Gohed for Preach
1 Samfala taem maet hem luk olsem olketa ples wea iumi preach staka taem no staka pipol nomoa laek for herem iumi. Nomata olsem, olketa gudfala reason stap for iumi gohed for preach.—Matt. 28:19, 20.
2 Mekem Pipol Savve Herem: Jesus talem finis hao wei for preach abaotem Kingdom “long evri ples” hem part bilong datfala saen hao “world distaem bae finis.” (Matt. 24:3, 14) Taem pipol lukim iumi gohed for preachim gud nius abaotem Kingdom, datwan hem givim bigfala witness. Dastawe bihaen iumi duim finis datfala ples, samfala pipol savve gohed for storyim waka wea iumi duim, nomata olketa no laek for herem iumi. For tinghae long why iumi duim preaching waka savve helpem iumi for gohed strong. Iumi mekem Jehovah hapi long wei for mekem Bible profesi kamap tru taem iumi preach long pipol and storyim bigfala trabol wea bae happen.—2 Thess. 1:6-9.
3 Gohed Strong: From staka samting savve mekem pipol no garem taem for duim olketa samting, iumi mas no givap bat gohed strong taem iumi helpem olketa for laek savve abaotem Kingdom. Olketa witness go for visitim wanfala woman evri week for wanfala year. Gogo, hem askem olketa for kam long haos and for storyim Bible. Hem laekem tumas wanem hem herem, gogo hem studyim Bible, attendim olketa meeting, and hem laek for baptaes.
4 Olketa samting long disfala world savve change kwiktaem and wei bilong pipol tu gohed for change. Staka pipol wea les for herem iumi bifor maet distaem laek for herem nambawan message wea iumi talemaot. Nomata sapos wanfala nomoa acceptim gud nius abaotem Kingdom, gudfala samting nao kamaot from wei wea iumi gohed strong.
5 Evriwea long world, staka pipol nao ‘feel nogud and krae long evri rabis samting wea pipol duim.’ (Ezek. 9:4) From staka pipol acceptim Kingdom message, datwan showimaot hao olketa wea laek for herem gud nius abaotem Kingdom stap yet. (Isa. 2:2, 3) Dastawe, iumi mas no givap bat gohed for preach mekem iumi “tekem [go] gud nius abaotem samting wea moabeta.”—Isa. 52:7; Acts 5:42.