Chapter Eleven

Taem wea Messiah Bae Kam Showaot Klia

1. From Jehovah nao Nambawan Man For Keepim Taem, iumi savve sure long wanem samting?

JEHOVAH nao Nambawan Man For Keepim Taem. Hem bossim evri taem and season wea join witim waka bilong hem. (Acts 1:7) Evri samting wea hem markem for olketa taem and season hia bae happen. Olketa bae no fail.

2, 3. Daniel hem lukluk gud long wanem profesi, and hu nao rulim Babylon long datfala taem?

² Olsem man wea strong for studyim olketa Scripture, profet Daniel garem faith long wei wea Jehovah garem schedule for evri samting and fit for mekem olketa samting hia happen. Olketa profesi wea Daniel hem interest tumas long olketa hem nao abaotem Jerusalem wea finis evribit. Jeremiah raetem toktok bilong God abaotem hao long nao datfala holy taon bae stap emti, and Daniel studyim gud datfala profesi. Hem raet olsem: “Long first year bilong Darius datfala son bilong Ahasuerus bilong laen long Media, wea kamap king ovarem kingdom bilong olketa long Chaldea; long first year long rul bilong hem mi, Daniel, luksavve thru long olketa buk namba bilong olketa year bilong toktok wea Jeremiah datfala profet kasem from Jehovah, for fulfillim taem wea Jerusalem finis evribit, hem nao, seventi year.”—Daniel 9:1, 2; Jeremiah 25:11.

³ Long datfala taem Darius bilong Media nao rul ovarem “kingdom bilong olketa long Chaldea.” Profesi wea Daniel talem bifor abaotem mining bilong handraeting long wall hem kwiktaem fulfill finis. Rul Bilong Babylon hem finis nao. Olketa “givim long olketa bilong Media and Persia” long 539 B.C.E.—Daniel 5:24-28, 30, 31.

DANIEL BARAVA ASKEM JEHOVAH

4. (a) Wanem nao olketa needim for mekem God sevem olketa? (b) Hao nao Daniel go front long Jehovah?

⁴ Daniel luksavve 70 year wea Jerusalem stap emti hem klosap finis nao. Wanem nao bae hem duim? Hemseleva talem iumi: “Mi tan go long Jehovah trufala God, for askem hem long prea, witim wei for no kaikai and kaleko bilong sorre and asis. And mi prea long Jehovah, God bilong mi and talemaot rong.” (Daniel 9:3, 4) Need hem stap for garem heart wea stret for God showimaot mercy and sevem olketa. (Leviticus 26:31-46; 1 Kings 8:46-53) Olketa needim faith, hambol spirit, and wei for repent evribit long sin wea lead go for olketa lusim kantri and stap slave. So, for saed bilong pipol bilong hem wea sin, Daniel go front long God. Long wanem wei? Taem hem sorre, no kaikai, and werem kaleko bilong sorre, hem wanfala saen wea showimaot hem repent and garem honest heart.

5. Why nao Daniel feel sure olketa Jew bae go bak long homland bilong olketa?

⁵ Profesi bilong Jeremiah givim hope long Daniel, bikos hem showimaot klosap nao olketa Jew bae go bak long Judah, homland bilong olketa. (Jeremiah 25:12; 29:10) Daniel feel sure olketa Jew wea prisoner bae kasem help bikos wanfala man wea nem bilong hem Cyrus hem rul finis olsem king bilong Persia. Waswe, Isaiah no talem profesi wea sei Cyrus bae duim samting for mekem olketa Jew go free for buildim moa Jerusalem and temple? (Isaiah 44:28–45:3) Bat Daniel no savve hao nao datwan bae happen. So hem go ahed for askem Jehovah.

