Chapter 11
Distaem Hem Olketa Last Day!
1. Why nao planti no really savvy wanem for duim taem they lukluk long every samting wea happen long world, but wea nao yumi savvy faendem barava meaning bilong olketa samting wea happen?
HAO nao world bilong yumi hem kamap no gud tumas olsem distaem? Wanem nao bae kasem yumi long future? Waswe, anytaem yuseleva askim kwestin olsem? Planti pipol they no savvy wanem for duim taem they lukim every samting wea happen long world. Olketa samting wea happen olsem war, sik, and fashion for brekem law mekem pipol tingim wanem bae happen long future. Olketa bigman bilong gavman no givim any hope. But, yumi savvy trustim wanem God hem talem long Word bilong hem abaotem meaning bilong olketa badfela day distaem. Bible hem barava helpem yumi for lukim wanem kaen taem nao yumi stap insaed distaem. Hem show aot hao yumi insaed “olketa last day” bilong disfela system.—2 Timothy 3:1.
2. Wanem kwestin nao olketa disaepol bilong Jesus askim long hem, and hao nao hem ansarem them?
2 Tingim, for example, ansa wea Jesus givim for samfela kwestin wea olketa disaepol bilong hem askim. Threefela day bifor Jesus hem dae, they askim hem olsem: “Wanem nao saen for markem presence bilong yu and end bilong disfela system?”a (Matthew 24:3) Taem hem ansa, Jesus tok abaotem samfela samting wea bae happen long world wea barava showim aot klia hao disfela system wea no followim God hem insaed long olketa lastfela day bilong hem.
3. Why nao every samting long earth kamap moa worse taem Jesus start for rul?
3 Olsem chapter 10 hem story abaotem, way wea Bible kaontem taem show aot hao Kingdom bilong God hem start finis for rul. But hao nao olsem? Every samting kamap moa worse, they no kamap moabeta. Tru nao, diswan hem strongfela proof for show aot hao Kingdom bilong God hem start finis for rul. Why nao olsem? Well, Psalm 110:2 talem yumi hao for lelebet taem, Jesus bae rul ‘midlwan long olketa enemy bilong hem.’ So, firstfela samting wea hem duim taem hem kamap King long heven hem for throwim Satan and olketa demon angel bilong hem kam daon long earth. (Revelation 12:9) Wanem nao kamaot from diswan? Hem barava fitim wanem Revelation 12:12 hem profesi abaot: “Sorry tumas long earth and long sea, from Devil hem kam daon finis long yufela, hem kros for gud, from hem savvy hem garem shortfela taem nomoa.” Distaem yumi stap insaed datfela “shortfela taem.”
4. Wanem nao samfela part bilong olketa last day, and wanem nao they show aot? (Lukim box.)
4 Dastawe, taem they askim Jesus abaotem wanem nao saen for markem presence bilong hem and end bilong disfela system, ansa wea hem givim mekem yumi for ting strong. Olketa different part bilong datfela saen they stap long box long page 102. Olsem yu savvy lukim, olketa Kristian aposol Paul, Peter, and John talem yumi samfela samting moa abaotem olketa last day. Hem tru, planti part bilong datfela saen and olketa last day they no gud tumas. But, way wea olketa profesi hia they fulfill mekem yumi barava believe hao disfela badfela system hem barava klosap for finis. Letem yumi lukluk gud long samfela main saen bilong olketa last day.
OLKETA PART BILONG LAST DAY
5, 6. Hao nao olketa profesi long saed bilong war and bigfela hangre they fulfill distaem?
5 “Nation bae kam againstim nation and kingdom againstim kingdom.” (Matthew 24:7; Revelation 6:4) Man for raet, Ernest Hemingway hem kolem World War I “barava bigfela and no gud way for busarem olketa man wea winim any samting long earth.” Disfela buk The World in the Crucible—1914-1919, hem say diswan hem “wanfela niufela samting long saed bilong war, hem firstfela war wea affectim every man long world. Taem wea hem go ahed, and way wea hem big tumas hem winim any samting wea happen bifor or wea they ting bae hem happen.” Then World War II hem kamap bihaen, wea moa worse winim World War I. “Disfela mek-twenty century,” wanfela savvyman bilong history Hugh Thomas hem say, “hem fulap withim machine gun, tank for faet, aeroplane for faet olsem B-52 plane, nuclear bomb, and rocket for faet. Samting wea mekem disfela century hem different every bit hem olketa war wea killim dae staka pipol winim any otherfela taem bifor.” Hem tru, bihaen long Cold War, they say for stopem way for mekem olketa samting for faet. But, wanfela report hem say bihaen they duim diswan, samting olsem 10,000 go kasem 20,000 nuclear samting for faet bae still stap—diswan hem 900 taem winim paoa bilong olketa samting wea they use-im for faet long World War II.
