Iumi Mas Redi Evritaem for Preach
1. Hao nao iumi savve olketa Christian long first century redi evritaem for preach?
1 Olketa Christian long first century strong for “gohed” talemaot gud nius long eni ples wea pipol stap. (Acts 5:42) So hem fitim for iumi sei taem olketa go preach long haos tu haos, olketa preach tu long pipol wea olketa meetim long road. And tu, taem olketa preach finis and go long market, olketa iusim datfala chance for preach long pipol wea olketa meetim long there. Olsem Jesus, olketa redi evritaem for preach.—Mark 6:31-34.
2. Nem bilong iumi hem showimaot wanem samting abaotem preaching waka bilong iumi?
2 Redi Evritaem: Nem bilong iumi, Olketa Jehovah’s Witness, hem showimaot iumi pipol for preach abaotem Jehovah. (Isa. 43:10-12) So nomata long taem wea iumi no preach from haos tu haos, iumi redi evritaem for ansarem eniwan wea askem kwestin abaotem hope bilong iumi. (1 Pet. 3:15) Waswe, iu savve tingim olketa difren chance wea maet kamap for duim enitaem witnessing, and then iu redyim wanem iu bae talem? Waswe, iu karem witim iu olketa pablikeson for givim long olketa wea interest? (Prov. 21:5) Waswe, iu preach nomoa from haos tu haos, or iu preach tu long pipol long olketa nara ples long taem wea fitim?
3. Why nao wei for preach long pipol wea iumi meetim long road, park, stoa, olketa office, and olketa nara ples olsem, hem important tu?
3 Preach Long Pipol wea Iumi Meetim Long Pablik: Iumi preach long pipol wea iumi meetim long road, park, stoa, olketa office, and olketa nara ples olsem. Waswe hem fitim for iumi preach long olketa ples olsem? Aposol Paul sei hem preach “long pablik and long haos tu haos” tu. (Acts 20:20) Haos tu haos waka hem main wei for duim preaching waka. Bat olketa Christian long first century tingim pipol, and no tingim olketa haos nomoa. Olketa mekius long evri chance for story long pipol long pablik, long enitaem witnessing, and long haos tu haos. Iumi tu laek for garem tingting olsem olketa Christian hia, mekem iumi savve barava duim gud ministry bilong iumi.—2 Tim. 4:5.