“Mi No Interest”
1 Long samfala ples, datwan hem toktok bilong plande pipol wea iumi laek story witim. Wanem nao bae helpem iumi for no wikdaon taem pipol long territory no interest? Wanem nao iumi savve duim for mekem pipol interest long gud nius?
2 Gohed for Hapi: Sapos iumi rememberim why plande pipol no interest bae datwan helpem iumi for gohed hapi. Pipol wea lane abaotem evolution or growap long ples wea staka pipol no biliv long God maet no savve long gudfala samting insaed long Bible. Olketa narawan maet no trustim religion bikos nomata pipol sei olketa biliv long God olketa duim olketa barava nogud samting. Samfala maet no interest bikos olketa feel olsem no eni hope hem stap. (Eph. 2:12) Samfala ‘no lisin’ bikos long olketa problem long laef wea kosim bigfala hevi for olketa.—Matt. 24:37-39.
3 Nomata samfala no laek for lisin, iumi savve kasem hapi long ministry from iumi savve samting wea iumi duim hem mekem Jehovah kasem glory. (1 Pet. 4:11) And tu, wei for story abaotem truth, nomata iumi duim olsem long olketa wea no tinghae long truth yet, hem strongim faith bilong iumi. Iumi mas traem best for garem tingting bilong Jehovah abaotem pipol long territory bilong iumi. Hem feel sorre for pipol long Nineveh wea no “savve hao raet hand bilong olketa difren from left hand bilong olketa.” (Jonah 4:11) Olketa wea stap long territory bilong iumi needim gud nius! So iumi shud no givap bat lukaotem olketa wei for mekem pipol interest long message insaed Bible.
4 Storyim Samting wea Pipol Wari Abaotem: Maet iu savve startim story bilong iu witim wanfala samting wea plande long territory wari abaotem and askem haosholder for talem tingting bilong hem long datwan. Lisin taem hem story, then showim hem message insaed Bible wea savve comfortim hem. Bihaen wanfala barava nogud samting hem happen, wanfala Witness hem talem long each wan wea hem meetim hao hem tu feel sorre abaotem datwan. Hem sei: “Pipol interest for story nao. Mi story gud witim plande pipol long datfala day bikos mi interest long samting wea kasem olketa.”
5 Kingdom bilong God bae stretem evri problem wea olketa man feisim. Trae for luksavve long problem wea haosholder barava wari long hem. Maet hem willing for lisin taem iu storyim datfala message bilong Bible abaotem hope. Sapos nomoa, maet hem willing for lisin “long narafala taem.”—Acts 17:32.