Hao Sef Nao Olketa Plane?

INSAED wan year samting olsem haf million pipol dae long olketa road bilong world. Long narasaed, namba bilong dae from accident long plane long 1996 hem 1,945. Long 1997 total hem daon kasem 1,226. Record bilong Boeing kampani showimaot hao “long evri 1 million jet wea flae, klosap tufala plane nomoa savvy banga.”

Nomata olsem, hem big story tumas sapos eni aeroplane banga, but dae from olketa road accident hem olsem samting nating nomoa. Long United States, travel long bus nomoa hem luk olsem lelebet sef winim plane.

Why nao planti taem plane hem sef winim kar? Wanfala klia reason hem hao olketa plane no flae klosap long narawan olsem olketa trak. Nara reason hem from planti airline crew garem moa training and olketa barava tinghevi long work bilong olketa. Planti taem, kapten bilong Boeing 747 hem winim 50 year finis and bin garem 30 year experience for flae. Safety nao hem main work bilong evri crew member. Sapos nomoa, laef bilong olketa seleva tu stap long danger.

Safety Long Cabin Bilong Pilot

Sapos iu lukluk gud insaed long cabin bilong pilot long olketa passenger plane, bae iu lukim hao evri main equipment garem spare wan—wanfala set long left saed for kapten and nara set long raet saed for mek-tu pilot.a Dastawe, olsem The Air Traveler’s Handbook hem talem, “sapos seknomoa wanfala pilot hem faint, narawan garem evri equipment wea hem needim for flae sef. Taem hem flae, pilot savvy lukluk long olketa meter bilong narawan, for mek sure tufala meter evriwan givim sem report.”

Nara samting long cabin bilong pilot for mek sure long safety, hem way wea main pilot and mek-tu pilot planti taem kaikaim different kaikai. Why nao olsem? Sapos kaikai mekem wanfala hem sik, narawan bae gud nomoa.

For barava mek sure long olketa part bilong plane wea mas muv olsem olketa flap, landing gear, and olketa brake, “olketa plane planti taem garem tufala or moa hydraulic system, nogud wanfala brekdaon.” Way for garem mek-tu or mek-three system hem wanfala safety mark bilong staka plane distaem.

Wanem Nao Iu Savvy Duim?

Samfala simple idea wea evri passenger savvy duim for safety: Readim instruction card abaotem taem bilong emergency, and listen taem olketa flight attendant story long taem plane start for flae abaotem wanem for duim. Taem iu sidaon, luk raon for savvy wea nao exit door wea klosap. And sapos trabel kamap, followim instruction bilong olketa flight attendant. Olketa evriwan kasem bigfala training for deal withim trabel, sapos hem kamap. Taem olketa givim instruction, hem barava important for olketa passenger for muv kwiktaem and no worry for tekem olketa samting bilong olketa. Laef nao important winim olketa nara samting.

Olketa plane distaem planti taem flae antap or raonem olketa nogud weather, so planti long olketa gogo wea farawe hem kamap smooth nomoa. From diswan, tu-three pipol nomoa savvy feel nogud. Planti taem kapten bae talem passenger for taetem seat belt for standbae nomoa sapos hem tingsay weather bae raf.

Waswe, way for travel savvy kamap moa sef? Ansa hem yes. But staka passenger bae no laekem olketa change wea mas kamap. Wanem nao olketa? Mekem olketa passenger face go bihaen and no long front. Wanem gud samting nao diswan bae duim? Olketa passenger bae garem bigfala ples for supportim backsaed sapos seknomoa plane mas barava slow daon. Diswan hem sef winim wanfala seat belt wea krosim bele nomoa, wea no olsem kar wea garem nara belt moa krosim chest. But, pipol laek for lukim wea nao olketa go winim wea olketa kam from!

Fraet for Flae?

Olketa tingsay wanfala insaed evri sixfala man long United States fraet for flae. Long samfala diswan hem no fraet nomoa—hem phobia, wanfala nogud fraet wea savvy mekem man seksek enikaen. Wanem nao savvy help?

For kamap wanfala passenger wea meanim gud olketa samting savvy katem daon worry. Evri year raonem world samting olsem 15,000 machine for flae work long klosap 10,000 airport for karim winim 1.2 billion pipol and no staka accident kamap. “Olsem Lloyd insurance kampani long London hem talem, hem 25 taem moa sef for travel long air winim kar.”

Sapos iu fraet for travel long air, readim samfala buk abaotem way for flae, plane, and training bilong pilot. Read abaotem haefala standard bilong training wea olketa pilot mas kasem and olketa rul wea olketa followim saed long haomas hour for sleep, haomas alcohol nomoa olketa savvy tekem sapos olketa mas flae, and olketa drug test wea savvy kamap enitaem for olketa. And tu olketa pilot mas pasim tufala test insaed wan year long wanfala machine wea olsem aeroplane for checkim hao kwik nao olketa savvy duim samting sapos emergency kamap. From olketa machine hia barava olsem really plane, samfala pilot “barava seksek and sweat narawe” taem olketa kamaot from hem. Sapos pilot hem failim disfala test long machine, hem savvy lusim license bilong hem for flaem bisnis plane.

Olketa standard hia hem barava hae winim olketa standard wea olketa draeva bilong kar mas followim. Dastawe, sapos iu meanim moa samting abaotem olketa plane and olketa pilot, trust bilong iu long olketa bae grow.

Hem bae gud tu sapos iu savvy visitim wanfala airport. Lukim wanem olketa passenger mas duim, and lukluk gud long wanem pipol duim. Bae iu lukim hao staka man kamaot from plane olsem olketa kamaot from bus nomoa. Travel long air hem gud nomoa. Lukim olketa plane tek-off and land. Meanim and ting raonem olketa science principle bilong way for flae wea mekem aeroplane fit for flae and sef.

Taem iu flae for firstfala taem, talem flight attendant hao diswan hem firstaem bilong iu insaed long plane and hao iu maet fraet lelebet. Olketa savvy tumas hao for helpem iu for relax and for garem trust. Trae for relax. Sapos kapten hem say hem OK for wakabaot, standap and wakabaot insaed plane. Diswan maet mekem iu winim fraet bilong iu long way for flae!

[Footnote]

[Caption long page 11]

“Olsem Lloyd’s of London [insurance kampani] hem talem, hem 25 taem moa sef for travel long air winim kar”

[Olketa piksa long page 12]

Way for relax savvy mekem iu enjoyim way for flae

[Credit Line long page 10]

Photograph courtesy of Boeing Aircraft Company