6 “Kaikai bae short.” (Matthew 24:7; Revelation 6:5, 6, 8) Start kam long 1914 samting olsem 20 bigfela hangre kamap finis. Hem kasem olketa ples olsem Bangladesh, Burundi, Cambodia, China, Ethiopia, Greece, India, Nigeria, Russia, Rwanda, Somalia, and Sudan. But bigfela hangre olsem hem no everytaem kamap from kaikai hem short. Wanfela grup bilong olketa agriculture scientist and economist say: “Insaed olketa year wea just go past, kaikai long disfela world hem staka winim population bilong world. But samting olsem 800 million pipol they barava poor for gud, . . . they no fit for buyim inaf kaikai for finisim sik wea kamaot from way for no kaikai gud.” Samfela taem way for raverave long saed bilong politik tu insaed long diswan. Dr. Abdelgalil Elmekki long University bilong Toronto hem talem tufela example wea planti thousand pipol they hangre taem kantri wea they stap insaed go ahed for sellim planti kaikai long otherfela kantri. Olketa gavman they ting moa hae long way for kasem shilling from otherfela kantri for buyim olketa samting bilong them for faet, winim way for feedim pipol long kantri bilong them. Wanem nao tingting bilong Dr. Elmekki long diswan? Planti taem bigfela hangre kam from “way for givim aot kaikai and samting wea gavman decide-im.”
7. Wanem nao happen distaem long saed bilong olketa sik?
7 “Sik.” (Luke 21:11; Revelation 6:8) Datfela sik wea they kolem Spanish flu wea kamap long 1918-19 hem killim dae samting olsem 21 million pipol. Wanfela man, A. A. Hoehling hem raet olsem insaed buk The Great Epidemic: “No anytaem long history wanfela sik hem kamap long world wea killim dae planti pipol kwiktaem tumas olsem.” Distaem, olketa sik they go ahed for kamap moa big. Every year, datfela sik cancer hem killim dae faev million pipol, beleran hem killim dae winim three million baby and smallfela pikinini, and TB (tuberculosis) hem killim dae three million pipol. Every year, olketa sik olsem pneumonia killim dae 3.5 million pikinini wea no kasem faev year yet. And 2.5 billion pipol—haf long population bilong world—they suffer long olketa sik wea kam from dirty wata and no gud toilet. AIDS hem sik wea mekem man remember moa hao nomata they duim planti samting long saed bilong medicine, they no fit for finisim olketa sik every bit.
8. Wanem nao show aot pipol they “love-im shilling”?
8 “Olketa man bae . . . love-im shilling.” (2 Timothy 3:2) Long planti kantri raonem world, pipol they barava want for kamap moa rich. Pipol markem “way for win” withim pay bilong man, or haomas samting nao hem ownim. “Fashion for wantim tumas material samting bae hem go ahed for olsem main samting wea muvim pipol long America . . . and hem bae wanfela barava important part bilong way for sellim and buyim samting long otherfela kantri tu,” hem nao samting wea vice president bilong wanfela advertising kampani hem talem. Waswe, yu lukim diswan hem happen long ples wea yu stap?
9. Wanem nao yumi savvy talem abaotem profesi bilong way wea olketa pikinini bae no obeyim dadi and mami?
9 “No obey long dadi and mami.” (2 Timothy 3:2) Olketa dadi and mami distaem, olketa teacher, and other pipol they kasem samting wea barava prove-im hao planti pikinini no show aot respect and no savvy obey. Samfela long olketa hia duim diswan for againstim or followim no gud fashion wea dadi and mami showim aot. Planti pikinini no garem faith long—and they againstim—skul, law, religion, and dadi and mami bilong them. “Olsem fashion wea everywan garem,” wanfela man wea teach long secondary skul for long taem hem say, “they nating respectim any samting.” But yumi hapi from planti pikinini wea fraet long God they garem gudfela fashion.
10, 11. Wanem proof nao show aot pipol they raf tumas and no garem love?
10 “Raf tumas.” (2 Timothy 3:3) Greek word wea they transletim “raf tumas” hem meanim ‘wild fashion, no garem feeling for sorry long man.’ Diswan barava fitim planti pipol wea duim raf fashion distaem! “Laef hem no gud tumas, hem fulap withim olketa barava bad samting wea mekem man need for strongim olketa feeling bilong hem bifor hem savvy readim nius,” hem nao samting wea wanfela niuspepa talem. Wanfela police man wea security long wanfela bigfela building hem say planti young pipol no want for ting abaotem wanem nao bae kamaot from samting wea they duim. Hem say: “They garem diskaen feeling, ‘Mi no savvy wanem bae happen tomorrow. Mi mas tekem samting wea mi laekem distaem nao.’”
