“Wei for Fren Witim God Hem Gud Samting” for Iumi!

1-2. (a) Wat nao iu need for duim for garem klos wei for fren witim samwan? (b) Wat nao bae iumi storyim lo disfala article?

HAO, iu garem wanfala klos fren? Wat nao iu duim wea mekem iutufala kamap klos fren? Maet iutufala spendem staka taem tugeta, iu savve lo olketa challenge wea hem kasem, and wat hem laekem and no laekem. Iu lukim dat hem garem olketa outstanding quality wea iu tu laek for garem. From datwan, iu barava lovem fren blo iu.

² For garem klos frenship witim samwan, iumi mas waka hard and spendem taem witim hem. Iumi need for duim sem samting tu for iumi fren klos witim Jehovah God. Disfala article bae storyim hao iumi savve mekem frenship blo iumi witim Jehovah for kamap moa klos and gud samting wea iumi savve kasem taem iumi duim datwan. Firstaem, bae iumi story raonem why hem gud for iumi duim samting for fren klos witim best Fren blo iumi, Jehovah.

3. Why nao iumi shud ting raonem olketa gud samting wea iumi kasem taem iumi fren klos witim Jehovah? Storyim example.

³ For sure iu agree dat wei for fren klos witim Jehovah hem gud samting. Bat wei for ting raonem evri gud samting wea iumi savve kasem from datwan, savve motivatim iumi for duim moa samting for fren klos witim hem. (Ps. 63:​6-8) For example, iumi savve dat hem gud samting for garem balance diet, duim physical activity, garem inaf rest, and drinkim inaf wata. Nomata olsem, staka pipol ting smol lo olketa samting hia and no lukaftarem gud health blo olketa. Bat, taem iumi spendem taem for ting abaotem gud samting wea iumi kasem from wei for garem healthy laef stael, datwan bae motivatim iumi for duim samting for stap healthy. Lo sem wei tu, iumi savve dat wei for fren klos witim Jehovah hem gud samting for iumi, bat wei for ting abaotem gud samting wea iumi kasem from datwan, hem savve motivatim iumi for duim moa samting for fren klos witim Hem.—Ps. 119:​27-30.

4. Olsem iumi readim lo Psalm 73:​28, wat nao man wea raetem datfala psalm luksavve lo hem?

⁴ Readim Psalm 73:28. Man wea raetem Psalm 73 hem wanfala Levite wea kasem appointment for serve olsem musician lo temple blo Jehovah. Luk olsem, hem man wea faithful for worshipim Jehovah for staka year finis. Nomata olsem, hem luksavve dat hem important for remindim hemseleva and olketa narawan, dat “wei for fren witim God” hem gud samting for hem and for olketa. Wat nao samfala gud samting wea iumi kasem taem iumi fren klos witim God?

‘WEI FOR FREN KLOS WITIM GOD’ MEKEM IUMI FOR HAPI

5. (a) Why nao wei for fren klos go moa witim Jehovah mekem iumi hapi? (b) Olsem Proverbs 2:​6-16 storyim, wat nao samfala specific example lo hao wisdom blo Jehovah savve protectim and helpem iu?

⁵ Taem iumi barava fren klos witim Jehovah, bae iumi hapi tumas. (Ps. 65:4) Staka reason stap for iumi hapi. For example, iumi kasem gud samting taem iumi followim wisdom wea stap insaed lo Bible. Wisdom from Bible savve protectim iumi from olketa bad influence and helpem iumi for no mekem olketa serious mistek. (Readim Proverbs 2:​6-16.) Dastawe Bible sei: “Man wea faendem wisdom and man wea waka hard for kasem wei for luksavve bae hapi.”—Prov. 3:13.

6. Why nao man wea raetem Psalm 73 lusim hapi blo hem?

⁶ Nomata olketa fren blo Jehovah tu savve sorre samfala taem. Man wea raetem Psalm 73 hem lusim hapi blo hem taem hem start for garem olketa negative tingting. Hem feel nogud and jealous, bikos hem tingse olketa bad pipol garem gud laef nomata olketa no lovem God or kea abaotem olketa standard blo hem. Hem tingse pipol wea violent and praod olketa evritaem rich, healthy, and no savve safa tu. (Ps. 73:​3-7, 12) Man wea raetem datfala psalm hem wari tumas gogo hem wonder if hem bae kasem eni gud samting from wei wea hem waka hard for servem Jehovah. From hem sorre tumas, hem sei: “Mi waka hard nating nomoa for keepim heart blo mi klin and wasim hand blo mi for showim dat mi innocent.”—Ps. 73:13.