6. Wanem nao Daniel talemaot insaed long prea?

⁶ Daniel mekhae long mercy and loving-kaeness bilong God. Long hambol wei hem talemaot wei wea olketa Jew sin taem olketa bighed, lusim olketa komandment bilong Jehovah, and no lisin long olketa profet bilong hem. God hem stret for “torowem olketa bikos olketa no faithful.” Daniel hem prea olsem: “O Jehovah, mifala nao kasem shame, olketa king bilong mifala, olketa prince and laen dadi bilong mifala, bikos mifala sin againstim iu. God bilong mifala Jehovah hem garem mercy and wei for forgive, from mifala bighed againstim hem. And mifala no obeyim voice bilong God bilong mifala Jehovah, long wei for wakabaot followim olketa law wea hem putim front long mifala thru long olketa servant bilong hem wea profet. And evriwan bilong Israel no followim law bilong iu, and olketa tan difren for no obeyim voice bilong iu, dastawe iu kapsaetem long mifala datfala curse and promis wea olketa raetem long law bilong Moses servant bilong tru God, from mifala sin againstim Hem.”—Daniel 9:5-11; Exodus 19:5-8; 24:3, 7, 8.

7. Why nao iumi savve sei Jehovah duim stretfala samting for letem olketa Jew kamap prisoner?

⁷ God warnim olketa Israelite long samting wea bae happen sapos olketa no obeyim hem and no tingim covenant wea hem mekem witim olketa. (Leviticus 26:31-33; Deuteronomy 28:15; 31:17) Daniel talemaot hao samting wea God duim hem stret, taem hem sei: “Hem duim samting followim toktok wea hem talem againstim mifala and againstim olketa judge wea judgem mifala, long wei for mekem big trabol kasem mifala, wea no happen bifor anda long full heven or long Jerusalem. Olsem olketa raetem finis long law bilong Moses, evri trabol hia—hem kasem mifala, and mifala no mekem feis bilong God bilong mifala Jehovah kamap soft long wei for tan bak from rong bilong mifala and luksavve long trufala fasin bilong iu. And Jehovah no forgetim datfala trabol and gogo hem mekem mifala kasem datwan, from God bilong mifala Jehovah hem raeteous long evri waka wea hem duim; and mifala no obeyim voice bilong hem.”—Daniel 9:12-14.

8. Samting wea Daniel askem long Jehovah hem for wanem?

⁸ Daniel no trae for givim excuse for samting wea pipol bilong hem duim. Hem barava fitim for olketa kamap prisoner, olsem hem willing for talem: “Mifala sin, mifala duim nogud samting.” (Daniel 9:15) And main interest bilong hem no for stopem wei wea olketa safa. Nomoa, samting wea hem askem hem for glory and honor bilong Jehovah. Taem hem forgivim olketa Jew and letem olketa for go bak moa long homland bilong olketa, God bae fulfillim promis bilong hem thru long Jeremiah and bae mekem nem bilong Hem kamap holy. Daniel hem ask olsem: “O Jehovah, for fitim evri raeteous samting wea iu duim, plis, letem kros bilong iu tan bak from taon bilong iu Jerusalem, holy maunten bilong iu; from, bikos long sin bilong mifala and rong bilong olketa laen dadi bilong mifala, Jerusalem and pipol bilong iu kamap samting wea mekem mifala kasem shame front long evriwan wea stap raonem mifala.”—Daniel 9:16.

9. (a) Wanem nao Daniel hem askem long end bilong prea bilong hem? (b) Wanem nao mekem Daniel feel nogud tumas, bat hao nao hem showimaot hem tingim nem bilong God?

⁹ Daniel go ahed long strongfala prea bilong hem: “Distaem lisin, O God bilong mifala, long prea bilong servant bilong iu and olketa samting wea hem askem, and mekem feis bilong iu shaen long holy ples bilong iu wea stap nogud, for saed bilong Jehovah. Tanem kam ear bilong iu, O God bilong mi, and lisin. Openem eye bilong iu and lukim wei wea mifala stap nogud and datfala taon wea garem nem bilong iu; from mifala no askem iu from olketa raeteous samting wea mifala duim, bat from planti mercy bilong iu. O Jehovah, lisin kam. O Jehovah, forgivim mifala. O Jehovah, lukluk gud and duim samting. No delay, for saed bilong iuseleva, O God bilong mi, from nem bilong iu stap long taon bilong iu and pipol bilong iu.” (Daniel 9:17-19) Sapos God no forgivim olketa and hem letem pipol bilong hem stap olsem prisoner, and letem holy taon bilong hem, Jerusalem, for stap nogud olowe, waswe, olketa nation bae ting long hem olsem Sovereign Bilong Universe? Waswe, maet olketa tingse Jehovah no strong winim olketa god bilong Babylon? Yes, bae olketa tokdaonem nem bilong Jehovah, and datwan nao mekem Daniel feel nogud tumas. Long 19-fala taem wea nem bilong God, Jehovah, stap insaed buk bilong Daniel, 18-fala taem hem stap long disfala prea!

