Namba blo Pipol wea Lonely Increase​—Wat Nao Bible Sei?

Wanfala recent global report a sei samting olsem wan person lo fofala pipol feel lonely.

• “Eniwan, eniwan lo eni age grup, eniwan lo eni ples, maet no garem frens and no in contact witim nara pipol.”​—Chido Mpemba, cochair blo World Health Organization Commission abaotem Social Connection.

Staka tingse old pipol, or olketa wea stap seleva nomoa savve lonely, bat young pipol, olketa wea healthy, olketa wea garem gud laef, and marit tu savve lonely. Samwan wea no in contact witim olketa narawan, and hem lonely savve affectim physical and emotional health blo hem.

• Doctor Vivek Murthy, U.S. surgeon general sei: “Samwan wea lonely no just feel nogud nomoa.” Hem sei tu: “Hem isi tumas for samwan wea no garem frens, and no in contact witim olketa narawan for dae olsem samwan wea smokem samting olsem 15 cirgarette each day.”

Wat nao Bible sei?

Creator laekem iumi for garem frens, and for in contact witim olketa narawan. Taem God creatim first man and woman, hem purpose blo hem for tufala hapi, and enjoyim wei for fren gud tugeta.

• Bible principle: “God sei: ‘Hem nogud for man hia stap seleva.’”​—Genesis 2:18.

God laekem iumi for fren witim hem. Hem promis for fren gud witim iumi, if iumi traem best for fren gud witim hem.​—James 4:8.

• Bible principle: “Olketa wea luksavve olketa needim God bae hapi, bikos Kingdom bilong God hem bilong olketa.”​—Matthew 5:3.

God laekem iumi and olketa narawan for worshipim hem tugeta. Taem iumi duim olsem, iumi bae hapi.

• Bible principle: “Iumi mas barava tingim narawan mekem iumi savve encouragem olketa for showimaot love and duim olketa gudfala samting. No misstim wei for hipap tugeta, . . . bat encouragem narawan.”​—Hebrew 10:24, 25.

Iu savve lanem nara information abaotem hao for cope witim wei for lonely, readim article “Wei for Lonely Happen Evriwea—​Hao Nao for Deal Witim?”