Olketa Masol—Nambawan Design
WAY for muv hem mekem laef go ahed. Example, chest bilong iu hem muv ap and daon taem iu breathe, and heart bilong iu hem pump semsem evritaem, mekem iu laef. Wanem nao kosim way for muv olsem? Olketa masol!
Masol nao barava strongfala tissue wea olsem rubber, wea mekem different part long body bilong iu work and mekem iu showimaot tingting and feeling thru long akson bilong iu. Nomata akson hia hem for smile, laflaf, krae, toktok, wakabaot, ranran, work, play, read, or kaikai, olketa masol nao insaed. Klosap evri samting iu duim hem needim masol.
Samting olsem 650 masol nao insaed body bilong iu. Masol wea small tumas stap long barava small bon insaed long ear. Big wan winim evriwan nao gluteus masol wea stap long as, wea muvim leg. Fifti percent long hevi bilong body bilong man hem masol and long body bilong woman hem 33 percent. Olketa masol hia garem design for duim work. Professor Gerald H. Pollack storyim olketa olsem “engine bilong body” and ‘evriday olketa changim energy for kamap way for muv wea winim evri engine, and trak tu.’
Nomata taem iu rest, olketa masol bilong iu standbae nomoa—ready for duim eniting. Evritaem, samfala fiber insaed masol bilong iu work. Sapos diswan no happen, mouth bilong iu bae hang open and no eni samting bae supportim olketa organ insaed body. Nomata taem iu standap or sidaon, masol bilong iu muv for helpem iu sidaon stret or mekem iu no falldaon from chair.
Olketa Different Kaen Masol
Threefala different kaen masol nao insaed body bilong iu. Each wan duim different work. Wanfala nao heart masol, wea pumpim heart. Masol bilong heart hem savvy spel tu bikos bihaen hem pump wantaem hem mas relax for waitim next taem for hem pump.
Narakaen masol hem smooth masol. Smooth masol nao stap raonem olketa organ insaed body bilong iu, and olketa vein tu. Olsem heart masol, wea work seleva, smooth masol work seleva tu. Olketa duim important work olsem for muvim wata insaed kidney and bladder, pushim kaikai insaed bele, kontrolem blood wea go thru long body, shape-im eye and kontrolem haomas laet go insaed eye.
Planti long 650 masol bilong iu hem olketa masol long bon. Olketa hia nao mekem iu muv. Start long taem iu born iu learn hao for kontrolem olketa masol hia. Example, wanfala baby learn hao for muvim hand and leg bilong hem mekem hem savvy wakabaot and balance. From olketa masol savvy pull nomoa, tufala masol bon nao mas work tugeta. Taem wanfala masol hem pull, narawan hem relax. Sapos tufala hia no work tugeta, evritaem iu skrasem hed bilong iu, bae hand bilong iu no go daon seleva. But, tricep masol, partner bilong bicep masol, hem pull, mekem iu fit for stretem hand bilong iu kwiktaem.
Olketa masol garem different size and shape. Samfala nao long and thin, olsem hamstring masol bilong leg. Narawan hevi and big, olsem gluteus masol long as. Evriwan helpem iu for muv. Sapos olketa masol no stap midol long olketa rib, bae rib no savvy bend. Olketa masol hia nao mekem chest bilong iu muv ap and daon olsem wanfala accordion, wea helpem iu for breathe. Olsem plywood garem olketa thin pis timber wea pas tugeta, olketa masol insaed bele tu pas tugeta long different way for stopem olketa organ insaed bele for no kamaot.
Masol and Tendon Work Tugeta
Olketa strong white string wea olketa kolem tendon nao joinim olketa masol wea pull long bon bilong iu. Olketa tendon go deep insaed long masol and join withim tissue for join wea stap raonem masol. Tissue for join hem mekem strong wea stap insaed long masol for pullim tendon and muvim bon bilong iu. Tendon wea strong winim evriwan nao hem Achilles tendon, wea join long barava strong masol long body bilong iu, long bihaen leg. Olketa masol bihaenem leg nao olsem shock absorber bilong body. Taem iu wakabaot, ranran, or jump, diswan savvy sokem hevi bilong winim wan ton.
