Hao, Iumi Savve Finisim War and Violent Conflict?

ECONOMIC DEVELOPMENT

Goal: For impruvim laef blo pipol. Diswan hem help for katem daon or finisim problem saed lo economy, wea hem nao main samting wea kosim war.

Why hem no isi: Olketa gavman mas changem hao olketa iusim selen. Lo 2022, olketa estimatem olketa spendem 34.1 billion dollar (U.S.) lo peace building and peacekeeping raonem world. Bat, datwan hem only 0.4 percent lo selen wea olketa spendem lo military lo datfala sem year.

“Mifala spendem staka selen and resources for managem olketa conflict winim for iusim datfala selen for stopem datwan and peace building.”—António Guterres, secretary-general of the United Nations.

Wat Bible talem: Olketa gavman lo world and olketa organization savve helpem poor pipol, bat no enitaem bae olketa barava finisim wei for poor.— Deuteronomy 15:11; Matthew 26:11.

MEKEM PEACE AGREEMENT

Goal: For stopem or mek peace taem olketa story abaotem datfala problem and agree for duim olketa samting wea bae benefit for tufala party hia.

Why hem no isi: Wan or tu-thri party maet no willing for negotiate, or acceptim wanfala agreement. And hem isi for brekem olketa peace agreement.

“For mekem peace agreement hem no evritaem succeed. Agreement wea tufala kantri mekem maet hem no fair wea datwan lead go moa for war.”—Raymond F. Smith, American Diplomacy.

Wat Bible talem: Pipol shud “trae hard for garem peace.” (Psalm 34:14) Bat staka pipol distaem “no loyal, . . . no willing for agree, . . . betrayim fren blo olketa.” (2 Timothy 3:​1-4) Olketa kaen wei olsem hem stopem olketa politikol leader wea laek for duim gud samting for no stretem olketa conflict.

REDUCEM OLKETA WEAPON

Goal: For reducem or finisim olketa weapon, especially olketa nuclear, chemical, and biological weapon.

Why hem no isi: Staka taem olketa kantri no willing for reducem olketa weapon bikos olketa fraet bae olketa lusim paoa and no fit for defendim olketa seleva. Even if olketa kantri get rid lo evri weapon blo olketa, hard for olketa stopem reason why pipol faet.

“Staka gavman wea promis for finisim olketa weapon afta 1991 nating duim wat olketa promisim, includim wat olketa shud duim for reducem olketa danger, katem daon arguement between olketa nara kantri, and maet mekem iumi stap lo world wea iumi feel sef.”—“Securing Our Common Future: An Agenda for Disarmament.”

Wat Bible talem: Pipol shud lusim olketa weapon and “hamarem sword blo olketa for kamap olketa hou.” (Isaiah 2:4) Bat for finisim war, pipol mas duim moa samting bikos violence hem start kam from heart blo man.—Matthew 15:19.

FORMIM ALLIANCE FOR STOPEM WAR

Goal: Olketa gavman agree for defendim each other from enemy blo olketa. Olketa tingse enemy bae no laek for startim war witim olketa bikos if hem startim war hem bae faet againstim staka kantri.

Why hem no isi: For faet againstim staka kantri bae no mekem peace kamap. Staka kantri no evritaem duim wat olketa promisim, or agree lo hao and wat taem for faet againstim enemy blo olketa.

“Nomata League of Nations and United Nations waka hard for helpem olketa gavman for formim olketa alliance witim each other, olketa alliance hia no savve stopem war.”—“Encyclopedia Britannica.”

Wat Bible talem: Hem gud taem staka pipol waka tugeta. (Ecclesiastes 4:12) Bat, iumi shud no trustim olketa organization blo man for mekem tru peace and security. “No putim trust blo iu lo olketa man wea lead; no eni man savve sevem iu. Taem olketa dae, olketa go bak lo dust; lo datfala sem day evri plan blo olketa hem finis nao.”—Psalm 146:​3, 4, Today’s English Version.