Olketa Law Bilong God Stap for Helpem Iumi
“Mi barava lovem law bilong iu!”—PSALM 119:97.
1. Wanem nao tingting bilong planti pipol distaem saed long wei for obeyim olketa law bilong God?
NO PLANTI pipol laek obeyim olketa law bilong God distaem. Planti ting wei for stap anda long samwan wea garem hae paoa wea olketa no lukim, hem iusles nomoa. Iumi stap long taem wea olketa mark bilong fasin savve change enitaem, taem wea olketa spialaen bilong samting wea stret and rong hem no klia tumas, and taem bilong enihao nomoa. (Proverbs 17:15; Isaiah 5:20) Wanfala research wea olketa duim no longtaem go nomoa wea showimaot tingting bilong planti long world sei “planti pipol bilong America laek for disaedem seleva wanem nao stret, gud and garem mining.” Olketa laekem “God wea no strict. Rul wea no strict. Bigman wea no garem hae standard, saed long fasin or eni nara samting.” Wanfala man wea studyim living sei distaem “olketa man wanwan nao mas disaed seleva wanem hem minim for garem living wea gud and stret saed long fasin.” Hem sei moa: “Eniwan wea garem hae paoa mas changem olketa law bilong hem for fitim need bilong pipol.”
2. Hao nao first samting wea Bible talem abaotem law hem join witim wei wea God appruvim and blessim iumi?
2 From planti pipol kwestinim wei wea olketa law bilong Jehovah gud or nomoa, iumi need for strongim biliv bilong iumi hao olketa standard bilong hem stap for helpem iumi. Hem gud for lukim taem wea Bible hem firstaem story abaotem law. Long Genesis 26:5, God hem sei: “Abraham . . . go ahed for fulfillim olketa responsibility bilong hem for mi, olketa komand bilong mi, olketa law bilong mi.” Jehovah talem toktok hia planti handred year bifor hem givim law long olketa laen pikinini bilong Abraham. Hao nao God givim reward long Abraham for wei wea hem obey, insaed diswan hem wei for obeyim olketa law bilong Hem? Jehovah God promisim hem olsem: “Thru long seed bilong iu evri nation bilong earth bae barava blessim olketa seleva.” (Genesis 22:18) Wei for obeyim olketa law bilong God hem barava join witim wei wea God appruvim and blessim iumi.
3. (a) Wanem feeling abaotem law bilong Jehovah nao man wea raetem psalm hem storyim? (b) Wanem nao olketa kwestin wea iumi fit for lukluk long hem?
3 Wanfala man wea raetem psalm—maet wanfala prince bilong Judah and king wea bae rul—talemaot wanfala feeling wea no planti taem join witim law. Hem sei long God: “Mi barava lovem law bilong iu!” (Psalm 119:97) Diswan no toktok wea man seknomoa talem from strongfala feeling bilong hem. Hem talem love wea hem garem for will bilong God wea stap insaed long law bilong hem. Jesus Christ, perfect Son bilong God, garem semkaen feeling. Profesi talemaot toktok bilong Jesus hia: “Mi barava hapi tumas for duim will bilong iu, O God bilong mi, and law bilong iu hem stap insaed long mi.” (Psalm 40:8; Hebrews 10:9) Waswe long iumi? Waswe, iumi hapi for duim will bilong God? Waswe, iumi barava sure olketa law bilong Jehovah gud and helpem iumi? Waswe, wei for obeyim olketa law bilong God hem first samting long worship, evriday living, wanem iumi disaedem, and wei wea iumi fren witim nara pipol? For lovem law bilong God, hem gud for minim why God hem garem raet for mekem and strongim olketa law.
Jehovah—Garem Raet for Givim Law
4. Why nao Jehovah nomoa only wan wea garem raet for givim Law?
4 From hem Creator, Jehovah nao only wan long universe wea garem raet for givim Law. (Revelation 4:11) Profet Isaiah hem sei: “Jehovah hem Man for Givim Law long iumi.” (Isaiah 33:22) Hem markem olketa physical law wea kontrolem olketa creation wea garem laef and no garem laef. (Job 38:4-38; 39:1-12; Psalm 104:5-19) From God creatim hem, man stap anda long olketa physical law bilong Jehovah. And nomata man hem free for chus, and savve ting raonem samting seleva, hem savve hapi only long taem wea hem stap anda long olketa law bilong God saed long fasin and spiritual wei.—Romans 12:1; 1 Corinthians 2:14-16.
