Hu Nao Olketa Enemy Bilong God?

Main enemy bilong God hem Satan datfala Devil. Satan hem wanfala spirit angel wea bighed againstim Jehovah. Satan hem go ahed for faet againstim God and hem kosim bigfala trabol for olketa man. Satan hem barava nogud. Hem man for laea and killim man dae.—John 8:44.

Olketa nara spirit angel joinim Satan for againstim God. Bible hem kolem olketa hia olketa demon. Olsem Satan, evri demon nao enemy bilong man. Olketa laek for spoelem pipol. (Matthew 9:32, 33; 12:22) Jehovah bae barava finisim Satan and evri demon bilong hem for olowe. Lelebet taem nomoa stap yet for olketa mek trabol for olketa man.—Revelation 12:12.

Sapos iu laek for kamap fren bilong God, iu mas no duim samting wea Satan laekem iu for duim. Satan and olketa demon bilong hem heitim Jehovah. Olketa nao enemy bilong God, and olketa laek for mekem iu enemy bilong God. Iu mas chusim hu nao iu laek for mekem hapi—Satan or Jehovah. Sapos iu laekem laef olowe, iu mas chus for duim will bilong God. Satan garem planti trik and wei for giamanim pipol. Satan trikim klosap evri pipol.—Revelation 12:9.