Chapter 5 (Part 5)
Organized to Do Jehovah’s Will, page 39-41
Olketa Overseer for Shepherdim Olketa Sheepsheep
WANEM FOR DUIM SAPOS LIVING BILONG ELDER HEM CHANGE
Maet wanfala brata wea faithful for serve olsem elder for staka year finis hem kamap sik or olo, and maet datwan mekem hem no fit for duim evri waka olsem hem duim bifor or olsem olketa nara elder duim. Nomata olsem, from hem gohed for serve olsem elder, iumi shud respectim hem. Nomata hem no savve duim staka samting olsem hem duim bifor, diswan no minim hem no savve gohed for serve olsem elder. Hem fitim for hem kasem dabol honor olsem olketa nara overseer wea duim best bilong olketa for lukaftarem olketa sheepsheep.
Bat sapos wanfala brata tingse hem moabeta for hem no serve olsem elder from living bilong hem change and datwan mekem hem no savve duim staka samting, hem savve disaed for no serve olsem elder. (1 Pet. 5:2) Evriwan long kongregeson shud gohed for respectim hem and hem savve duim plande gudfala samting insaed long kongregeson nomata hem no garem olketa responsibility and waka wea olketa elder garem.
OLKETA RESPONSIBILITY BILONG OLKETA ELDER INSAED LONG KONGREGESON
Governing Body savve arrange for olketa brata wea fit for serve olsem overseer for serve long eni ples and long enitaem. Nomata body of elders recommendim brata for kamap overseer, datwan no minim Governing Body bae appointim datfala brata. Olketa recommendation hem for helpem Governing Body disaed, and maet olketa no acceptim datwan from olketa garem gudfala reason for no appointim datfala brata. Governing Body savve markem samfala brata tu for appointim olketa overseer.—1 Tim. 1:3; Titus 1:5.
Announcement bae kamap long kongregeson sapos wanfala brata kasem appointment for kamap overseer or brata no gohed for serve olsem overseer. Diswan helpem olketa long kongregeson savve hu nao serve olsem overseer insaed kongregeson, and from datwan olketa savve followim datfala arrangement.
Olketa elder lukaftarem plande difren waka insaed long kongregeson. Evri kongregeson garem wanfala presiding overseer, secretary, service overseer, Wastaoa Study conductor, and Theocratic Ministry Skul overseer. Klosap evri elder serve olsem Kongregeson Buk Study overseer. Olketa elder no changem waka bilong olketa bat gohed for duim sem waka. Sapos brata wea garem wanfala long olketa responsibility hia hem muv go long nara kongregeson, kasem wanfala sik wea mekem hem no fit for lukaftarem olketa responsibility bilong hem, or hem fail for kasem olketa mark insaed long Bible, bae wanfala nara elder lukaftarem responsibility bilong hem. Long olketa kongregeson wea no garem plande elder, maet wanfala elder need for lukaftarem tufala or thrifala difren responsibility go kasem taem wea olketa nara brata kamap olketa elder.
Presiding overseer hem chairman long olketa meeting bilong body of elders. Hem bae man wea organize gud and lead long barava gudfala wei. (Rom. 12:8) Hem garem responsibility for lukaftarem program bilong Service Meeting. Hem bae arrangem tu olketa pablik tok, and sapos hem needim help saed long diswan, hem bae askem wanfala elder or ministerial servant for helpem hem.
Secretary hem lukaftarem olketa kongregeson record and talem olketa elder abaotem eni important leta wea hem kasem for kongregeson. Sapos hem needim help, wanfala elder or ministerial servant savve helpem hem for lukaftarem samfala waka wea hem mas duim evri month.
Service overseer nao hem mekem olketa arrangement saed long field service and olketa nara samting wea join witim diswan. Hem mekem schedule for visitim wanfala difren Kongregeson Buk Study grup each month and givim service tok for datfala grup. Long weekend wea hem visitim datfala grup, hem bae waka witim olketa long field ministry and helpem olketa pablisa for duim olketa return visit and Bible study. Long olketa kongregeson wea smol nomoa and wea garem wan or tufala buk study grup, maet hem visitim each grup hia tufala taem insaed long year.
Samfala taem, olketa waka bilong olketa brata hia, and tu, Wastaoa Study conductor, Theocratic Ministry Skul overseer, Kongregeson Buk Study overseer, and olketa nara elder bilong body of elders, hem insaed long Kingdom Ministry Bilong Iumi and olketa leta from branch office.
Sapos inaf elder stap and olketa fit for duim, olketa lukaftarem olketa assignment saed long olketa nara kongregeson meeting each week. Olketa planim and redyim olketa meeting hia long wei wea hem bae teachim and strongim spiritual saed bilong olketa insaed kongregeson. Olketa elder mas givim olketa pablik tok long wei wea hem bae teachim olketa insaed long kongregeson. And tu, olketa elder bae lead long field ministry long wei for waka witim olketa pablisa.
Body of elders long each kongregeson kasem instruction for hipap tugeta fofala taem each year for storyim spiritual saed bilong kongregeson. Tufala long fofala meeting hia kamap long taem bilong visit bilong circuit overseer. Olketa elder shud markem wanfala meeting thrifala month bihaen long each visit bilong circuit overseer. Plande taem, fofala meeting hia each year hem fitim for olketa elder stretem eni samting wea full body of elders mas duim tugeta. Bat sapos samting hem kamap, olketa elder savve hipap enitaem for garem meeting. Bat sapos each elder lukaftarem gud assignment bilong olketa and presiding overseer hem mek sure olketa elder duim waka bilong olketa, then body of elders no need for garem plande meeting.