GABRIEL KWIKTAEM KAM

10. (a) Hu nao kam long Daniel, and why nao olsem? (b) Why nao Daniel story abaotem Gabriel olsem wanfala “man”?

¹⁰ Taem Daniel hem prea yet, angel Gabriel hem kam. Hem sei: “O Daniel, mi kam distaem for givim iu savve witim wei for minim samting. Long taem wea iu start for askem samting wanfala toktok hem go aot, and miseleva kam for talem iu, bikos iu samwan wea barava spesol. So tingting gud long diswan, and minim samting wea iu lukim.” Bat why nao Daniel storyim dat wan olsem “datfala man Gabriel”? (Daniel 9:20-23) Taem Daniel askem mining bilong vision wea hem lukim bifor abaotem man goat and man sheep, “samwan olsem wanfala man” kam front long hem. Hem nao datfala angel Gabriel, wea kam for givim savve long Daniel. (Daniel 8:15-17) Olsem tu, bihaen Daniel hem prea, datfala angel kam klosap long hem olsem wanfala man and story long hem olsem wanfala man hem story long narafala man.

11, 12. (a) Nomata no eni temple or altar bilong Jehovah stap long Babylon, hao nao olketa faithful Jew showimaot olketa tingim olketa offering bilong Law? (b) Why nao Daniel hem “samwan wea barava spesol”?

¹¹ Gabriel hem kam long “taem bilong evening gift offering.” Olketa spoelem finis evribit altar bilong Jehovah witim temple long Jerusalem, and olketa Jew kamap prisoner bilong olketa heathen pipol long Babylon. So olketa Jew long Babylon no offerim olketa sakrifaes long God. Bat, long taem wea Law Bilong Moses markem for mekem offering, hem fitim for olketa faithful Jew long Babylon for praisem and prea long Jehovah. From hem wanfala man wea loyal evribit long God, Daniel hem “samwan wea barava spesol.” Jehovah, “Man Wea Herem prea,” hem hapi tumas long hem, and sendem Gabriel kwiktaem for ansarem prea bilong faith wea Daniel talem.—Psalm 65:2.

¹² Nomata taem laef bilong hem stap long danger bifor, from hem prea long Jehovah, Daniel go ahed for prea long God thrifala taem insaed wan day. (Daniel 6:10, 11) Dastawe Jehovah ting long hem olsem samwan wea barava spesol! Tugeta witim wei for prea, taem Daniel ting raonem Word bilong God hem kamap fit for luksavve long will bilong Jehovah. Daniel go ahed long prea and hem savve long stretfala wei for story witim Jehovah for mekem prea bilong hem kasem ansa. Hem mekhae long raeteous fasin bilong God. (Daniel 9:7, 14, 16) And nomata olketa enemy bilong hem no savve faendem eni rong long hem, Daniel savve hem wanfala sinner long eye bilong God and laek for talemaot sin bilong hem.—Daniel 6:4; Romans 3:23.

“SEVENTI WEEK” FOR AOTEM SIN

13, 14. (a) Wanem important information nao Gabriel talem long Daniel? (b) Hao long nao datfala “seventi week,” and hao nao iumi savve long datwan?

¹³ Prea bilong Daniel hem kasem spesol ansa! Jehovah talem hem bae olketa Jew go bak long homland bilong olketa and tu hem showim hem samting wea barava moa important—datfala taem wea promis Messiah bae kam. (Genesis 22:17, 18; Isaiah 9:6, 7) Gabriel talem Daniel: “Olketa markem seventi week for pipol bilong iu and for holy taon bilong iu, for finisim wei for brekem law, and for aotem sin, and for kavarem mistek, and for tekem kam raeteous fasin for olowe, and for stampim wanfala seal long vision and profet, and for anointim Holy Bilong Holy. And iu mas savve and minim hao from taem wea toktok go aot for buildim moa Jerusalem go kasem Messiah datfala Leader, bae hem sevenfala week, and tu sixti-tu week. Hem [ Jerusalem] bae kam bak and olketa bae buildim hem moa, witim wanfala pablik ples and wanfala wata raonem, bat long taem bilong trabol.”—Daniel 9:24, 25.

