Waswe, Olketa Jehovah’s Witness Wanfala Cult?

Nomoa, Olketa Jehovah’s Witness no wanfala cult. Mifala olketa Christian wea traem best for followim example blo Jesus Christ and for live followim olketa teaching blo hem.

Wanem nao wanfala cult?

No evriwan minim disfala word “cult” lo sem wei. Nomata olsem, tingim tufala difren tingting wea pipol garem abaotem datfala word. Tingim tu why nao datfala word “cult” hem no fitim mifala.

• Samfala pipol tingse cult hem minim wanfala niu religion or religion wea barava difren and no stret. Olketa Jehovah’s Witness no startim wanfala niu religion. Wei wea mifala worship hem followim example blo olketa first Christian bifor. Information abaotem olketa Christian hia and teaching blo olketa hem stap insaed Bible. (2 Timothy 3:​16, 17) Lo tingting blo mifala, Bible nao talem wanem hem stret saed lo worship.

• Samfala pipol tingse cult hem minim wanfala nogud religion wea spoelem pipol, wea wanfala man nao leadim. Olketa Jehovah’s Witness no ting lo eni man lo earth olsem leader blo olketa. Mifala followim wanem Jesus talem olketa disaepol blo hem taem hem sei: “Wanfala Leader nomoa iufala garem, and hem nao Christ.”​—Matthew 23:10.

Olketa Jehovah’s Witness nating olsem wanfala cult. Wei wea mifala worship mekem mifala kasem gud samting and hem helpem tu pipol lo community. Olsem example, ministry blo mifala helpem staka pipol finis for lusim wei for depend lo olketa nogud samting olsem drug and alcohol. Mifala garem olketa class wea helpem staka thousand pipol raonem world lane for read and raet. And tu, mifala duim relief waka lo taem blo disaster. Mifala traem best for duim gud samting lo olketa narawan, olsem Jesus talem olketa follower blo hem for duim.​—Matthew 5:​13-​16.