11 “No garem love.” (2 Timothy 3:3) They transletim disfela toktok from wanfela Greek word wea meanim “no garem feeling, no olsem man” and wea meanim “way for no garem love insaed long famili.” (The New International Dictionary of New Testament Theology) Yes, planti taem love hem no stap long ples wea hem fit for stap and grow—insaed long famili. Olketa report abaotem way for spoelem marit partner, pikinini, and dadi or mami wea olo they samting wea happen everytaem. Wanfela grup wea studyim diswan they say: “Way for use-im raf fashion—maet for hitim or pushim, busarem or sutim withim gun—hem samting wea happen planti taem insaed long famili winim any otherfela ples.”
12. Why nao yumi savvy say pipol giaman long way wea they love-im God?
12 “Luk olsem they love-im God but long fashion bilong them they show aot they denyim paoa bilong hem.” (2 Timothy 3:5) Bible garem paoa for change-im laef bilong pipol for kamap moabeta. (Ephesians 4:22-24) Nomata olsem, planti pipol distaem use-im religion bilong them olsem samting for haedem olketa samting wea no raeteous wea they duim wea no mekem God hapi. Planti taem olketa bigman bilong religion ting nating long fashion for liar, steal, and dirty fashion. Planti religion preach abaotem way for show aot love, but they supportim olketa war. “Insaed long nem bilong Bigfela Creator,” wanfela niuspepa magasin India Today hem say, “olketa man they duim olketa barava no gud and raf samting againstim each other.” Tru nao, tufela rowa wea killim dae planti pipol—World War I and II—they start midlwan long Kristendom.
13. Wanem nao show aot pipol go ahed for spoelem earth?
13 “Olketa wea spoelem earth.” (Revelation 11:18) Winim 1,600 scientist from everywea long world, and 104 bilong olketa hia they winim Nobel prize, they saenem wanfela warning, wea Union of Concerned Scientists (UCS) they givim, wea say: “Olketa man and every samting wea stap raonem them they go-go for bigfela trabel. . . . Fewfela year nomoa stap bifor they lusim chance for stopem danger hia.” Datfela report hem say olketa samting wea man duim wea bringim danger long laef “savvy barava change-im world, go-go world bae no fit moa for keepim any samting laef long proper way.” Way wea ozone hem go-go for finis, wata hem dirty, no any tree stap moa long bush, no any samting savvy grow gud long graon, and way for killim dae planti animal and plant they olketa bigfela problem wea pipol mas tingting strong long them. UCS hem say, “Way wea yumi spoelem olketa living samting wea depend long each other savvy mekem bigfela problem kamap everywea, and spoelem tu olketa system bilong olketa living samting wea yumi no really meanim gud.”
14. Hao nao yu savvy prove-im Matthew 24:14 hem fulfill long taem bilong yumi?
14 “Disfela gud nius bilong kingdom olketa bae talemaot everywea long world.” (Matthew 24:14) Jesus hem profesi abaotem way wea pipol bae preachim gud nius bilong Kingdom everywea long world, for wanfela witness long every nation. Withim help and blessing bilong God, planti million Jehovah’s Witness spendem planti thousand million hour for duim disfela work for preach and mekem disaepol. (Matthew 28:19, 20) Tru nao, olketa Witness luksavvy they bae guilty long blood sapos they no talemaot gud nius. (Ezekiel 3:18, 19) But they hapi tumas taem each year planti thousand pipol listen long message bilong Kingdom and kamap olketa trufela Kristian, olsem olketa Witness bilong Jehovah. Hem wanfela barava bigfela privilege for servim Jehovah and talemaot savvy bilong God. And bihaen they preachim gud nius everywea long earth, then end bilong disfela badfela system bae kam.
DUIM SAMTING FOLLOWIM PROOF
15. Hao nao disfela badfela system bilong distaem bae finis?
15 Hao nao disfela system bae finis? Bible hem profesi abaotem wanfela “great tribulation” wea bae start taem olketa bilong politik long disfela world they attackim “Babylon the Great,” world rul bilong giaman religion. (Matthew 24:21; Revelation 17:5, 16) Jesus say long dat taem ‘sun bae dark, and moon bae no shine, and olketa star bae fall daon from heven, and olketa paoa long heven bae seksek.’ (Matthew 24:29) Diswan maet meanim olketa spesel samting wea happen long skae. But yumi sure way wea bigman bilong religion they giaman laet and bae finis every bit. Then Satan, wea they kolem “Gog bilong land bilong Magog,” bae use-im olketa badfela man for want for finisim every bit pipol bilong Jehovah. But Satan bae no win long diswan, from God bae sevem them. (Ezekiel 38:1, 2, 14-23) Datfela “great tribulation” bae kasem barava end bilong hem long Armageddon, “war bilong bigfela day bilong God Olmaeti.” Hem bae finisim every bit every part long organization bilong Satan long earth, and openem way for planti blessing for olketa man wea stap laef.—Revelation 7:9, 14; 11:15; 16:14, 16; 21:3, 4.
