaot love olsem long toktok and samting iumi duim hem helpem olketa wea garem honest heart for luksavve iumi nao olketa tru disaepol bilong Jesus.