Wanem Iumi Savve Lanem From Laef blo Samuel

Samuel gohed faithful lo Jehovah for full laef blo hem. Taem hem young, hem no laek for duim nogud samting olsem olketa son blo Eli, Hophni and Phinehas. (Fas Samuel 2:22-26) Samuel gohed for growap, and Jehovah stap witim hem. (Fas Samuel 3:19) Taem hem olo, hem gohed faithful lo Jehovah nomata olketa son blo hem no faithful.​—Fas Samuel 8:1-5.

Wat nao iumi savve lanem from example blo Samuel? Sapos iu wanfala young wan, tingim dat Jehovah hem minim feeling blo iu and olketa challenge wea iu feisim. Hem bae helpem iu for no fraet. (Aesaea 41:10, 13) Sapos iu parents wea pikinini blo iu lusim Jehovah, tingim dat Samuel hard for forcem olketa son blo hem wea big finis for gohed faithful for followim olketa standard blo Jehovah. Bat hem leavim evri samting lo hand blo Jehovah. Samuel hem gohed faithful and hem mekem heart blo Dadi blo hem Jehovah for hapi. Maet gud example blo iu savve muvim pikinini blo iu for kam bak lo Jehovah.

WATCHIM VIDEO LANE FROM OLKETA—SAMUEL, AND THEN ANSAREM OLKETA KWESTIN HIA:

• 

  Hao nao Samuel showimaot wei for no fraet taem hem smol?

• 

  Hao nao Danny showimaot wei for no fraet?

• 

  Hao nao Samuel showimaot gud example taem hem olo?

• 

  Hao nao parents blo Danny showimaot gud example?