Stretfala Taeming

NOMATA main samting hem for iu teach gud, iu mas ting strong long taeming bilong olketa tok bilong iu tu. Olketa markem taem for olketa meeting bilong iumi start and finis. For duim olsem evriwan wea garem part long program mas tingim diswan.

Long taem bilong Bible, pipol no garem semkaen tingting abaotem living olsem pipol long planti ples distaem. Pipol storyim taem olsem “long samting olsem mek-thri hour” or “samting olsem mek-ten hour.” (Matt. 20:3-6; John 1:39) Olketa no warim barava taem for samting olketa duim long living evriday. Long samfala ples long world distaem, pipol garem semkaen tingting abaotem taem.

Bat, nomata samfala pipol no followim taem from kastom or disison bilong man wanwan, iumi savve kasem gud samting sapos iumi ting strong long hem. Taem samfala difren man kasem assignment long program, olketa mas tingim taeming wea olketa markem for each part. Datfala principle “letem evri samting followim stretfala wei and order” hem barava fitim taeming bilong olketa part long meeting bilong iumi.—1 Cor. 14:40.

For Followim Taeming wea Olketa Markem. For win, man mas prepare firstaem. Planti taem, olketa speaker wea garem problem witim taeming fail for prepare gud firstaem. Olketa maet ova tumas for trustim seleva. Or maet olketa delay, gogo olketa no garem inaf taem for prepare. Faondeson for stretfala taeming hem wei for tinghae long assignment bilong iu and willing for preparem gud.

Waswe, iu kasem reading assignment? First samting, reviewim Study namba 4 go kasem 7, wea deal witim wei for tok smooth, stop lelebet, strongim feeling, and strongim olketa main idea. Then, followim datfala kaonsel taem iu readim big information wea olketa assignim long iu. Taemim iuseleva. Waswe, iu need for read moa fast for finis insaed taem wea olketa markem? Long olketa sekson wea no important tumas read moa fast, bat go ahed for iusim wei for stop lelebet and moa slow for strongim olketa important idea. Practicem planti taem. Taem reading bilong iu hem smooth, bae hem moa isi for kontrolem taeming.

Waswe, bae iu givim tok followim olketa note? Iu no need for raetem klosap full tok—olsem wanfala manuscript—for garem stretfala taeming. Taem iu waka long Study 25, iu lanem wanfala wei wea moabeta. Tingim evritaem faevfala point hia: (1) Preparem gudfala information, bat no staka tumas. (2) Mek sure olketa main idea hem klia long mind bilong iu, bat no baeheartim olketa full sentence. (3) Putim mark long aotlaen for showim haomas taem iu plan for iusim for each sekson long tok bilong iu or wanem taem iu shud kasem samfala point. (4) Taem iu prepare, tingim information wea iu savve leavim sapos iu luksavve iu bae ovataem. (5) Practicem tok bilong iu.

Hem important for practice. Taem iu practice, chekim taeming long each sekson long tok bilong iu. Practicem planti taem go kasem taem iu savve givim full tok insaed taem wea olketa markem. No trae for storyim tumas information. No iusim full taem bikos for givim tok front long audience maet needim lelebet moa taem winim taem iu practice seleva.

Divaedem Taem Fitim Each Sekson. Gudfala taeming hem join witim wei for divaedem taem for fitim each sekson bilong wanfala tok. Body bilong tok nao needim moa taem winim olketa nara sekson. Hem nao sekson wea garem olketa main point bilong instruction. Introduction mas long inaf for kasem thrifala goal wea Study 38 storyim. Body bilong tok mas no long tumas wea mekem no inaf taem stap for gudfala conclusion, olsem Study 39 storyim.

Hard waka bilong iu for followim stretfala taeming bae mekem tok bilong iu moabeta and bae showimaot iu respectim olketa narawan wea garem part long program and full kongregeson tu.