Hao, End blo World Hem Klosap? Wat Nao Apocalypse?
Taem iu herem word “apocalypse,” wat nao iu tingim? Maet iu ting hem wanfala nogud samting wea bae kamap evriwea lo world, wea bae killim dae evriting wea laef lo earth. Samfala biliv dat world hem gogo for kaen nogud samting olsem, especially taem olketa readim olketa nius report olsem olketa hia:
“Nuclear war—nomata maet hem start bikos olketa planim, or hem happen by accident, or bikos lo smol miscommunication nomoa—hem savve happen enitaem.”—Bulletin of the Atomic Scientists.
“Insaed last ten years iumi experiencem haest record blo olketa storm, forest fire, drought, coral bleaching, heat wave, and flood raonem world.”—National Geographic.
“Locust wea spoelem staka ples lo Africa hem worst tumas winim olketa year wea go pas.”—The Associated Press.
Hao, earth bae distroe lo wanfala apocalypse wea bae kasem evriwea lo world? Wat nao Bible talem?
Hao, planet earth bae distroe?
Nomoa. Word blo God, Bible, promisim dat earth bae stap for olowe. (Ecclesiastes 1:4) God bae no distroem disfala earth wea hem creatim, bat hem bae “finisim olketa wea spoelem earth.”—Revelation 11:18.
Hao, end blo world hem klosap?
Bible teachim dat “world” wea bae finis hem olketa man wea disobeyim God and aftarem nomoa samting wea olketa seleva laekem. Olsem God duim lo taem blo Noah, hem bae finisim “pipol wea no obeyim hem.”—2 Peter 2:5; 3:7.
Lo 1 John 2:17 hem sei, “world bae finis and evri samting wea pipol lo world laekem bae finis tu.” Disfala verse showim dat God bae no distroem disfala planet earth, bat hem bae distroem pipol wea gohed for duim olketa samting wea no stret.
Wat taem nao bae end kam?
Bible no talem taem wea end bae kam. (Matthew 24:36) Bat, hem showim dat end hem klosap. Bible profesi abaotem olketa samting hia:
Olketa samting olsem war, bigfala hangere, epidemic, and olketa strong earthquake bae happen lo “staka ples.”—Matthew 24:3, 7, 14; Luke 21:10, 11; Revelation 6:1-8.
Staka pipol bae barava selfish. Olsem example, olketa bae “laekem tumas selen,” “no savve tinghae,” and “no savve kontrolem seleva.”—2 Timothy 3:1-5.
Staka pipol agree dat since year 1914, evriting wea happen lo world hem barava semsem witim wat Bible profesi abaotem and dat end hem klosap. For moa information, lukim olketa article “What Does Bible Chronology Indicate About the Year 1914?” and “What Is the Sign of ‘the Last Days,’ or ‘End Times’?”
Wat nao datfala word “apocalypse” lo Bible hem minim?
Original Greek word wea olketa transleitim “apocalypse” lo Bible hem minim for “aotem kava” or “showim samting wea haed.” Staka taem word hia storyim wei for talemaot information wea hem haed. Bible story tu abaotem revelation [or, apocalypse] blo Lord Jesus, wea happen ‘taem Jesus showaot’ olsem man wea garem paoa for finisim evri wicked samting from disfala earth and givim reward lo olketa wea worshipim God.—2 Thessalonians 1:6, 7; 1 Peter 1:7, 13.
Nem blo last buk lo Bible hem A·po·kaʹly·psis, or Revelation, bikos hem showim olketa samting wea bae happen lo future. (Revelation 1:1) Buk hia storyim gud nius and wanfala message wea givim hope. (Revelation 1:3) Hem showim dat God bae finisim evri injustice and mekem disfala earth kamap paradaes. Lo datfala taem, olketa man bae no experiencem pain, safaring, or dae tu.—Revelation 21:3, 4.
Hao, iu laekem moa information abaotem olketa naesfala promis hia lo Bible? Olketa Jehovah’s Witness offerim free Bible study program wea savve helpem iu. Plis contactim olketa.