Way wea hand bilong iu savvy duim enikaen samting hem nara example bilong hao masol and tendon work tugeta. Olketa longfala tendon nao joinim 40 masol wea stap long arm bilong iu go long olketa hand and finger bon. Olketa hia and 20 masol moa wea kavarem palm and finger bilong iu mekem hand and finger long hand bilong iu savvy kwiktaem and easy for holem small samting for workim handwatch or for holem handol bilong ax for katem firewood.
Winim 30 Masol Long Face
Winim eni narafala part long body bilong iu, face nao showimaot klia fasin bilong iu. For mekem face bilong iu savvy change long planti way, Creator hem putim staka masol insaed face bilong iu—winim 30. Tru nao, iu needim 14 masol for mekem iu smile nomoa!
Samfala masol long face barava strong, olsem olketa masol wea join long jaw bilong iu, wea savvy iusim strong wea olsem 75 kilogram for smasem kaikai. Olketa narawan moa soft but stap longtaem, olsem olketa masol wea kontrolem eyelid bilong iu taem iu open and sat eye, wea aotem eni dirty or germ winim 20,000 taem insaed wanday.
Nambawan Design
Each masol garem design for pull long smooth way. Olketa masol long bon mas balance mekem hem no iusim sem strong for liftim wanfala feather olsem for liftim samting wea 10 kilogram. Hao nao diswan kamap? Bae iumi lukim.
Evri masol garem staka cell. From shape bilong olketa cell hem long, olketa kolem diswan fiber. Samfala fiber laet color, olketa narawan dark. Olketa wea laet color pull kwiktaem, or fiber wea muv kwiktaem. Olketa hia nao work taem iu needim energy kwiktaem for lelebet taem nomoa olsem for liftim samting or resis long 100 meter. Olketa fiber wea muv kwiktaem olketa strong, and glycogen, wanfala kaen sugar nao givim energy long olketa. But, olketa savvy tired kwiktaem and savvy pull or feel soa sapos staka lactic acid tumas kamap.
Olketa masol fiber wea garem dark color savvy pull easyeasy, or slow for muv, and oxygen nao mekem olketa work. From staka blood hem go long olketa fiber hia and strong for duim samting winim fiber wea pull kwiktaem, olketa fiber wea pull easyeasy “nao olketa string for go ahed strong.”
Narakaen fiber hem lelebet dark winim laet color fiber wea pull kwiktaem. Disfala fiber hem klosap semsem long olketa but hem no savvy tired kwiktaem. Bikos diswan hem iusim sugar and oxygen for kasem strong, luk olsem diswan nao work taem iu duim bigfala work for longtaem.
Evri man and evri masol garem different wan long olketa fiber hia. Example, pipol wea savvy ran insaed long-distance resis garem samting olsem 80 percent long fiber wea muv easyeasy long masol bilong leg, but olketa sprinter garem samting olsem 75 percent long fiber wea muv kwiktaem.
Olketa Nerve Nao Startim
Olketa nerve nao mekem masol fiber for work. Taem olketa nerve sendem message go long masol, masol ansarem long way for muv, or pull. Nomata olsem, no evri masol fiber pull long semtaem. But, olketa masol fiber followim olketa motor unit. Insaed wanfala motor unit, wanfala nerve nomoa hem join long planti fiber and kontrolem datwan.
Samfala motor unit, olsem olketa long leg masol bilong iu, garem winim 2,000 fiber long wanfala nerve nomoa. But motor unit insaed eye bilong iu kontrolem threefala fiber nomoa. For garem smallfala grup bilong olketa fiber insaed wanfala unit and moa unit for each masol savvy mekem olketa kleva way for muv kamap wea moa smooth, olsem for putim cotton insaed needle or playim piano.