5. Hao nao principle long Galatians 6:7 hem tru saed long olketa law bilong God?
5 Olsem iumi savve, man no savve brekem olketa physical law bilong Jehovah. (Jeremiah 33:20, 21) Sapos samwan hem go againstim olketa physical law, olsem law bilong gravity, hem kasem samting wea kamaot from datwan. Long sem wei, olketa law bilong God saed long fasin no savve change and man no savve go raonem or brekem olketa and missim nogud samting. Olsem olketa natural law, sapos man brekem olketa law hia hem bae kasem samting wea kamaot from datwan, nomata maet hem no feelim datwan stretawe. “Iufala no savve mekful long God. Eni samting man hem plantim, datwan nao bae hem harvestim.”—Galatians 6:7; 1 Timothy 5:24.
Waed Bilong Law Bilong Jehovah
6. Hao waed nao olketa law bilong God?
6 Wanfala nambawan example bilong law bilong God hem Law bilong Moses. (Romans 7:12) Gogo, Jehovah God changem Law bilong Moses witim “law bilong Christ.”a (Galatians 6:2; 1 Corinthians 9:21) Olsem olketa Christian wea stap anda long “perfect law wea bilong freedom,” iumi luksavve hao God no putim olketa instruction for samfala part long living bilong iumi nomoa, olsem olketa biliv bilong religion or ceremony for duim. Olketa standard bilong hem fitim evri part long laef bilong iumi, insaed diswan famili, bisnis, fasin wea man showim long opposite sex, tingting abaotem olketa nara Christian, and wei for share insaed long tru worship.—James 1:25, 27.
7. Givim olketa example long olketa important law bilong God.
7 Olsem example, Bible sei: “Olketa wea duim fornication, or worshipim idol, or duim adultery, or duim homosexual fasin, or man wea leidaon witim man, or man for steal, or man wea greedy, or man wea savve drunk, or man wea tok againstim narafala man, or man wea savve laea for pullim selen, bae no kasem kingdom bilong God.” (1 Corinthians 6:9, 10) Tru nao, adultery and fornication no “wei for fren” nomoa. Homosexual fasin hem no “narafala wei bilong living” nomoa. Olketa hia brekem law bilong Jehovah. And tu fasin for steal, laea, and tok laea againstim narawan. (Psalm 101:5; Colossians 3:9; 1 Peter 4:15) James hem tok strong againstim toktok wea mekhae long seleva, and Paul givim advaes long iumi for stap klia long krangge toktok and wei for mekfani long dirty samting. (Ephesians 5:4; James 4:16) For olketa Christian, evri rul bilong fasin hia part long perfect law bilong God.—Psalm 19:7.
8. (a) Law bilong Jehovah hem wanem kaen law? (b) Wanem nao main mining bilong Hebrew word for “law”?
8 Olketa main law olsem insaed Word bilong Jehovah showimaot hao law bilong hem minim moa samting winim wanfala list bilong olketa law nomoa. Hem givim faondeson for garem living wea balance, duim planti samting, and mekem evri fasin bilong man hem gud. Law bilong God hem buildimap man, barava hae mark saed long fasin, and teachim man. (Psalm 119:72) Datfala word “law” wea man for raetem psalm iusim hem kam from Hebrew word toh·rahʹ. Wanfala man wea skulim Bible sei: “Disfala word hem minim for directim, leadim, markem, sut go. So, mining bilong hem . . . bae wanfala rul bilong fasin.” For datfala man wea raetem psalm, law hem wanfala present from God. Waswe, fitim iumi tu for barava tinghae long hem and letem datwan affectim living bilong iumi?
9, 10. (a) Why nao iumi needim direction wea iumi savve trustim? (b) Hao nomoa man savve garem laef wea hapi and wea win?
9 Evriwan needim direction and instruction wea hem savve trustim. Jesus and olketa narafala angel, wea hae winim man, needim diswan tu. (Psalm 8:5; John 5:30; 6:38; Hebrews 2:7; Revelation 22:8, 9) Sapos olketa hia wea perfect savve kasem gudfala samting from instruction bilong God, olketa man wea no perfect barava needim! History bilong man and samting wea iumiseleva experiencem pruvim disfala tru toktok bilong profet Jeremiah: “Mi savve, O Jehovah, wei bilong man hem no bilong hem. Hem no bilong man wea wakabaot for disaedem gogo bilong hem.”—Jeremiah 10:23.
