Chapter 4
Organized to Do Jehovah’s Will, page 21-27
WEI WEA KONGREGESON ORGANIZE AND KASEM DIRECTION
LONG firstfala leta bilong aposol Paul for olketa long Corinth, hem talem disfala important truth abaotem God: “God hem wanfala God bilong peace, and hem duim evri samting followim order.” Then hem sei olsem abaotem olketa kongregeson meeting: “Evri samting mas followim stretfala wei and order.”—1 Cor. 14:33, 40.
Long start bilong datfala sem leta, aposol Paul givim kaonsel abaotem wei wea kongregeson long Corinth hem divaed. Hem encouragem olketa brata long there for “tok witim wan mind” and “barava garem wan mind witim sem wei for tingting.” (1 Cor. 1:10, 11) Then hem givim kaonsel saed long olketa difren samting wea spoelem wei wea kongregeson garem wan mind. Hem iusim tokpiksa abaotem body bilong man for showimaot klia hao olketa need for garem wan mind and waka tugeta. Dastawe hem barava encouragem evriwan long Christian kongregeson, nomata wanem waka olketa duim, for lovem and tingim each other. (1 Cor. 12:12-26) Wei wea olketa member insaed long kongregeson waka tugeta olsem hem showimaot hao evri samting hem followim order, wea minim, olketa organize.
Bat long wanem wei nao Christian kongregeson mas organize? Hu nao bae organizem datwan? Wanem nao olketa arrangement insaed kongregeson, and hu nao bae kasem appointment for lukaftarem olketa responsibility? Taem iumi lukluk insaed long Bible, iumi savve kasem olketa klia ansa for olketa kwestin hia.—1 Cor. 4:6.
ORGANIZE LONG THEOCRATIC WEI
Christian kongregeson hem start long year 33 C.E., long day wea olketa Jew garem festival bilong Pentecost. Wanem nao iumi savve lanem from kongregeson long datfala taem? Hem organize long theocratic wei, wea hem nao anda long rul (Greek, kraʹtos) bilong God (the·osʹ). Story long Bible abaotem datfala samting wea happen long Jerusalem klosap 2,000 year bifor, hem showimaot klia hao God nao startim kongregeson bilong olketa anointed Christian. (Acts 2:1-47) Hem nao haos bilong hem, wea minim famili bilong hem. (1 Cor. 3:9; Eph. 2:19) Christian kongregeson bilong God distaem hem barava organize and gohed long sem wei olsem long first century, and distaem hem barava kamap big from wanfala “big crowd” join insaed.—Rev. 7:9, 10.
Taem kongregeson long first century hem start hem garem samting olsem 120 member. For fulfillim profesi long Joel 2:28, 29, olketa hia nao first wan for kasem datfala holy spirit. (Acts 2:16-18) Bat long sem day, klosap 3,000 narawan baptaes long wata and kamap part bilong datfala kongregeson wea spirit anointim. Olketa acceptim datfala message abaotem Christ and olketa “gohed for followim teaching bilong olketa aposol.” Bihaen datwan, “Jehovah evriday gohed for sevem samfala pipol moa and joinim olketa kam long olketa disaepol.”—Acts 2:41, 42, 47.
Wei wea datfala anointed kongregeson long Jerusalem barava kamap big hem mekem hae priest bilong olketa Jew komplen abaotem wei wea Jerusalem hem fulap witim teaching bilong olketa disaepol. Plande priest bilong Jew religion tu kamap olketa niu disaepol long kongregeson long Jerusalem.—Acts 5:28; 6:7.
Jesus talem olsem: “Iufala bae witness abaotem mi long Jerusalem and long Judea and Samaria and go kasem evri farawe ples long earth.” (Acts 1:8) And samting wea Jesus talem hem barava kamap tru. Taem bigfala persecution kamap long Jerusalem bihaen Stephen hem dae, olketa disaepol wea stap long there ranawe and go stap long land bilong Judea and Samaria. Bat evri ples wea olketa go, olketa gohed for talemaot gud nius and mekem plande moa pipol kamap disaepol, wea insaed diswan hem samfala Samaritan. (Acts 8:1-13) And bihaen datwan, olketa start for preachim gud nius long olketa wea no circumcise, wea hem nao olketa wea no Jew, and olketa lisin long datwan. (Acts 10:1-48) From olketa gohed for preach and mekem plande pipol kamap disaepol, samfala niu Christian kongregeson kamap long olketa difren ples.—Acts 11:19-21; 14:21-23.
Wanem nao olketa arrangement for mek sure evri niufala kongregeson hem organize and followim theocratic wei? Thru long holy spirit bilong God, arrangement hem kamap for samfala brata insaed long kongregeson for shepherdim and lukaftarem olketa sheepsheep. Long firstfala missionary gogo bilong Paul and Barnabas, olketa visitim olketa kongregeson and appointim samfala man for kamap olketa elder. (Acts 14:23) Acts chapter 20 hem story abaotem meeting bilong aposol Paul witim olketa elder long kongregeson long Ephesus. Paul hem sei olsem long olketa: “Lukluk gud long iufala seleva and long evri sheepsheep, from holy spirit appointim iufala olsem olketa overseer, for shepherdim kongregeson bilong God, wea hem baem witim blood bilong Son bilong hem.” (Acts 20:28) Olketa man hia mature long spiritual wei. Olketa fit for kasem appointment bikos olketa kasem olketa mark insaed long Bible. (1 Tim. 3:1-7) Titus wea waka witim Paul kasem responsibility for appointim olketa elder long olketa kongregeson long Crete.—Titus 1:5.
