Dream For Flae

“EVRI machine for flae, kwiktaem nomoa pruvim toktok wea kamap taem iumi young, ‘Samting wea go ap mas kam daon.’”

Hem nao start bilong wanfala story bilong daot wea kamap long The New York Times long May 25, 1908—no winim faev year bihaen firstfala taem wea tufala Wright brata flae long Kitty Hawk, North Carolina, U.S.A. From hem daotem yet gud saed bilong olketa niufala “machine for flae” hia wea start for muv raon long skae, man wea raet hia hem say hao “no staka long iumi nomoa bae laek for float long air wea hae tumas from graon.” Nomata hem luksavvy hao olketa long future genereson maet laek for travel long air, disfala article say hao “dream for garem olketa big passenger aeroplane wea savvy flae farawe . . . maet no savvy kamap tru.”

Datfala tingting kamap rong tumas! Distaem, winim wan billion passenger flae long “passenger aeroplane wea savvy flae farawe.” Tru nao, insaed wanfala century, olketa aeroplane change from olketa machine wea olketa workim from timber and kaleko long start bilong disfala century, and kamap olketa stael aeroplane distaem wea garem computer, wea flae ten kilometer antap long earth and karim planti hundred passenger wea stap gud insaed taem olketa go long evrikaen ples.

Way wea technology bilong way for flae hem kwiktaem muv ahed insaed mek-20 century hem barava narawe nao and hem barava changim world bilong iumi. For tok stret, iumi savvy lukim hao interest bilong man for bossim skae hem no start long olketa year wea just go pas—or olketa century wea just go pas tu. Way for man flae hem wanfala dream wea man aftarem start long taem bifor kam.

[Piksa long page 2, 3]

Lockheed SR-71 Blackbird, jet wea fast winim eniwan long world, kasem samting olsem 3,540 k.p.h.

[Piksa long page 3]

Boeing Stratoliner 307, c. 1940, 33 passenger, speed kasem 346 k.p.h.

[Credit Line]

Boeing Company Archives

[Piksa long page 3]

“Flyer” bilong tufala Wright brata, 1903

[Credit Line]

U.S. National Archives photo