HELP FOR OLKETA FAMILI | PARENTS TEACHIM PIKININI
Helpem Teenager for Minim Why Sexting Hem Rong
STORYIM WITIM TEENAGER
Distaem staka pipol garem mobile phone and staka young wan savve iusim mobile for sendem olketa nogud toktok and piksa wea olketa kolem diswan sexting. Parents bae laek for helpem teenager blo olketa for no duim diswan.
Disfala article bae helpem iu lo hao for storyim diswan lo teenager blo iu. Bat firstaem bae iumi storyim why samfala young wan duim sexting and why datwan hem nogud samting.a
WHY NAO OLKETA DUIM DATWAN?
Samfala teenager storyim sex lo message for switim feeling blo samwan wea olketa laek frenim.
Samfala gele sendem naked photo blo olketa bikos wanfala boy talem hem for mas duim.
Samfala taem wanfala boy sendem naked photo blo wanfala gele lo olketa frens blo hem for mekfani or for mekem datfala gele feelim bikos gele hia no laek gohed frenim hem.
Nomata wanem reason nao olketa teenager duim datwan, taem olketa garem mobile, datwan savve testim olketa. Disfala buk CyberSafe sei sapos man sendem nogud photo or message, datwan savve spoelem laef blo hem.
Staka pipol no savve taem olketa putim photo lo Internet, eniwan nomoa savve lukim or iusim datfala photo lo eni wei wea olketa laekem, and olketa no savve kontrolem datwan. Olsem example, wanfala report from U.S. Federal Bureau of Investigation (FBI), storyim wanfala gele wea 18 years hem “suisaed bihaen hem sendem naked photo blo hemseleva lo boyfren, and then datfala boy sendem lo staka nara teenager lo skul blo datfala gele. Olketa student hia barava tok spoelem hem, and tu, olketa sendem datfala photo lo olketa narawan moa.”
Lo Solomon Islands and lo olketa nara ples hem againstim law for man duim sexting. Olsem example, sapos teenager wea no kasem 18 years yet sendem rabis piksa blo nara pikinini lo nara teenager, olketa savve tekem hem lo kot bikos datwan serious samting, and then gavman bae keepim record lo samting wea teenager hia duim (wea minim distaem hem wanfala sex offender). Nara samting tu, olketa savve tekem parents lo kot from pikinini blo olketa iusim phone blo parents for duim sexting.
SAMTING PARENTS SAVVE DUIM
Mekem olketa rul. Nomata iu no savve kontrolem evri samting wea teenager blo iu duim witim mobile, iu savve mekem olketa rul abaotem mobile and talem hem wanem nao bae happen sapos hem no followim olketa rul hia. And tu, iu garem raet for chekim wanem nao teenager blo iu duim lo mobile blo hem.—Bible principle: Ephesus 6:1.
Helpem teenager for tingim samting wea savve kamaot from sexting. Iu savve sei: “Mi herem sexting hem kamap big lo hia distaem.” For helpem pikinini storyim tingting blo hem abaotem sexting, iu savve askem hem: “Wat kaen photo nao iu ting hem no fitim for sendem lo narawan?” “Lo hia, olketa savve tekem lo kot teenager wea sendem naked photo blo nara teenager lo eniwan. Iu tingse hem stret olketa tekem man wea duim datwan lo kot?” “Why nao hem nogud for duim sexting?” Trae for minim tingting blo hem abaotem diswan, and helpem hem for tingting gud bifor hem sendem eni samting lo mobile.—Bible principle: Hebrew 5:14.
Tingting gud bifor iu sendem eni samting
Storyim example. Iu savve story olsem lo gele blo iu: “Sapos wanfala boy talem iu for sendem naked photo blo iu lo hem, wanem nao iu shud duim? Waswe, iu shud sendem photo mekem iu gohed frens witim datfala boy? Or no duim datwan, bat gohed frens witim hem? Or stop for frens witim hem? Or talem wanem hem happen lo mifala mami and dadi?” Helpem gele blo iu for tingting gud abaotem diswan. Hem gud tu for story lo boy blo iu abaotem sexting.—Bible principle: Galatia 6:7.
Helpem teenager for laek duim gud samting. Askem teenager olketa kwestin olsem: Waswe, iu laekem pipol for ting lo iu olsem gudfala man? Olketa wanem kaen wei nao iu laek for showimaot? Bae iu feel hao sapos iu mek shame lo samwan from iu forwardim nogud piksa blo hem? Iu tingse hem important for no letem eniwan forcem iu for duim sexting? Helpem teenager for disaed for no duim sexting mekem hem “garem gudfala konsens.”—1 Peter 3:16.
Showim gud example. Bible sei wisdom wea kam from God hem klin and helpem man for duim stret samting. (James 3:17) Waswe, iu showimaot example for klin and duim stret samting? Disfala buk CyberSafe sei: “Iumi olketa parents need for showimaot gud example lo wei for no lukluk lo olketa piksa or Web site wea no fitim.”
a “Sexting” hem minim samwan iusim mobile for storyim sex lo wanfala message, or for sendem photo or video blo samwan wea naked. For kasem moa information, go lo jw.org Web site and readim disfala online article “Young People Ask—What Should I Know About Sexting?”—Go lo BIBLE TEACHINGS > TEENAGERS.