¹⁴ Datwan hem barava gud nius! Olketa bae buildim bak Jerusalem and tru worship bae kamap moa insaed niufala temple and tu “Messiah datfala Leader” bae kam long wanfala barava taem. Evri samting hia bae happen insaed “seventi week.” From Gabriel no storyim olketa day, olketa week hia no bilong sevenfala day nomoa, wea bae kasem total bilong 490 day—wea hem wan year and fofala month nomoa. Wei for buildim moa Jerusalem “witim wanfala pablik ples and wanfala wata raonem” hem tekem moa taem winim datwan. Olketa week hia olketa week bilong year. Wei wea each week hem sevenfala year hem showaot long samfala Bible transleison distaem. Samfala example hem, footnote bilong Daniel 9:24 insaed Tanakh—The Holy Scriptures, wea The Jewish Publication Society pablisim wea transleitim diswan olsem “seventi week bilong year.” An American Translation hem sei olsem: “Olketa markem seventi week bilong year for pipol bilong iu and holy taon bilong iu.” Toktok wea klosap semsem stap insaed Bible transleison bilong Moffatt and Rotherham.

15. Datfala “seventi week” hem divaed long wanem thrifala part, and wanem taem nao hem bae start?

¹⁵ Olsem angel hem talem, datfala “seventi week” bae divaed long thrifala part: (1) “sevenfala week,” (2) “sixti-tu week,” and (3) wan week. Datwan hem 49 year, 434 year, and 7 year—wea hem total bilong 490 year. Hem interesting hao, The Revised English Bible read olsem: “Olketa markem seventi taems seven year for pipol bilong iu and holy taon bilong iu.” Bihaen olketa stap olsem prisoner and safa long Babylon for 70 year, olketa Jew bae kasem spesol samting from God for 490 year, or 70 year taems 7. Start bilong datwan hem taem wea “toktok go aot for buildim moa Jerusalem.” Wanem taem nao diswan bae happen?

“SEVENTI WEEK” HEM START

16. Olsem order bilong hem showimaot, wanem nao goal bilong Cyrus for letem olketa Jew go bak long homland bilong olketa?

¹⁶ Hem gud for lukluk long thrifala important samting wea happen wea join witim start bilong datfala “seventi week.” First wan hem happen long 537 B.C.E. taem Cyrus givim order for olketa Jew go bak long homland bilong olketa. Hem sei: “Diswan nao wanem Cyrus king bilong Persia hem talem, ‘Evri kingdom bilong earth Jehovah God bilong heven givim long mi, and hem komandim mi for buildim wanfala haos for hem long Jerusalem, wea stap long Judah. Eni pipol bilong hem wea stap midolwan long iufala, letem God bilong hem stap witim hem. So letem hem go ap long Jerusalem, wea stap long Judah, and buildim moa haos bilong Jehovah God bilong Israel—hem nao trufala God—wea stap long Jerusalem bifor. Eniwan wea stap yet long olketa ples wea hem stap olsem wanfala stranger, letem olketa man long ples bilong hem givim silver and gold and kago and animal and olketa offering for haos bilong trufala God, wea stap long Jerusalem.’” (Ezra 1:2-4) Hem klia tumas, goal bilong disfala order hem for buildim moa datfala temple—“haos bilong Jehovah”—long ples wea hem stap bifor.

17. Leta wea Ezra karem hem talemaot wanem reason for gogo bilong hem long Jerusalem?

¹⁷ Mek-tu samting hem happen long mek-seven year long rul bilong King Artaxerxes (Artaxerxes Longimanus, son bilong Xerxes I) bilong Persia. Long datfala taem, Ezra datfala man for copyim law hem gogo for fofala month from Babylon go long Jerusalem. Hem karem wanfala spesol leta from king, bat datwan hem no order for buildim moa Jerusalem. Bat, waka bilong Ezra hem for ‘mekem haos bilong Jehovah luk naes.’ Dastawe datfala leta story abaotem gold and silver, olketa holy dish, and contribution bilong wheat, wine, oil, and salt for saportim worship long temple, and tu wei wea olketa wea waka long there mas no peim tax.—Ezra 7:6-27.