16. Hao nao yumi savvy olketa part bilong olketa last day wea they profesi abaotem they fitim taem bilong yumi?
16 Taem yumi lukluk long samfela part insaed profesi abaotem olketa last day, hem maet luk olsem they fitim otherfela taem long history. But taem they join tugeta, every samting insaed profesi hia point long taem bilong yumi. For example: Olketa laen long finger print bilong wanfela man hem different every bit from any other man. Long sem way tu, olketa last day garem olketa mark, or samting wea happen wea bilong disfela taem nomoa. Olketa hia they olsem wanfela “finger print” wea kanduit for kamap long any other taem. Taem yumi tingting raonem olketa proof long Bible abaotem hao Kingdom bilong God hem go ahed for rul distaem long heven, proof hia givim strongfela faondeson for say distaem hem olketa last day. And tu, kliafela proof from olketa Scripture show aot hao disfela badfela system hem klosap for finis.
17.Taem yumi savvy distaem hem olketa last day, diswan mas muvim yumi for duim wanem samting?
17 Wanem nao bae yu duim for followim proof bilong way wea distaem hem olketa last day? Tingim diswan: Sapos wanfela bigfela cyclone hem ready for kam, yumi kwiktaem for duim samting for protectim yumi. Well, samting wea Bible hem profesi abaotem for disfela system mas muvim yumi for duim samting. (Matthew 16:1-3) Hem klia tumas for lukim hao yumi stap insaed long olketa last day bilong disfela world system. Diswan mas muvim yumi for change for mekem Jehovah hapi long yumi. (2 Peter 3:3, 10-12) Jesus hem story abaotem hemseleva olsem way for kasem laef, and hem talemaot disfela important toktok: “Lukluk gud long yufela seleva, nogud heart bilong yufela kamap hevi from tumas kaikai and tumas drink and worry bilong living, and sek nomoa datfela day kasem yufela kwiktaem olsem wanfela trap. From hem bae kam long olketa wea stap everywea long earth. Go ahed for wekap, and pray everytaem for yufela savvy winim every samting wea bae happen, and for yufela savvy stand ap front long Son bilong man.”—Luke 21:34-36.
[Footnote]
a Samfela Bible use-im word “world” and no “system.” W. E. Vine’s Expository Dictionary of New Testament Words say datfela Greek word ai·onʹ hem “meanim wanfela sekson bilong taem wea they no markem end bilong hem, or olketa samting wea happen insaed wanfela sekson bilong taem.” Buk bilong Parkhurst, Greek and English Lexicon to the New Testament (page 17) garem tu disfela toktok “disfela system” taem hem story abaotem way for use-im ai·oʹnes (plural) long Hebrews 1:2. So way for use-im disfela toktok “system” hem fitim olketa firstfela Greek text.
TESTIM SAVVY BILONG YU
Wanem nao Bible talem abaot samting wea bae happen long world long start bilong rul bilong Kraest?
Wanem nao samfela samting wea markem olketa last day?
Wanem nao mekem yu barava believe distaem hem olketa last day?
[Box long page 102]
SAMTING WEA MARKEM OLKETA LAST DAY
• War wea winim any otherfela taem.—Matthew 24:7; Revelation 6:4.
• Bigfela hangre.—Matthew 24:7; Revelation 6:5, 6, 8.
• Bigfela sik.—Luke 21:11; Revelation 6:8.
• Fashion for brekem law kamap moa big.—Matthew 24:12.
• Spoelem earth.—Revelation 11:18.
• Planti earthquake.—Matthew 24:7.
• Hardfela taem.—2 Timothy 3:1.
• Bigfela way for love-im shilling.—2 Timothy 3:2.
• No obey long dadi and mami.—2 Timothy 3:2.
• No garem love.—2 Timothy 3:3.
• Love-im hapitaem winim God.—2 Timothy 3:4.
• No garem fashion for bossim seleva.—2 Timothy 3:3.
• No love-im gudfela fashion.—2 Timothy 3:3.
• No want for luksavvy long danger.—Matthew 24:39.
• Pipol tok spoelem proof bilong olketa last day.—2 Peter 3:3, 4.
• Preaching abaotem Kingdom bilong God everywea long world.—Matthew 24:14.
[Full piksa long page 101]