OLKETA KWESTIN WEA YOUNG PIPOL GAREM
Wat Nao Mi Shud Savve Abaotem Texting?
:-) If iu iusim lo wise wei, texting hem gudfala wei for keep in touch witim frens and famili.
:-( If iu iusim lo careless wei, hem savve spoelem frenship blo iu witim others and reputation blo iu.
Disfala article bae storyim wat iu need for savve abaotem
And disfala article hem garem tu:
Hu iu textim
Staka teenager ting lo texting olsem important wei for communicate. Texting hem mekem iu for keep in touch witim eniwan and evriwan lo contact list blo iu, if parents blo iu allowim.
“Dadi blo mi no allowim mi and sista blo mi for textim olketa boy. If mitufala laek story witim olketa, mitufala mas iusim landline phone lo living rum, wea olketa narawan tu savve herem conversation blo mifala.”—Lenore, 18 years old.
Wat iu shud savve: Hem risky if iu givim phone namba blo iu lo eniwan nomoa.
“If iu no careful lo hu nao savve lo namba blo iu, maet iu savve receivim olketa message or piksa wea nogud.”—Scott, 18 years old.
“If iu evritaem textim wanfala boy or wanfala gele, hem isi for iu start garem feeling for laekem hem.”—Steven, 17 years old.
Bible sei: “Wise man hem lukim danger and hem haed from datwan.” (Proverbs 22:3) If iu careful, iu savve protectim iuseleva from staka trabol.
Tru story: “Mi frens witim wanfala boy, and mitufala textim each other olowe. Mi tingse mitufala gud frens nomoa. Mi ting diswan hem normal samting, bat seke hem talem dat hem laekem mi. Taem mi ting bak, mi realizim dat mi shud no spendem staka taem witim hem, and mi shud no textim hem olowe tu.”—Melinda, 18 years old.
Tingim: Afta datfala boy hem talem feeling blo hem lo Melinda, iu ting hao nao datwan affectim frenship blo tufala?
Start again! If Melinda savve start again mekem hem and datfala boy gud frens nomoa, wat nao Melinda shud duim lo first ples?
Wat iu textim
Hem isi tumas for sendem olketa text message and iu hapi for receivim, bat hem isi tu for forgetim dat others savve minim rong text message blo iu.
Wat iu shud savve: Others savve minim rong olketa words wea iu iusim lo text.
“Saed lo texting, hard for iu savve lo emotions and tone lo voice blo person wea textim iu, nomata hem iusim emoticons or text symbol. Diswan savve kosim misunderstanding.”—Briana, 16 years old.
“Mi savve lo samfala gele wea spoelem reputation blo olketa and pipol ting lo olketa olsem olketa gele for flirt, bikos lo olketa text wea olketa sendem lo olketa boys.”—Laura, 18 years old.
Bible sei: “Gud pipol tingting firstaem bifor olketa ansa.” (Proverbs 15:28, Good News Translation) Wat nao leson? Readim bak message blo iu bifor iu pressim “Send”!
Raet taem for iu text
Iusim gudfala tingting for helpem iu developim own standards blo iu saed lo texting, wea nem wea samfala iusim for diswan, hem texting etiquette.
Wat iu shud savve: If iu no careful lo manners blo iu saed lo texting, others bae ting iu rude and instead for frens witim iu bae olketa ghostim iu.
“Hem isi for forget abaotem texting etiquette. Samfala taem, taem mi story witim samwan or taem mi sidaon lo tebol for dinner witim samfala, lo semtaem mi gohed text tu.”—Allison, 24 years old.
“Hem dangerous tumas for text taem iu draev. If iu lukluk lo phone, bae hem isi for iu accident.”—Anne, 21 years old.
Bible sei: “Taem hem stap for evri samting, . . . taem for no toktok and taem for toktok.” (Ecclesiastes 3:1, 7) Disfala principle hem fitim tu saed lo texting and no just saed lo toktok nomoa!
Texting tips
Hu iu textim
;-) Obeyim olketa rul blo parents blo iu.—Colossians 3:20.
;-) Mas chusim hu nao bae iu givim phone namba blo iu lo hem. Taem iu lane for politely refuse for givim personal information blo iu lo eniwan, wea datwan includim phone namba blo iu, iu developim wanfala gud skill wea iu bae needim taem iu adult.
;-) Mas careful lo olketa text message wea iu sendem nogud hem herem olsem iu flirt. If iu start for laekem datfala person wea iu textim, bae iu frustrate and hatsoa nomoa.
“Mi garem gud record witim parents blo mi lo hao mi iusim mobile phone blo mi, so tufala trustim mi for mekem wise disison abaotem namba blo hu nao mi putim lo contact list blo mi.”—Briana.
Wat iu textim
;-) Bifor iu start for typem message blo iu, askem disfala kwestin, ‘Lo disfala situation, hao, text message nao hem stret wei for communicate?’ Maet hem beta for ringim hem or weit for story feis tu feis.
;-) No textim eniting wea hard for iu talem feis tu feis. Sarah wea 23 years old, hem sei: “If iu no savve talem wanfala samting feis tu feis, then iu shud no sendem lo text message.”
“If samwan sendem olketa nogud piksa lo iu, talem lo parents blo iu. Datwan bae protectim iu and mekem parents blo iu for trustim iu tu.”—Sirvan, 22 years old.
Raet taem for iu text
;-) Disaedem in advance wat taem nao bae iu no iusim phone blo iu. Wanfala gele wea nem blo hem Olivia sei: “Mi putim away phone blo mi taem mifala sidaon lo tebol for dinner or taem mi study. Mi offem during olketa Christian meeting mekem mi no tempted for luk lo hem.”
;-) Tingim feeling blo others. (Philippians 2:4) Taem iu story feis tu feis witim others, hem no taem for textim samwan.
“Mi garem olketa standard wea miseleva followim, olsem for no textim eniwan taem mi sidaon witim olketa frens, unless hem necessary. And tu, mi no givim namba blo mi lo eniwan wea mi no klos lo hem.”—Janelly, 20 years old.