18. Wanem nius nao mekem Nehemiah feel wari tumas, and hao nao King Artaxerxes savve abaotem datwan?

¹⁸ Mek-thri samting hem happen 13 year bihaen, long mek-20 year long rul bilong King Artaxerxes bilong Persia. Long datfala taem Nehemiah waka olsem man for servem wine bilong king long “Shushan datfala haos bilong king.” Sekson wea go bak from Babylon buildim samfala part bilong Jerusalem. Bat evri samting no go ahed gud. Nehemiah herem hao “olketa brekem daon wall bilong Jerusalem, and burnim gate bilong hem witim fire.” Diswan mekem hem wari tumas, and heart bilong hem barava sorre. Taem king askem hem why nao hem sorre, Nehemiah ansa olsem: “Letem king stap for longfala taem! Why nao feis bilong mi mas no luk sorre taem taon, haos bilong beregraon bilong olketa laen dadi bilong mi, hem nogud evribit, and fire hem burnim olketa gate bilong hem?”—Nehemiah 1:1-3; 2:1-3.

19. (a) Taem King Artaxerxes askem hem, wanem nao Nehemiah duim firstaem? (b) Wanem nao Nehemiah askem, and hao nao hem luksavve God nao helpem hem long diswan?

¹⁹ Datfala story abaotem Nehemiah hem sei moa: “Then king sei long mi: ‘Wanem nao iu laek for askem?’ Stretawe mi prea long God bilong heven. Bihaen datwan mi sei long king: ‘Sapos hem gud samting long king, and sapos servant bilong iu hem gud front long iu, for mekem iu sendem mi go long Judah, long taon bilong beregraon bilong olketa laen dadi bilong mi, for mi savve buildim moa.’” Artaxerxes laekem disfala idea, and hem givim tu samting moa wea Nehemiah askem: “Sapos hem gud samting long king, letem hem givim mi olketa leta for olketa bigman long narasaed bilong River [Euphrates], mekem olketa savve letem mi go pas for kasem Judah; and tu wanfala leta for Asaph man wea keepim garden bilong king, mekem hem savve givim mi olketa tree for buildim gate bilong Haos Bilong King witim timba, and for wall bilong datfala taon and for haos wea mi bae go insaed.” Nehemiah luksavve long wei wea Jehovah helpem hem long diswan, from hem sei: “So king givim [olketa leta] long mi, fitim gudfala hand bilong God wea stap witim mi.”—Nehemiah 2:4-8.

20. (a) Wanem taem nao toktok “for buildim moa Jerusalem” hem start? (b) Wanem taem nao “seventi week” hem start, and wanem taem nao hem finis? (c) Wanem pruv nao showimaot date wea markem start and finis bilong “seventi week” hem stret?

²⁰ Nomata king letem hem for go long month bilong Nisan, long mek-20 year long rul bilong Artaxerxes, barava “taem wea toktok go aot for buildim moa Jerusalem” hem start samfala month bihaen datwan. Hem start taem Nehemiah kasem long Jerusalem and startim waka for build moa. Gogo bilong Ezra hem for fofala month, bat Shushan hem stap winim 322 kilometer long east saed bilong Babylon so hem farawe moa from Jerusalem. So, luk olsem Nehemiah kasem Jerusalem klosap long end bilong mek-20 year bilong Artaxerxes, or long 455 B.C.E. Long datfala taem nao “seventi week,” or 490 year, bilong profesi hem start. Diswan bae finis long end bilong 36 C.E.—Lukim “Wanem Taem Nao Artaxerxes Start for Rul?” long page 197.

“MESSIAH DATFALA LEADER” HEM KAM

21. (a) Wanem nao bae finis insaed long first “sevenfala week,” and diswan happen nomata wanem samting nao go ahed? (b) Long wanem year nao Messiah bae kam, and wanem nao Gospel bilong Luke sei hem happen long datfala taem?