Taem iu pikimap wanfala feather, samfala motor unit nomoa pull. Taem iu liftimap wanfala hevi samting, olketa spesel organ insaed masol fiber bilong iu kwiktaem sendem message long brain and askim moa motor unit for duim samting, so iu iusim moa strong for liftimap datwan. Taem iu wakabaot easyeasy, samfala motor unit nomoa work; but, taem iu ran, planti moa work and duim work kwiktaem.
Masol long heart bilong iu hem different from masol bilong bon bikos hem pull or hem relax evribit. Taem wanfala cell insaed heart masol hem muv, message hem go kasem evri cell and stretawe evriwan muv, wea diswan mekem full masol pull and then relax, long samting olsem 72 taem evri minute.
Olketa smooth masol duim samting wea klosap semsem withim heart masol—taem hem start, full organ hem pull. But olketa smooth masol savvy pull for longtaem winim olketa heart masol. Iu no savvy feelim olketa smooth masol, but only sapos iu hangre or taem iu bornim pikinini.
Keepim Olketa Masol Bilong Iu Fit
Datfala buk Muscles: The Magic of Motion hem say olsem: “Exercise helpem full body, insaed and aotsaed. . . . Olketa masol wea kasem exercise evritaem work moabeta long evri samting.” Exercise mekem masol bilong iu kamap fit, wea supportim olketa organ insaed body and helpem masol bilong iu for no tired.
Tufala different kaen exercise nao savvy helpem olketa masol bilong iu. Anaerobic exercise, wea iu liftimap samfala weight for lelebet taem evriday, hem savvy strongim olketa masol bilong iu. Olketa masol wea moa strong no keepim moa sugar and gris nomoa but savvy burnim gud olketa samting hia tu, wea helpem masol bilong iu for no tired.
Aerobic exercise, olsem ranran, swim, raedem bicycle, or wakabaot kwiktaem, hem mekem full body kamap fit. Kaen exercise olsem mekem blood bilong iu ran gud go long olketa masol and mekem mitochondria kamap moa big, wea mekem ATP kamap, hem nao energy wea masol bilong iu needim for pull. Heart bilong iu nao kasem barava gudfala samting from kaen exercise olsem, wea savvy helpem iu for no garem heart attack tu.
Sapos iu muvim olketa masol bilong iu bifor iu duim hardfala exercise, diswan bae helpem iu for no spoelem olketa masol. Olketa warm-ap exercise olsem savvy mekem masol bilong iu kamap hot, wea mekem moa blood for kasem olketa and then hem helpem olketa enzyme for mekem moa energy, wea mekem masol bilong iu savvy pull gud. Sapos iu duim olketa sem warm-ap exercise taem iu finis, hem bae help for stopem masol for feel soa bikos hem aotem lactic acid for kamap staka.
But, iu mas luksavvy hao iu savvy spoelem masol bilong bon sapos iu duim exercise wea hard tumas, main way nao sapos iu no kasem training. And tu, sapos iu putim tumas hevi long masol bilong iu, olsem sapos iu tek longtaem tumas for daonem hevi samting or iu ran daon long wanfala hill, iu savvy brekem masol fiber. Nomata small brek wea kamap from masol hem pull savvy kosim big pain and boela.
Keepim gud olketa masol bilong iu. Givim stretfala exercise and rest long olketa mekem olketa savvy duim work for iu olsem wanfala engine wea garem gudfala design, ‘best motor’ long body bilong iu.
[Blurb long page 22]
Samting olsem 650 masol stap insaed body bilong iu. Big wan winim evriwan nao gluteus masol wea stap long as, wea muvim leg
[Box longpage 26]
Olketa Masol and Kaikai
Gud kaikai hem important for keepim olketa masol healthy. Kaikai wea garem planti calcium, olsem milk and cheese, and garem potassium, olsem banana, and tu olketa fruit, yellow vegetable, nut, and seed helpem olketa masol for pull gud. Whole-grain bred and cereal givim iron and B-complex vitamin, main wan nao B1, wea hem barava important for tanem olketa carbohydrate, protein, and fat go long energy for givim strong long olketa masol bilong iu. Sapos iu drinkim planti wata diswan bae help for balancim olketa electrolyte insaed long body and tu for wasimaot lactic acid and nara nogud samting wea savvy spoelem masol bilong iu for no work gud.