10 Sapos iumi laekem laef wea hapi and wea win, iumi mas luk long God for leadim iumi. King Solomon luksavve long danger for man seleva markem olketa standard long living wea no followim instruction bilong God: “Long mind bilong man wei bilong hem stret, bat wei bilong dae nao stap long end bilong hem.”—Proverbs 14:12.
Olketa Reason for Barava Tinghae Long Law Bilong Jehovah
11. Why nao iumi shud want for minim olketa law bilong God?
11 Iumi bae kasem gudfala samting sapos iumi mekem grow deep feeling for want for minim law bilong Jehovah. Man wea raetem psalm hem talem feeling for barava wantem olsem taem hem sei: “Aotem kava from eye bilong mi, mekem mi savve lukluk long olketa nambawan samting long law bilong iu.” (Psalm 119:18) Taem iumi savve long moa samting abaotem God and olketa wei bilong hem, wei wea iumi tinghae long disfala toktok bilong Isaiah bae kamap moa deep: “Mi, Jehovah, mi nao God bilong iufala, Datwan wea teachim iufala for helpem iufala seleva, Datwan wea mekem iufala followim road wea iufala mas wakabaot long hem. O sapos iufala barava obeyim olketa komandment bilong mi!” (Isaiah 48:17, 18) Jehovah laekem tumas for pipol bilong hem stap klia from trabol and enjoyim laef long wei for obeyim olketa komandment bilong hem. Bae iumi lukluk long samfala main reason why iumi shud barava tinghae long law bilong God.
12. Hao nao wei wea Jehovah savve long iumi mekem hem best wan for givim Law?
12 Law bilong God kam from Datwan wea savve long iumi winim eni narawan. From Jehovah nao Creator bilong iumi, hem stret for sei hem nao barava savve gud long olketa man. (Psalm 139:1, 2; Acts 17:24-28) Olketa klos fren, relative, and dadi and mami tu no savve gud long iumi olsem Jehovah. For tok stret, God savve long moa samting abaotem iumi, winim wanem iumi savve abaotem iumiseleva! Man wea Wakem iumi hem barava savve tumas long spiritual saed, feeling, mind and olketa physical need bilong iumi. Taem hem lukluk kam long iumi, hem showimaot deepfala wei for minim fasin bilong iumi, samting iumi wantem, and olketa hope bilong iumi. Jehovah minim olketa wik point bilong iumi, bat hem savve tu long gud samting wea iumi fit for duim. Man wea raetem psalm hem sei: “Hem savve gud hao hem wakem iumi, hem tingim hao iumi dust.” (Psalm 103:14) So, iumi savve feel sef long spiritual saed taem iumi wakabaot insaed law bilong hem, willing for stap anda long lead bilong hem.—Proverbs 3:19-26.
13. Why nao iumi sure Jehovah hem interest tumas long iumi?
13 Law bilong God kam from Datwan wea lovem iumi. God hem interest tumas for iumi garem gudfala living for olowe. Tru nao, hem duim barava bigfala samting taem hem givim Son bilong hem olsem wanfala “ransom for baem bak planti pipol.” (Matthew 20:28) Jehovah promis for ‘no letem eni temptation kasem iumi wea iumi no fit for winim.’ (1 Corinthians 10:13) Bible talem iumi hao hem ‘kea for iumi.’ (1 Peter 5:7) No eniwan hem garem love and interest winim Jehovah for givim olketa gudfala instruction for olketa man. Hem savve wanem nao gud samting for iumi and samting wea bae givim hapi and sorre. Nomata iumi no perfect and duim mistek, sapos iumi aftarem raeteous fasin, hem showimaot love bilong hem for iumi long olketa wei wea bae lead go for laef and blessing.—Ezekiel 33:11.