²¹ Haomas year nao go pas bifor olketa buildim moa Jerusalem? Olketa bae buildim bak datfala taon “long taem bilong trabol” from hardfala samting kamap midolwan long olketa Jew seleva and pipol bilong Samaria and narafala ples againstim olketa. Luk olsem olketa finisim waka wea olketa need for duim long samting olsem 406 B.C.E.—insaed long datfala “sevenfala week,” or 49 year. (Daniel 9:25) Wanfala taem bilong 62 week, or 434 year, bae kam bihaen. Bihaen long datfala taem, promis Messiah bae kam. Sapos iumi kaontem 483 year (49 plus 434) start long 455 B.C.E., bae iumi kasem 29 C.E. Wanem nao happen long datfala taem? Man wea raetem Gospel, Luke hem sei: “Long mek-fiftin year long rul bilong Tiberius Caesar, taem Pontius Pilate hem governor bilong Judea, and Herod hem ruler long distrik bilong Galilee, . . . toktok bilong God kam long John son bilong Zechariah long wilderness. So hem kam long evri ples long Jordan, and preach abaotem wei for baptaes olsem saen for repent and kasem forgiveness long olketa sin.” Long datfala taem “pipol luk forward” long Messiah.—Luke 3:1-3, 15.

22. Wanem taem nao and hao nao Jesus kamap Messiah wea profesi storyim?

²² John hem no datfala promis Messiah. Bat taem hem lukim Jesus bilong Nazareth hem baptaes long 29 C.E., John hem sei: “Mi lukim spirit kamdaon olsem wanfala kurukuru from heven, and hem stap antap long hem. Mi tu no savve long hem, bat dat Wan wea sendem mi for baptaesim pipol long wata hem sei long mi, ‘Man wea iu lukim spirit kamdaon long hem and stap witim hem, hem nao bae baptaesim pipol long holy spirit.’ And mi lukim finis, and mi witness abaotem wei wea dis wan nao hem Son bilong God.” (John 1:32-34) Taem hem baptaes, Jesus kamap Anointed Wan—datfala Messiah, or Christ. No longtaem bihaen, Andrew, disaepol bilong John meetim anointed wan Jesus and hem talem Simon Peter: “Mifala faendem Messiah finis.” (John 1:41) So, “Messiah datfala Leader” hem kam long barava taem—long end bilong 69 week!

SAMTING WEA HAPPEN INSAED LASTFALA WEEK

23. Why nao “Messiah datfala Leader” mas dae, and wanem taem nao diswan mas happen?

²³ Wanem nao bae happen insaed long mek-70 week? Gabriel sei datfala “seventi week” hem for “finisim wei for brekem law, and for aotem sin, and for kavarem mistek, and for tekem kam raeteous fasin for olowe, and for stampim wanfala seal long vision and profet, and for anointim Holy Bilong Holy.” For diswan happen, “Messiah datfala Leader” mas dae. Long wanem taem? Gabriel hem sei: “Bihaen long sixti-tu week Messiah bae kat off, and hem bae no garem eni samting. . . . And hem mas keepim datfala covenant open for planti pipol for wanfala week; and long haf bilong datfala week hem bae mekem sakrifaes and gift offering for finis.” (Daniel 9:26a, 27a) Datfala important taem hem “long haf bilong datfala week,” hem nao, midol long lastfala week bilong olketa year.

24, 25. (a) Olsem profesi talem, wanem taem nao Christ hem dae, and wanem nao dae and resurrection bilong hem finisim? (b) Dae bilong Jesus hem openem wei for wanem samting?

²⁴ Pablik ministry bilong Jesus Christ hem start long lastfala part bilong 29 C.E. and hem duim for thri and haf year. Olsem profesi talem, long start bilong 33 C.E., Christ hem “kat off” taem hem dae long wanfala torture-stake, and givim laef bilong hem olsem wanfala ransom for olketa man. (Isaiah 53:8; Matthew 20:28) Wei for givim olketa animal sakrifaes and gift offering wea Law askem hem finis taem Jesus wea resurrect givim price bilong laef bilong hem olsem man long God long heven. Nomata olketa Jew priest go ahed for givim offering go kasem taem temple long Jerusalem finis evribit long 70 C.E., God no acceptim moa olketa sakrifaes olsem. Wanfala beta sakrifaes nao changem olketa, wea kamap wanfala taem nomoa. Aposol Paul hem raet olsem: “[Christ] offerim wanfala sakrifaes for olketa sin for olowe . . . From thru long wanfala sakrifaes wea hem offerim nao hem mekem olketa wea holy kamap perfect for olowe.”—Hebrews 10:12, 14.

