Safety blo Olketa Woman​—Samting wea Bible Talem

“Taem mi smol pikinini, evriday brata blo mi abusim mi physically and verbally. Afta mi marit, mami-in-law assaultim mi tu. Hem and dadi-in-law mekem mi slave for olketa. Gogo, mi laek suisaed.”—Madhu,a India.

World Health Organization reportim hao “violence againstim olketa woman hem happen evriwea lo world.” Hem estimatem wanfala aot lo thrifala woman experiencem physical or sexual violence.

If datwan happen lo iu, eniwea iu go, maet iu no feel sef from samwan maet abusim iu verbally, physically, or sexually. From iu wanfala woman and iu experiencem violence and pipol treatim iu nogud, maet iu feel lo tingting blo staka pipol ‘Olketa woman no important.’ Bat hao, olketa woman important lo God?

Wat nao tingting blo God abaotem olketa woman?

Scripture: “[God] creatim wanfala man and wanfala woman.”—Genesis 1:27.

Mining: God creatim male and female. Lo tingting blo hem, evriwan fit for kasem respect. Hem expectim tu hasband for “lovem waef blo hem olsem hem lovem hemseleva,” and no kontrolem waef lo wei for tok raf or violent. (Ephesians 5:33; Colossians 3:19) Datwan showim safety blo olketa woman hem important lo God.

“Taem mi smol pikinini, olketa relative sexually abusim mi. Taem mi 17 years old, boss threatenim mi dat hem bae sakem mi, if mi no duim sex witim hem. Taem mi adult, hasband, parents, and olketa neiba nating respectim mi. Bat gogo mi lane abaotem Jehovah,b wea hem Creator. Hem respectim olketa woman. Datwan mekem mi sure hem lovem mi, and mi barava spesol lo eye blo hem.”—Maria, Argentina.

Wat nao savve helpem iu for heal emotionally?

Scripture: “Wanfala fren hem stap wea hem lovem iu winim brata blo iu.”—Proverbs 18:24.

Mining: Wanfala tru fren bae sapotim iu. If iu needim help, storyim feeling blo iu lo samwan wea iu trustim.

“For 20 years mi no talem eniwan hao samwan abusim mi sexually. From datwan mi no hapi, wari, and depress. Bat taem mi storyim wat mi experiencem lo samwan wea willing for lisin, mi barava feel gud tumas.”—Elif, Türkiye.

Scripture: “Torowem evri wari blo iufala go lo [God] bikos hem kea for iufala.”—1 Peter 5:7.

Mining: Taem iu prea lo God, hem really lisin lo iu. (Psalm 55:22; 65:2) From hem kea for iu, hem savve helpem iu for understandim hao iu barava spesol lo hem.

“Taem mi lane abaotem Jehovah, datwan helpem mi for start heal from olketa deep emotional wound blo mi. Distaem mi savve prea lo God, and storyim evriting lo hem. Hem wanfala fren wea really understandim feeling blo mi.”—Ana, Belize.

Hao, enitaem bae God stopem wei wea pipol treatim nogud olketa woman?

Scripture: ‘Jehovah bae mekem pikinini wea no garem dadi, and olketa wea pipol spoelem olketa for kasem justice, mekem no enitaem moa man lo earth wea savve dae mekem olketa for fraet.’—Psalm 10:​17, 18.

Mining: Klosap nao God bae finisim injustice wea includim cruelty, and violence againstim olketa woman.

“For savve dat klosap nao Jehovah bae finisim wei for treatim nogud olketa woman and young gele, hem olsem wanfala naes medicine. Datwan mekem mi garem peace lo mind.”—Roberta, Mexico.

For lanem moa samting abaotem hao Bible hem givim hope, why iu savve trustim olketa promis lo Bible, and hao Olketa Jehovah’s Witness iusim Bible for helpem iu distaem, iu savve ask for samwan visitim iu.

Daonlodim disfala tract.