Sapos Mi Brekem Wanfala Famili Rul, Wat Nao Bae Mi Duim?

Klosap evri famili garem olketa rul, olsem wat taem for arrive lo haos, hao for iusim electronic device, and hao for treatim olketa narawan. Datwan hem example blo samfala rul nomoa.

Hao sapos iu brekem wanfala famili rul? Iu hard for changem wat iu duim finis, nomata olsem, iu savve duim samting for mekem datfala situation no kamap worse. Disfala article bae storyim hao for duim datwan.

• Wat iu shud no duim

• Olketa gud idea

• Wanem olketa nara young wan talem

Wat iu shud no duim

• If parents blo iu no savve dat iu brekem wanfala rul, maet iu trae for haedem rong samting wea iu duim.

• If parents blo iu savve dat iu brekem wanfala rul, maet iu trae for talem excuse or blamem narawan.

Tufala option hia hem nogud. Why nao olsem? Bikos wei for haedem wat iu duim or talem excuse hem showim iu no mature. Bae parents blo iu luksavve iu still need for waka hard for kamap mature.

“Wei for laea hem nogud idea. Bikos gogo, bae parents blo iu herem full story and discipline wea iu bae kasem bae big winim sapos iu talem tru story lo start.”—Diana.

Olketa gud idea

• Talem wat iu duim. Bible sei: “Man wea haedem olketa rong samting wea hem duim bae no succeed.” (Proverbs 28:13) Parents blo iu savve iu no perfect. Bat olketa expectim iu for honest.

  “Parents blo iu bae forgivim iu if iu talem tru samting. Taem iu talem tru samting, tufala bae trustim iu go moa.”—Olivia.

• Willing for sei sorre. Bible sei: “Mas deal witim olketa narawan long hambol wei.” (1 Peter 5:5) Man wea hambol bae willing for sei “Mi sorre” and no trae for mekem eni excuse.

  “Pipol wea evritaem mekem excuse gogo konsens blo olketa no savve waka gud. Olketa no savve feel guilty nomata olketa duim rong samting.”—Heather.

• Acceptim samting wea kamaot. Bible sei: “Lisin lo discipline.” (Proverbs 8:33) Avoidim wei for komplen, and acceptim eni discipline wea parents blo iu givim.

  “If iu gohed komplen abaotem discipline wea iu kasem, bae situation blo iu hem worse go moa. Acceptim discipline wea iu kasem, and no focus lo wat iu lusim.”—Jason.

• Waka hard for strongim bak trust wea tufala garem lo iu. Bible sei: “lusim old wei bilong iufala wea followim nomoa samting iufala duim bifor.” (Ephesus 4:22) Traem best blo iu for mekem olketa wise disison for parents blo iu savve trustim iu bak moa.

  “If iu gohed mekem wise disison and no duim moa datfala sem mistek, gogo tufala bae trustim iu moa.”—Karen.

IDEA: Duim winim wanem tufala askem, mekem iu kasem bak trust. For example, next taem iu go aot lo eni ples, ringim parents blo iu for letem tufala savve wat taem bae iu kam bak, nomata iu bae no leit. Diswan bae helpem tufala for luksavve dat iu laekem tufala for trustim iu bak moa.