²⁵ Nomata sin and dae go ahed for spoelem olketa man, wei wea Jesus kat off long dae and resurrect for laef long heven hem fulfillim profesi. Hem ‘finisim wei for brekem law, aotem sin, kavarem mistek, and tekem kam raeteous fasin.’ God hem aotem Law covenant, wea showimaot and judgem olketa Jew olsem olketa sinner. (Romans 5:12, 19, 20; Galatians 3:13, 19; Ephesians 2:15; Colossians 2:13, 14) Hem aotem sin bilong olketa wea duim rong wea repent, and aotem panis wea kamaot from datwan. Thru long wei wea Messiah givim sakrifaes wea kavarem sin, olketa wea showimaot faith fit for fren moa witim God. Olketa savve luk forward for kasem present bilong God for “laef olowe thru long Christ Jesus.”—Romans 3:21-26; 6:22, 23; 1 John 2:1, 2.

26. (a) Nomata Law covenant hem finis, wanem covenant nao hem ‘open for wanfala week’? (b) Wanem nao happen long end bilong mek-70 week?

²⁶ Hem nao wei wea Jehovah aotem Law covenant thru long dae bilong Christ long 33 C.E. So, hao nao Bible hem sei Messiah “mas keepim datfala covenant open for planti pipol for wanfala week”? Bikos hem keepim covenant bilong Abraham open. Go kasem end bilong mek-70 week, God showimaot olketa blessing bilong datfala covenant go long olketa Hebrew pikinini bilong Abraham. Bat long end bilong datfala “seventi week” bilong year, long 36 C.E., aposol Peter preach long wanfala man bilong Italy, Cornelius, famili bilong hem, and olketa narafala Gentile. And start from datfala day, olketa talemaot gud nius long pipol bilong olketa nation.—Acts 3:25, 26; 10:1-48; Galatians 3:8, 9, 14.

27. Wanem “Holy Bilong Holy” nao kasem anointing, and long wanem wei?

²⁷ Profesi talemaot tu anointing bilong “Holy Bilong Holy.” Diswan no minim anointing bilong Most Holy, or main rum, bilong temple long Jerusalem. Disfala toktok “Holy Bilong Holy” long hia hem minim holy ples bilong God long heven. Long there, Jesus givim long Dadi bilong hem price bilong sakrifaes bilong hem olsem man. Baptism bilong Jesus, long 29 C.E., hem anointim, or markem, datfala spiritual arrangement long heven wea Most Holy bilong tabernacle long earth and bilong temple wea kamap bihaen hem piksarem.—Hebrews 9:11, 12.

GOD STRONGIM DATFALA PROFESI

28. Wanem nao hem minim for “stampim wanfala seal long vision and profet”?

²⁸ Profesi abaotem Messiah wea angel Gabriel talemaot hem sei tu for “stampim wanfala seal long vision and profet.” Diswan minim evri profesi abaotem Messiah—evri samting wea hem duim thru long sakrifaes, resurrection, and taem hem go long heven, and tu olketa narafala samting wea happen insaed long mek-70 week—God bae appruvim, bae olketa really happen, and man fit for trustim. Datfala vision bae garem seal, wea fitim Messiah nomoa. Evri samting bae fulfill long hem and insaed long waka bilong God thru long hem. Long saed bilong Messiah nomoa iumi savve faendem stretfala mining bilong datfala vision. No eni samting moa bae aotem seal for savve long mining bilong hem.

29. Wanem nao bae happen long Jerusalem wea olketa buildim moa, and for wanem reason?

²⁹ Long bifor Gabriel talemaot profesi hao olketa bae buildim moa Jerusalem. Long distaem hem talemaot hao datfala taon and temple wea olketa buildim moa bae finis evribit, hem sei: “Pipol bilong wanfala leader wea bae kam bae finisim evribit datfala taon and holy ples. And end bilong hem nao bae thru long flood. And go kasem end war bae go ahed; samting wea olketa disaedem nao hem wei for spoelem evribit. . . . And long wing bilong olketa nogud samting dat wan wea spoelem samting bae stap; and go kasem taem for finis evribit, olketa bae pourimaot samting wea olketa disaedem long dat wan wea stap nogud.” (Daniel 9:26b, 27b) Nomata disfala wei for finis evribit bae kamap bihaen long datfala “seventi week,” diswan bae kamaot from olketa samting wea happen insaed long datfala lastfala “week,” taem olketa Jew rejectim Christ and killim hem dae.—Matthew 23:37, 38.

