HELP FOR FAMILI
Hao for Showimaot Love Long Marit Partner
Samfala hasband and waef no gohed strong for showimaot love long each other bihaen olketa marit for samfala year. Sapos diswan happen long marit bilong iu, waswe, iu shud duim samting abaotem datwan?
Wanem iu shud savve
Hem barava important for showimaot love long marit partner. Long sem wei wea man mas gohed kaikai and drink for keepim body strong and healthy, hasband and waef mas gohed showimaot love long each other for strongim marit bilong tufala. Nomata staka year go pas bihaen marit, hasband and waef mas gohed talem love wea tufala garem for each other.
Trufala love no selfish. Man wea garem love hem laek for mekem narawan hapi. So, hasband or waef wea tingim partner bilong hem bae luksavve long need bilong partner bilong hem and trae for givim long partner wanem hem needim.
Waef nao need for herem olketa naes toktok staka taem winim hasband. Maet wanfala hasband lovem tumas waef bilong hem. Bat sapos hem talem waef hem lovem hem long morning and evening, or bifor hem redi for sex witim waef nomoa, bae waef no sure sapos hem barava lovem hem. Hem gud tumas for gohed talemaot love bilong iu enitaem long day.
Wanem iu savve duim
Showimaot love long toktok. Taem iu sei long hasband or waef, “Mi lovem iu” or “Iu barava spesol long mi,” datwan bae mekem hem sure iu barava lovem hem.
Bible principle: “Samting wea man tingting tumas abaotem nao bae hem storyim.”—Matthew 12:34.
Idea: Iu savve talemaot love bilong iu, bat hem gud tu for iu raetem note, sendem e-mail, or text message.
Showimaot love long akson. Sapos iu hagem, kissim, or holem hand bilong hasband or waef bilong iu datwan savve showimaot iu tok tru taem iu sei, “Mi lovem iu.” Iu savve showimaot iu kea tu taem iu tasim and luk long hem long kaenfala wei, or givim hem present. And hao sapos iu savve helpem waef long samfala samting olsem, for karem basket bilong hem, openem door for hem, wasim pleit, waswas kaleko, or kuki? Taem hasband duim olsem, staka waef bae ting long diswan olsem hasband barava lovem hem!
Bible principle: “Love bilong iumi mas no showaot long samting wea iumi talem nomoa, bat hem mas showaot long samting wea iumi duim.”—1 John 3:18.
Idea: Gohed treatim gud partner bilong iu olsem long taem wea iutufala start fren.
Markem taem for each other. For iu stap seleva witim partner bilong iu samfala taem savve strongim marit and partner bae luksavve iu hapi for stap witim hem. Bat, maet hem no isi for markem taem for iutufala stap seleva sapos iu garem pikinini or sapos iu garem staka nara samting wea iu need for storyim evriday. Maet iutufala savve plan for wakabaot seleva for exercise evritaem.
Bible principle: “Luksavve long olketa samting wea barava important.”—Philippi 1:10.
Idea: Samfala hasband and waef wea garem busy schedule markem samfala evening or samfala weekend for spendem taem tugeta.
Savve gud long partner bilong iu. Hao evriwan laek for kasem love hem no semsem. Iutufala savve storyim tugeta hao each wan laekem narawan for showimaot love long hem and sapos iutufala need for showimaot moa. Then, duim best for givim long partner wanem hem needim. No forgetim, wei for showimaot love long each other savve strongim marit.
Bible principle: “Man wea garem love hem . . . no tingim hemseleva nomoa.”—1 Corinth 13:4, 5.
Idea: Winim wei for laekem partner nao for showimaot love, tingim diswan, ‘Wanem nao mi savve duim mekem partner bilong mi barava lovem mi?’