Chapter 5 (Part 2)
Organized to Do Jehovah’s Will, page 31-33
Olketa Overseer for Shepherdim Olketa Sheepsheep
Nomata olketa mark insaed Bible hem luk olsem hard for kasem, olketa Christian man shud no hol bak for trae kasem disfala gudfala waka for kamap overseer. Wei wea olketa overseer showimaot gudfala example saed long Christian fasin hem encouragem olketa nara member long kongregeson for duim sem samting. Diswan hem showaot long wanem aposol Paul raetem. Hem sei God givim “olketa man wea olsem olketa present for stretem olketa holy wan, for duim waka bilong minister, for buildimap body bilong Christ, go kasem taem wea iumi evriwan kasem wan mind long datfala faith and long stretfala savve bilong Son bilong God, olsem wanfala full-grown man, and kasem full wei wea Christ showaot.” (Eph. 4:8, 12, 13) From evri Christian kasem encouragement for waka hard for kamap mature long spiritual wei, olketa wea kasem appointment for serve olsem overseer nao shud lead long diswan.
Paul givim instruction long Timothy and Titus for appointim olketa man insaed long kongregeson wea kasem olketa mark for serve olsem olketa overseer. Olketa bae no appointim olketa man wea young tumas or niufala Christian man, bat olketa bae appointim olketa man wea showimaot fasin olsem wanfala Christian, wea minim and garem gudfala savve long Bible, and showimaot trufala love for kongregeson. Olketa overseer hem olketa man wea no fraet for talemaot sapos samwan duim rong samting and duim samting for stretem datwan, mekem datwan protectim olketa sheepsheep from eniwan wea laek for spoelem olketa. (Isa. 32:2) Evriwan long kongregeson bae luksavve hao olketa overseer mature long spiritual wei and really interest long olketa. Evri samting olketa duim long laef bae showimaot diswan.
Olketa wea fit for kasem appointment olsem overseer for lukaftarem olketa sheepsheep bilong God mas showimaot wisdom insaed laef bilong olketa. Sapos olketa marit, olketa bae followim Christian standard saed long marit, wea hem nao for garem wanfala waef nomoa, and leadim famili bilong olketa long gudfala wei. Sapos datfala overseer garem pikinini wea biliv wea stap anda long hem long stretfala wei and no garem rabis fasin and fasin for no obey, olketa nara member long kongregeson savve feel free for story long overseer for kasem advaes abaotem eni samting saed long famili and living bilong olketa Christian. From olketa showimaot gudfala fasin insaed famili and long community, olketa man hia mas free from blame and pipol long aotsaed story gud abaotem olketa tu. No enitaem fasin bilong olketa spoelem wei wea pipol ting long kongregeson. Sapos no longtaem go finis wanfala man kasem repruv for bigfala rong, bae hem no fit for kasem appointment for kamap wanfala overseer. Evri samting hia bae encouragem olketa narawan long kongregeson for followim gudfala example bilong olketa and trustim olketa shepherd hia for lukaftarem olketa long spiritual wei.—1 Cor. 11:1; 16:15, 16; Phil. 2:25, 29; Heb. 13:7, 17.
Olketa man wea kasem olketa mark hia fit for serve long Christian kongregeson long sem wei olsem olketa older man long Israel, wea Bible storyim olketa olsem “wise and garem savve.” (Deut. 1:13) Olketa tu bae sin. (Rom. 3:23) Bat olketa long kongregeson and pipol long community bae luksavve olketa garem stretfala fasin and fraet long God and pruvim finis hao laef bilong olketa followim olketa principle bilong God. From olketa free from blame, datwan mekem olketa free for toktok long kongregeson.
Olketa man wea fit for kamap olketa overseer mas balance saed long fasin and long wei wea olketa deal witim olketa narawan. Olketa bae no ova tumas, bat laef bilong olketa mas balance, followim order, and bae olketa garem fasin for kontrolem olketa seleva. Olketa showimaot balance saed long kaikai, drink, and hapitaem. Olketa balance saed long wei for drinkim alcohol, mekem no eniwan accusim olketa and sei hem man for drunk. Man wea drink tumas no savve tingting stret and kontrolem hemseleva and no fit for lukaftarem olketa spiritual samting bilong kongregeson.
For lukaftarem olketa samting long kongregeson, man mas showimaot hem followim order long laef bilong hem, long samting wea hem duim, and long waka. Insaed diswan hem lukluk bilong hemseleva, haos bilong hem, and olketa samting wea hem duim. Man olsem bae no delay for duim olketa samting, and hem luksavve long samting wea hem mas duim and hem mekem plan for duim datwan. Hem followim olketa Bible principle.