[Box/Piksa long page 24, 25]
SPESEL SAMTING BILONG WAY WEA MASOL PULL
Samting wea masol duim maet luk olsem hem simple nomoa. But way wea masol pull hem barava spesel. Professor Gerald H. Pollack say olsem: “Mi barava sapraes tumas long design bilong nature wea luk naes tumas. Way wea chemical energy hem change for kamap mechanical energy hem kleva tumas—wea fitim for iumi say hem showimaot bigfala savvy—dastawe hem mekem man sapraes tumas.”
Letem iumi iusim wanfala electron microscope for lukim spesel way wea masol hem pull and learnim moa samting abaotem disfala barava spesel samting wea Creator designim.
Each masol cell, or fiber, hem wanfala grup bilong olketa small fiber wea garem nem myofibril wea lay long sem way. Each myofibril garem planti thousand thin myofilament. Samfala myofilament lelebet thick, samfala lelebet thin. Olketa wea thick garem myosin, and olketa wea thin garem actin, olketa hia protein wea helpem cell bilong masol for pull.
Long aotsaed bilong each masol fiber hem wanfala hol. Nerve fiber wea kam from spine, hem end long there and hem go insaed long datfala hol. Olketa masol bilong iu duim work taem brain givim komand and message, wea planti million nerve cell bilong central nervous system nao tekem go long olketa end bilong nerve. Taem each end bilong nerve hem kasem message, winim 100 small sac bursta open, and wanfala chemical kamaot wea mekem muv bilong nerve kamap moa big taem hem touchim skin bilong masol cell. Diswan startim wanfala wave wea olsem electricity wea wekapem full masol cell, wea kosim cell skin for sendemaot calcium ion wea garem paoa, wea hem nao startim way for pull.
Then olketa calcium ion go kasem evri masol fiber thru long olketa thin tube and touchim olketa different kaen protein. Taem calcium hia touchim olketa protein, hem mekem olketa ples bilong protein long datfala thin actin filament for kamap open.
Long semtaem, olketa raon part, wea garem hae-energy samting olketa kolem ATP, wea kamaot from olketa thick myosin filament, hem start for work. Wanfala long olketa raon part hia hem pas go long ples bilong protein long actin filament wea open, and diswan mekem wanfala bridge. Narafala part hem openem ATP and aotem inaf paoa for datfala bridge for pullim actin filament for stap saed long or antap long datfala myosin filament. Olsem wanfala team wea work tugeta for pullim wanfala rope, olketa myosin hed let go long ples wea olketa holem and kasholem narafala part bilong actin filament, and long semtaem muvim datfala filament go long midol bilong myosin filament. Diswan go ahed kasem taem wea pull hem finis. Disfala full samting hem happen insaed barava small part bilong wan second nomoa!
Taem pull hem finis, datfala calcium hem go back long ples wea hem kam from insaed skin bilong masol cell, olketa ples wea open long actin filament hem klos moa, and masol fiber relax for waitim message moa. Tru nao, ‘hem workim iumi long nambawan way’!—Psalm 139:14.
[Piksa]
(Lukim pablikseon for olketa nara information)
Masol bilong iu hem olketa planti fiber wea bundle tugeta
Olketa thick and thin myofilament(mekem barava big)
Myofibril
Wanfala bundle myofibril
Masol fiber
Masol
[Piksa long page 23]
(2 taem moa big)
Masol wea small tumas stap long barava small bon, insaed ear
[Piksa long page 23]
Iu needim 14 masol for smile nomoa!
[Piksa long page 23]
Masol mekem iu open and sat eye winim 20,000 taem evriday
[Piksa long page 26]
Heart masol bilong iu hem pull and relax samting olsem 72 taem evri minute, or 2.6 billion taem long full laef bilong man
[Piksa long page 26]
Anaerobic exercise
[Credit Line long page 22]
Man, p. 22; eye, p. 23; heart, p. 26: The Complete Encyclopedia of Illustration/ J. G. Heck