Waswe, Bae Terrorism Finis?

Staka pipol lo world raf tumas and samfala duim terrorism for mekem pipol fraet and for changem samting saed lo politik, religion, or lo community. Taem iu herem nius abaotem wanfala terrorist attak, maet iu garem samfala kwestin olsem: ‘Waswe, God hem tingim pipol tu? Why nao olketa nogud samting olsem hem happen? Waswe, bae terrorism finis? Hao bae mi garem normal laef taem mi olowe fraetem diswan?’ Bible garem olketa gudfala ansa for olketa kwestin olsem.

Wanem nao tingting blo God abaotem terrorism?

God hem heitim raf fasin and terrorism. (Sams 11:5; Provebs 6:16, 17) And Jesus, wea God nao sendem hem kam, tok strong lo olketa disaepol blo hem taem olketa duim raf samting. (Matthew 26:50-52) Nomata samfala pipol sei olketa duim olketa raf samting lo nem blo God, Hem no appruvim samting olketa duim, and hem nating herem prea blo olketa.—Aesaea 1:15.

God luksavve and tingim evriwan wea safa, and olketa wea safa lo olketa terrorist attak tu. (Sams 31:7; 1 Peter 5:7) Bible showimaot tu hem plan blo God for finisim raf fasin.—Aesaea 60:18.

Wanem nao bihaenem raf fasin?

Bible storyim wanem nao kosim terrorism. Hem sei rul blo olketa man kosim pipol for safa. (Eklesiastes 8:9) From bifor kam, pipol wea garem paoa iusim terrorism for kontrolem and spoelem narawan. Then samfala hia wea safa iusim terrorism for changem bak datwan.—Eklesiastes 7:7.

Hao terrorism bae finis

God hem promis for finisim raf fasin and evri samting wea mekem iumi fraet and for mekem peace kamap lo earth. (Aesaea 32:18; Maeka 4:3, 4) Hem bae:

Aotem samting wea kosim terrorism. God bae changem olketa gavman blo man witim gavman blo hem wea bae rul ovarem full earth. Jesus Christ wea hem ruler blo disfala gavman, bae hem finisim raf fasin and wei wea pipol spoelem narawan, and bae hem deal witim evriwan lo stretfala wei. (Sams 72:2, 14) Lo datfala taem, no eniwan bae duim terrorism. “Bae [pipol] ya i hapi, bikos olketa stap gudfala.”—Sams 37:10, 11.
Healim olketa wea safa from terrorism. God bae healim pipol wea safa from terrorism, nomata datwan hem saed lo body or lo feeling. (Aesaea 65:17; Revelation 21:3, 4) Hem promis tu for mekem olketa wea dae finis for laef bak lo earth wea fulap lo peace.—John 5:28, 29.

Bible showimaot klosap nao God bae duim olketa samting hia. Bat maet iu garem kwestin olsem, ‘Why nao God no finisim terrorism yet?’ For kasem ansa, lukluk lo disfala video Why Nao God Letem Wei for Safa Gohed?

Bible helpem pipol for deal witim samting wea happen

Tingim tufala samting wea Bible encouragem iumi for duim wea savve help.

Prea lo God.—Philippi 4:6, 7.
Tingim evritaem hope wea Bible storyim.—Hebrew 6:19.

For kasem samfala help moa from Bible, lukim datfala article “How to Control Worry.”

Olketa Jehovah’s Witness wea safa lo terrorism kasem sapot from olketa nara Christian. Tingim tufala example:

Natalya and boy blo hem Aslan wea hem naen year nomoa, stap lo wanfala skul lo Beslan, Russia, taem olketa terrorist wea holem gun kam insaed skul and holem winim 1,000 pipol olsem prisoner. Olketa killim dae plande handred pipol, and big haf lo olketa nao hem olketa pikinini. Nomata Natalya and Aslan no dae, olketa barava safa from samting wea happen. Lukim wanem nao helpem olketa for gud bak.
Son blo Pablo and Sophie hem dae lo datfala terrorist attak lo Twin Towers lo New York. Lukim disfala video for faendaot wanem nao helpem olketa and olketa narawan wea safa lo terrorism.