Taem olketa nara kongregeson kamap, olketa aposol and elder long Jerusalem gohed for serve olsem wanfala governing body for evri Christian kongregeson.
Taem aposol Paul hem raet long kongregeson long Ephesus, hem explainim hao wei wea Christian kongregeson loyal long hedship bilong Jesus Christ and waka tugeta witim spirit bilong God savve mekem kongregeson gohed for garem wan mind. Hem encouragem olketa Christian long there for garem hambol fasin and for evri member long kongregeson garem wan mind and stap long peace. (Eph. 4:1-6) Then hem talem toktok from Psalm 68:18 and showim hao diswan hem arrangement bilong Jehovah for olketa man wea kasem olketa mark long Bible for serve long kongregeson olsem olketa aposol, profet, pipol for talemaot gud nius, shepherd, and teacher. Olsem olketa present from Jehovah, olketa man hia bae buildimap full kongregeson for kamap mature long spiritual wei wea bae mekem God hapi.—Eph. 4:7-16.
KONGREGESON DISTAEM FOLLOWIM EXAMPLE BILONG OLKETA APOSOL
Evri kongregeson bilong Olketa Jehovah’s Witness distaem organize long sem wei olsem bifor. Olsem wanfala grup, olketa kamap wanfala kongregeson long full world wea garem wan mind witim olketa anointed wan olsem faondeson. (Zech. 8:23) Diswan hem kamap bikos Jesus Christ hem gohed for stap loyal long olketa anointed disaepol bilong hem “evriday go kasem end bilong disfala world,” olsem hem promisim. Olketa wea kam insaed long kongregeson distaem acceptim gud nius bilong God, dedicatem laef bilong olketa long Jehovah God for duim will bilong hem, and baptaes olsem olketa disaepol bilong Jesus Christ. (Matt. 28:19, 20; Mark 1:14; Acts 2:41) Olketa luksavve hao “datfala gud shepherd,” Jesus Christ, hem Hed ovarem olketa anointed member insaed kongregeson, and tu, hem Hed ovarem full sekson bilong olketa sheepsheep, wea insaed datwan hem olketa “nara sheep.” (John 10:14, 16; Eph. 1:22, 23) Datfala ‘sekson bilong olketa sheepsheep’ gohed for garem wan mind long wei for loyal and luksavve hao Christ hem Hed, and tu, for stap anda long sekson wea Christ appointim, “datfala faithful and wise slave.” Bae iumi gohed for barava trustim disfala faithful slave distaem.—Matt. 24:45.
WEI FOR IUSIM OLKETA RELIGIOUS CORPORATION
Long olketa last day bilong disfala wicked world, evri spiritual samting bilong Masta long earth hem barava kamap staka. Diswan hem mekem ‘datfala faithful slave’ kasem bigfala responsibility. For fulfillim responsibility bilong olketa for provaedem spiritual kaikai long barava taem and for preachim gud nius bilong Kingdom bifor end hem kam, datfala faithful slave iusim olketa legal corporation. Olketa luksavve hao hem wise samting for organizem olketa corporation wea fitim olketa law long olketa difren kantri. Olketa religious corporation olsem ownim olketa factory for printim and givimaot olketa Bible and Bible literature evriwea long world for iusim long waka for preach abaotem Kingdom.
Evri waka bilong olketa corporation hia hem for mekem tru worship hem kasem evri ples long earth. Evri legal corporation hem waka witim each other. Governing Body iusim olketa legal corporation hia for mekem hem isi for preachim gud nius evriwea long world and for lukaftarem olketa spiritual need bilong full kongregeson bilong God evriwea long earth.
WEI WEA BRANCH HEM ORGANIZE
Taem wanfala niu branch hem start, Governing Body appointim thri or moa elder for kamap wanfala Branch Komiti. Olketa mas lukaftarem olketa difren responsibility saed long waka long datfala kantri or waka long olketa nara kantri wea datfala branch lukaftarem. Wanfala member long datfala komiti hem serve olsem coordinator bilong Branch Komiti.
Branch organizem olketa kongregeson long olketa circuit, and olketa markem samfala circuit insaed each distrik. Size bilong olketa circuit and distrik maet hem difren. Hem depend long ples and languis, and tu, haomas kongregeson hem stap anda long datfala branch. Each circuit garem wanfala circuit overseer for visitim olketa kongregeson. Distrik overseer hem visitim olketa difren circuit, serve long olketa circuit assembly and hem spendem samfala taem for serve long olketa kongregeson. Plande taem hem visitim kongregeson long semtaem wea circuit overseer hem visitim. Samfala taem, olketa responsibility bilong olketa circuit and distrik overseer hem insaed long Kingdom Ministry Bilong Iumi and insaed olketa leta wea branch office sendem go for olketa brata hia.
Evriwan insaed long organization luksavve long administration bilong God. Olketa kongregeson luksavve and followim olketa arrangement bilong organization wea stap for helpem evriwan. Olketa acceptim appointment bilong olketa mature brata for lukaftarem waka wea gohed insaed olketa branch, distrik, circuit, and kongregeson. Olketa depend long “datfala faithful and wise slave” for kasem spiritual kaikai long barava taem. ‘Datfala faithful slave’ distaem hem barava stap anda long hedship bilong Christ, hol strong long olketa Bible principle, and followim direction bilong holy spirit. Taem evriwan waka tugeta witim wan mind, olketa kasem sem samting wea olketa kongregeson long first century kasem. Acts 16:5 hem sei olsem: “Olketa kongregeson gohed for kamap strong long faith and kamap moa big evriday.”