30. Olsem history showimaot, hao nao order bilong Nambawan Man For Keepim Taem hem fulfill?

³⁰ History showimaot long 66 C.E., olketa army bilong Rome anda long Governor bilong Syria, Cestius Gallus, olketa raonem Jerusalem. Nomata olketa Jew faetem olketa, army bilong Rome wea karem olketa heathen saen, or flag, go insaed long datfala taon and start for attakim wall bilong temple long north saed. Wei wea olketa stap long there hem mekem olketa kamap wanfala “barava rabis samting” wea savve spoelem evri samting. (Matthew 24:15, 16) Long 70 C.E., olketa bilong Rome anda long General Titus kam olsem wanfala “flood” and barava spoelem datfala taon and temple bilong hem. No eni samting stopem olketa, bikos God nao komandim—“disaedem”—finis. Nambawan Man For Keepim Taem, Jehovah, fulfillim moa toktok bilong hem!

WANEM NAO IU LANEM?

• Taem 70 year wea Jerusalem stap emti hem klosap finis, wanem nao olketa samting wea Daniel askem long Jehovah?

• Hao long nao datfala “seventi week,” and wanem taem nao hem start and finis?

• Wanem taem nao “Messiah datfala Leader” hem kam, and wanem important taem nao hem “kat off”?

• Wanem covenant nao “open for planti pipol for wanfala week”?

• Wanem nao happen bihaen long datfala “seventi week”?

[Box/Piksa long page 197]

Wanem Taem Nao Artaxerxes Start for Rul?

OLKETA man for raetem history no agree long year wea rul bilong King Artaxerxes bilong Persia hem start. Samfala sei hem start rul long 465 B.C.E. bikos dadi bilong hem, Xerxes, start for rul long 486 B.C.E. and dae long mek-21 year long rul bilong hem. Bat, pruv stap wea showimaot Artaxerxes hem kamap king long 475 B.C.E. and startim first full year for rul long 474 B.C.E.

Olketa raeting and karving wea olketa digimap long kapitol bilong Persia bifor, Persepolis, showimaot Xerxes and dadi bilong hem Darius I rul tugeta. Sapos diswan hem for 10-fala year and Xerxes rul seleva for 11-fala year bihaen Darius hem dae long 486 B.C.E., diswan minim firstfala year long rul bilong Artaxerxes hem long 474 B.C.E.

Mek-tu pruv nao hem abaotem General Themistocles bilong Athens, wea winim army bilong Xerxes long 480 B.C.E. Bihaen, olketa Greek pipol les long hem and accusim hem for againstim gavman. Themistocles ranawe and askem king bilong Persia for protectim hem, wea hapi for duim datwan. Olsem Greek man for raetem history Thucydides hem talem, diswan happen taem Artaxerxes hem “just start for rul.” Greek man for raetem history Diodorus Siculus hem sei Themistocles hem dae long 471 B.C.E. From Themistocles askem wan year for lanem languis bilong Persia bifor hem go front long King Artaxerxes, hem mas kasem Asia Minor no winim 473 B.C.E. Chronicle of Eusebius wea Jerome raetem hem saportim datfala date tu. From Artaxerxes hem “just start for rul” taem Themistocles kasem Asia long 473 B.C.E., savveman bilong Germany Ernst Hengstenberg sei insaed buk bilong hem Christology of the Old Testament hao rul bilong Artaxerxes start long 474 B.C.E., olsem samfala narafala buk tu talem. Hem sei moa: “Mek-twenti year bilong Artaxerxes hem nao year 455 bifor Christ.”

[Piksa]

Karving bilong Themistocles

[Diagram/Piksa long page 188, 189]

(For formatted text, lukim pablikeson)

“SEVENTI WEEK”

7 week 62 week 1 week

49 year 434 year 7 year

[Full-page picture on page 180]

[Full-Page piksa long page 193]