Jesus Hem Luk Hao?
Ansa from Bible
No eniwan barava savve lo hao Jesus luk, bikos Bible no storyim datwan. Diswan showim hao Jesus hem luk hem no important. Nomata olsem, Bible storyim samfala samting wea givim iumi idea lo hao Jesus hem luk.
Hao hem luk: From mami blo Jesus hem wanfala Jew, maet Jesus luk olsem olketa Jew. (Hebrew 7:14) Luk olsem hem no barava luk difren from olketa narawan. Example, wantaem Jesus wakabaot haed from Galilee go lo Jerusalem bat pipol nating luksavve lo hem. (John 7:10, 11) And luk olsem, Jesus no luk difren tu from olketa aposol blo hem. Tingim, Judas mas showim Jesus lo datfala big sekson wea kam for arrestim Jesus.—Matthew 26:47-49.
Hair: Luk olsem, Jesus no garem long hair, bikos Bible sei “hem no stret for man garem longfala hair.”—1 Corinth 11:14.
Beard: Jesus garem beard. Hem followim law blo olketa Jew wea stopem olketa man for ‘pulumaot hea long biad blong olketa.’ (Levitikas 19:27, 28; Galatia 4:4) Bible storyim tu beard blo Jesus lo wanfala profesi wea storyim taem wea pipol bae mekem hem safa.—Aesaea 50:6.
Body: Olketa samting wea Bible storyim abaotem Jesus wea showim hem wanfala strong man. Hem wakabaot for staka handred kilometer taem hem duim ministry blo hem. (Matthew 9:35) Jesus klinim temple blo olketa Jew tufala taem. Hem kapsaetem tebol blo olketa wea changem olketa difren selen, and iusim wanfala whip for raosem olketa animal from temple. (Luke 19:45, 46; John 2:14, 15) McClintock and Strong’s Cyclopedia sei: “Evri samting wea olketa gospel storyim abaotem [Jesus] showim hem wanfala strong and healthy man.”—Volume IV, page 884.
Feis: Jesus hem kaen and tingim pipol, and datwan mas showaot lo feis blo hem. (Matthew 11:28, 29) Evri difren kaen pipol lukaotem hem for helpem and comfortim olketa. (Luke 5:12, 13; 7:37, 38) Nomata olketa pikinini tu bat feel free for stap witim Jesus.—Matthew 19:13-15; Mark 9:35-37.
Tingting wea no stret wea pipol garem abaotem hao Jesus hem luk
Tingting wea no stret: Samfala pipol sei Jesus mas kam from laen blo olketa lo Africa bikos Bible buk Revelation sei hair blo Jesus hem olsem wool and leg blo hem olsem “bronze wea shaen tumas.”—Revelation 1:14, 15, The New Jerusalem Bible.
Tru samting: Bible buk Revelation storyim “olketa samting wea piksarem olketa [nara] samting.” (Revelation 1:1) Samting wea Bible storyim abaotem hair and leg blo Jesus hem piksarem olketa wei blo Jesus bihaen hem resurrect, hem no hao Jesus hem luk taem hem stap lo earth. Taem Revelation 1:14 sei hair blo Jesus hem “white olsem wool and olsem snow,” hem no storyim wat kaen hair nao Jesus garem. Bat hem storyim kala lo hair blo Jesus, wea piksarem wisdom blo hem from hem stap longtaem finis.—Revelation 3:14.
Leg blo Jesus luk “olsem copper wea shaen tumas taem hem barava hot insaed long fire.” (Revelation 1:15) Feis blo hem tu hem “olsem sun taem hem shaen braet tumas.” (Revelation 1:16) From no eni pipol lo earth garem skin kala wea tufala verse hia storyim, samting wea insaed disfala vision mas piksarem nara samting. Datfala vision hem abaotem Jesus wea laef bak, wea “stap long ples wea barava braet [wea] no eniwan savve kam long hem.”—1 Timothy 6:16.
Tingting wea no stret: Jesus hem wik and nating strong.
Tru samting: Jesus hem man wea no fraet and strong. Example nao, taem wanfala big sekson kam for arrestim hem, hem no fraet for talem hem nao olketa lukaotem. (John 18:4-8) Jesus hem mas wanfala strong man tu from hem no iusim olketa electrical tul taem hem duim carpenter waka.—Mark 6:3.
Sapos olsem, why nao hem needim eniwan for karem post wea bae olketa nilam hem lo hem? And why nao hem dae firstaem lo tufala criminal lo saed blo hem? (Luke 23:26; John 19:31-33) Bifor olketa killim dae Jesus, body blo hem barava wik tumas. For full naet hem no sleep bikos hem wari tumas. (Luke 22:42-44) Lo datfala naet olketa Jew barava spoelem Jesus, then lo morning olketa soldia blo Rome killim hem nogud. (Matthew 26:67, 68; John 19:1-3) Luk olsem olketa samting hia nao mekem hem dae kwiktaem.
Tingting wea no stret: Jesus evritaem luk serious and sorre.
Tru samting: Jesus barava tekem olketa wei blo Dadi blo hem lo heven, Jehovah, wea Bible sei hem “datfala hapi God.” (1 Timothy 1:11; John 14:9) Tru samting nao, Jesus teachim olketa narawan samting wea olketa savve duim for hapi. (Matthew 5:3-9; Luke 11:28) Olketa samting hia wea Bible storyim, showim Jesus hem hapi evritaem and hem showaot lo feis blo hem.