7. Wat nao savve helpem iumi for hapi moa taem iumi sorre tumas? (Lukim tu piksa.)

⁷ Man wea raetem datfala psalm no letem feeling for sorre for stopem hem for duim samting. Hem disaed for go lo “nambawan holy ples blo God,” and lo there nao Jehovah stretem tingting blo hem. (Ps. 73:​17-19) Taem iumi sorre, best Fren blo iumi Jehovah hem savve lo datwan. If iumi prea lo hem for direction and acceptim help wea hem provaedem thru lo Bible and from olketa lo kongregeson, hem bae strongim iumi for deal witim datfala sorre feeling. Nomata taem iumi barava wari tumas, Jehovah bae comfortim and helpem iumi for garem peace lo mind.—Ps. 94:19.a

‘WEI FOR FREN KLOS WITIM GOD’ HELPEM IUMI FOR GAREM PURPOSE AND HOPE

8. Wat nao nara tufala important wei wea showim dat wei for fren klos witim God hem gud samting for iumi?

⁸ For fren klos witim God hem gud samting for iumi lo nara tufala important wei. First, hem helpem iumi for garem purpose lo laef. Second, hem helpem iumi for garem strongfala hope for future. (Jer. 29:11) Distaem bae iumi storyim gud samting wea iumi savve kasem from tufala samting hia.

9. Hao nao wei for fren klos witim Jehovah hem mekem laef blo iumi garem mining?

⁹ For fren klos witim Jehovah hem mekem laef blo iumi hem garem purpose. Staka pipol distaem no bilivim dat God hem exist, and bikos lo datwan olketa tingse laef hem no garem mining and gogo no eni human being bae stap lo disfala earth. Bat from iumi studyim Bible, datwan mekem iumi for convince dat God “hem stap and hem savve givim reward lo olketa wea barava lukaotem hem.” (Heb. 11:6) Nomata distaem iumi savve hapi bikos iumi worshipim Jehovah, from hem nao wat Dadi blo iumi lo heven creatim iumi for duim.—Deut. 10:​12, 13.

10. Olsem Psalm 37:29 storyim, wat nao future blo olketa wea hope lo Jehovah?

¹⁰ Staka pipol no garem real hope for future, main samting lo laef blo olketa hem for waka, garem famili, and sevem selen for taem olketa retire. Olketa no savve lo God. Bat olketa wea worshipim Jehovah putim hope blo olketa lo hem. (Ps. 25:​3-5; 1 Tim. 6:17) Iumi trustim God wea iumi fren klos witim, and iumi trustim dat hem bae duim wat hem promisim. Iumi luk forward for staka nambawan blessing lo future, wanfala nao hem for worshipim hem for olowe lo Paradaes.—Readim Psalm 37:29.

11. Taem iumi fren klos witim God, hao nao datwan affectim iumi, and hao nao God feel taem iumi duim datwan?

¹¹ Staka gud samting nao iumi kasem from wei wea iumi fren klos witim God. For example, Jehovah promis for forgivim sin blo olketa wea repent. (Isa. 1:18) From datwan, iumi bae no gohed for feel guilty bikos lo olketa past sin blo iumi. (Ps. 32:​1-5) And iumi hapi bikos iumi mekem Jehovah hem hapi. (Prov. 23:15) For sure, iu savve tingim olketa nara blessing wea iu kasem from wei wea iu fren klos witim God. Bat, wat nao iumi savve duim for fren klos go moa witim God?

HAO FOR GOHED ‘FREN KLOS WITIM GOD’

12. Wat nao iu duim finis mekem iu fren klos go moa witim God?

¹² If iu wanfala baptaes Christian, hem showim iu duim staka samting finis for fren klos witim Jehovah. Iu lanem finis staka Bible truth abaotem Jehovah God and Christ Jesus, repent from olketa past sin blo iu, garem strongfala faith lo God, and traem best for duim wat God laekem. Bat, for iumi fren klos go moa witim God, iumi mas continue for duim olketa samting hia.—Col. 2:6.

13. Wat nao thrifala samting wea savve helpem iumi for gohed fren klos go moa witim Jehovah?

¹³ Wat nao bae helpem iumi for gohed fren klos go moa witim Jehovah? (1) Iumi mas continue for readim and studyim Bible. Taem iumi duim datwan, goal blo iumi hem for lanem moa samting abaotem God. Iumi shud trae for understandim wat God laekem iumi for duim and letem olketa Bible principle for gaedem iumi. (Eph. 5:​15-17) (2) Iumi mas strongim faith blo iumi taem iumi ting raonem staka pruv wea showim hem lovem iumi. (3) Iumi mas continue for heitim olketa tings wea Jehovah no hapi lo hem and for avoidim wei for fren witim pipol wea duim olketa samting olsem.—Ps. 1:1; 101:3.

