Waswe, Famili Bilong Iu Redi for Stap Laef?
1 Olketa profesi long Bible wea kamap tru barava showimaot hao klosap nao disfala rabis world bae finis. Distaem iumi stap long barava nogud taem wea klosap semsem olsem taem bilong Flood long taem bilong Noah. (Matt. 24:37-39) Taem datfala rabis world bilong bifor hem finis, Noah hem stap laef bikos hem “wakabaot witim trufala God.” (Gen. 6:9) Masbi Noah lanem famili bilong hem abaotem wanem Jehovah laekem, bikos olketa tu stap laef long taem bilong datfala Flood. Hao nao iumi savve followim wanem Noah duim and redi olsem wanfala famili for stap laef taem disfala rabis world hem finis?
2 Preach Abaotem Olketa Stretfala Samting: Noah hem gohed strong for samting olsem 40 go kasem 50 year olsem “wanfala man wea preach abaotem olketa stretfala samting.” (2 Pet. 2:5) Nomata maet pipol long taem bilong Noah stap anda long paoa bilong olketa bighed angel or nomoa, masbi olketa tok spoelem preaching waka wea hem duim. Staka taem iumi meetim pipol wea no laek herem iumi and tok spoelem preaching waka wea iumi duim, diswan showimaot hao disfala rabis world klosap for finis. (2 Pet. 3:3, 4) Pipol long taem bilong Noah no laek for herem hem, bat staka pipol distaem hapi for herem iumi and kam for worshipim Jehovah. (Isa. 2:2) Iumi bae sevem ‘iumiseleva and olketa wea herem iumi’ sapos iumi gohed strong. (1 Tim. 4:16) Hem barava important tumas for olketa dadi and mami lanem pikinini bilong olketa for followim wanem olketa talem and wanem olketa duim long preaching waka!—2 Tim. 4:2.
3 Hem Duim “Evri Samting”: Wei wea Noah and famili bilong hem stap laef, hem bikos olketa barava followim toktok bilong Jehovah. (Gen. 6:22) Distaem tu hem important for iumi mas ‘willing for obeyim’ wanem Bible and datfala faithful slave talem. (Jas. 3:17) Wanfala dadi hem ting bak hao hem obeyim wanem organization bilong Jehovah talem. Hem duim famili study evri week and hem tekem famili long preaching waka evri Saturday or Sunday. Evri week hem trae for tekem wanfala pikinini long famili long preaching waka. Wei wea hem gohed strong for duim “evri samting” helpem sixfala pikinini bilong hem for kamap olketa faithful wakman bilong Jehovah.
4 Disfala rabis world bae seknomoa hem finis. (Luke 12:40) Iumi and famili bilong iumi bae barava stap redi sapos iumi followim wanem Noah duim and showimaot faith hao iumi bae stap sef!—Heb. 11:7.