14. Olsem 1 Corinthians 10:31 storyim, wat nao samfala samting wea iumi duim evriday wea mekem Jehovah hapi? (Lukim tu piksa.)

¹⁴ Readim 1 Corinthians 10:31. Hem barava important for iumi gohed duim olketa samting wea Jehovah hapi lo hem. Diswan hem no just minim wat iumi duim lo ministry and lo olketa kongregeson meeting. Bat hem includim olketa gud samting wea iumi duim evriday. For example, taem iumi honest lo evri samting wea iumi duim and sharem wat iumi garem witim olketa narawan, hem mekem Jehovah hapi. (2 Cor. 8:21; 9:7) And tu, hem laekem iumi for tinghae lo laef wea hem wanfala present. So taem iumi garem balance habit abaotem wat iumi kaikaim and drinkim, and duim olketa samting for keepim iumi stap healthy, iumi fren klos witim Man wea givim laef. Jehovah lovem iumi taem hem lukim iumi waka hard for duim olketa samting wea mekem hem hapi, nomata hem olketa smol samting.—Luke 16:10.

15. Hao nao Jehovah expectim iumi for treatim olketa narawan?

¹⁵ Jehovah hem kaen lo evri pipol, nomata olketa wea raeteous and olketa wea no raeteous. (Matt. 5:45) Hem expectim iumi tu for showimaot wei for kaen lo olketa narawan. For example, hem laekem iumi for “no talem nogud samting abaotem narawan, no raoa, . . . and evritaem showim mildness lo evriwan.” (Titus 3:2) Datwan helpem iumi for luksavve hao nomata if olketa narawan no biliv lo Jehovah, iumi no ting daonem olketa. (2 Tim. 2:​23-25) Iumi fren klos witim Jehovah taem iumi kaen and evritaem treatim gud olketa narawan.

IUMI SAVVE ‘FREN KLOS WITIM GOD’ EVEN TAEM IUMI DISCOURAGE

16. Wat kaen feeling nao man wea raetem Psalm 73 hem start for garem?

¹⁶ Bat wat if samfala taem iu start for feel olsem Jehovah hem no lovem iu? Sem samting hem happen tu lo man wea raetem Psalm 73. Hem sei: “Leg blo mi klosap nomoa lusim stretfala road, mi klosap foldaon taem mi wakabaot.” (Ps. 73:2) Toktok wea hem talem showimaot hem “no hapi” and “no garem gud tingting . . . olsem animal wea no garem eni tingting” front lo Jehovah. (Ps. 73:​21, 22) Hao, datfala man tingse Jehovah no lovem hem bikos lo olketa mistek wea hem duim, and hard for Jehovah forgivim hem nao?

17. Wat nao datfala man wea raetem Psalm duim nomata hem barava feel nogud? (b) Wat nao iumi savve lanem from example blo hem? (Lukim tu olketa piksa.)

¹⁷ If datfala man wea raetem psalm feel dat Jehovah rejectim hem, masbi hem feel olsem for lelebet taem nomoa. Nomata hem barava feel nogud, hem luksavve dat hem need for duim samting for fren klos go moa witim God, dastawe hem sei: “Bat distaem mi stap witim iu [Jehovah] evritaem. Iu holem finis raet hand blo mi. Advaes blo iu hem protectim mi, and bihaen bae iu leadim mi go lo glory.” (Ps. 73:​23, 24) Jehovah hem olsem wanfala rock wea hem stedy, so taem iumi feel wikdaon or discourage iumi shud askem hem for helpem iumi. (Ps. 73:26; 94:18) Even if iumi mekem eni serious mistek, iumi savve kam bak lo Jehovah and trustim dat hem “redi for forgive.” (Ps. 86:5) Especially taem iumi barava feel nogud, iumi shud duim samting for fren moa klos witim God.—Ps. 103:​13, 14.

‘FREN KLOS WITIM GOD’ FOR OLOWE

18. Why nao wei for fren klos witim Jehovah hem no garem eni limit?

¹⁸ For duim samting for fren klos witim Jehovah and for barava savve gud lo hem, hem no garem eni limit. Bible hem sei olketa wei blo Jehovah, wisdom, and knowledge blo hem, “hem deep tumas!”—Rom. 11:33.

19. Wat nao olketa toktok lo Psalms helpem iumi for sure lo hem?

¹⁹ Psalm 79:13 hem sei: “Mifala, olketa pipol blo iu, olketa sheepsheep wea iu lukaftarem, bae talem thankiu lo iu for olowe, and bae mifala praisem iu lo evri genereson wea bae kam.” Taem iu gohed for fren klos witim God, iu tu savve sure bae iu kasem olketa blessing for olowe and fit for sei: “God nao hem rock wea strongim heart blo mi, and share blo mi for olowe.”—Ps. 73:26.