14. Long wanem important wei nao law bilong God difren from idea bilong olketa man?
14 Law bilong God kanduit change. Insaed hardfala taem wea iumi stap distaem, Jehovah hem stedy olsem wanfala strongfala ston, wea stap for olowe. (Psalm 90:2) Hem sei olsem abaotem hemseleva: “Mi nao Jehovah; mi nating change.” (Malachi 3:6) Man fit for trustim evribit olketa mark bilong God, wea stap insaed long Bible—wea difren evribit from olketa idea bilong man wea change evritaem. (James 1:17) Olsem example, for planti year olketa doctor bilong mind apim wei for isisi long pikinini, bat bihaen samfala changem tingting bilong olketa and sei advaes bilong olketa hem rong. Olketa standard bilong world long diswan hem change evritaem olsem wind wea go and kam. Nomata olsem, Word bilong Jehovah hem nating change. For planti handred year, Bible givim kaonsel long hao for disciplinem pikinini witim love. Aposol Paul raet olsem: “Iufala dadi, no mekem olketa pikinini bilong iufala kros, bat go ahed for trainim olketa long discipline and wei for stretem tingting wea kam from Jehovah.” (Ephesians 6:4) Iumi kasem comfort for savve iumi fit for depend long olketa standard bilong Jehovah; olketa bae no change!
Blessing for Olketa wea Obeyim Olketa Law Bilong God
15, 16. (a) Wanem nao bae happen sapos iumi followim olketa standard bilong Jehovah? (b) Hao nao olketa law bilong God savve givim gudfala instruction insaed marit?
15 Thru long profet bilong hem Isaiah, God hem sei: “Toktok bilong mi wea go aot from mouth bilong mi . . . bae barava win.” (Isaiah 55:11) Long sem wei tu, taem iumi traem best for followim olketa standard wea stap insaed Word bilong hem, bae iumi win, duim gud samting, and faendem hapi.
16 Tingim hao olketa law bilong God givim gudfala instruction for garem marit wea win. Paul raet olsem: “Letem marit garem honor midolwan long evriwan, and marit bed no kamap dirty, bikos God bae judgem olketa wea duim fornication and adultery.” (Hebrews 13:4) Tufala wea marit mas showimaot respect and love long each other: “Letem evriwan long iufala wanwan lovem waef bilong hem olsem hemseleva; long narasaed, waef mas garem bigfala respect for hasband bilong hem.” (Ephesians 5:33) Wan Corinthians 13:4-8 hem storyim kaen love wea man needim hia: “Love hem long-safaring and kaen. Love hem no jealous, hem no tok praod, hem no bighed, hem no duim fasin wea no fitim, hem no lukaotem samting bilong hemseleva nomoa, hem no savve kros. Hem no keepim record bilong rong wea samwan duim. Hem no hapi long samting wea no raeteous, bat hem hapi witim truth. Hem kavarem evri samting, bilivim evri samting, hope long evri samting, hem stand strong long evri samting. Love hem nating savve fail.” Marit wea garem love olsem bae nating fail.
17. Wanem nao olketa gudfala samting wea kamaot from wei for followim olketa standard bilong Jehovah saed long wei for iusim alcohol?
17 Nara samting wea pruvim wei wea olketa standard bilong Jehovah savve helpem man, hem nao wei wea hem tok againstim fasin for drunk. Hem no acceptim tu wei for ‘drinkim tumas wine.’ (1 Timothy 3:3, 8; Romans 13:13) Planti wea ting nating long diswan kasem sik wea kamaot from wei for drink tumas. From samfala no followim kaonsel bilong Bible for balance, gogo olketa garem wei for drinkim tumas alcohol for “helpem olketa relax.” Planti problem kamaot from wei for drink tumas, insaed diswan wei for lusim respect, famili no stap gud or brekdaon, selen lus nating, and lusim waka. (Proverbs 23:19-21, 29-35) Olketa standard bilong Jehovah saed long wei for iusim alcohol barava olsem protection.
18. Waswe, olketa law bilong God helpem man saed long selen? Explainim diswan.
18 Olketa standard bilong God barava gud tu saed long selen. Bible encouragem olketa Christian for honest and waka hard. (Luke 16:10; Ephesians 4:28; Colossians 3:23) From olketa followim disfala kaonsel, planti Christian kasem hae position or no finis from waka taem olketa narawan lei off. Man savve sevem selen tu taem hem no duim olketa samting wea againstim Bible olsem for gamble, smoke, and iusim drug. Maet iu savve tingim olketa nara example bilong gudfala samting wea kamaot from wei for followim olketa standard bilong God.
19, 20. Why nao hem wise for acceptim and hol strong long olketa law bilong God?
19 Hem isi for man wea no perfect for go difren from olketa law and standard bilong God. Tingim olketa Israelite long Maunt Sinai. God sei long olketa: “Sapos iufala obeyim evribit voice bilong mi and keepim covenant bilong mi, then iufala bae kamap spesol samting bilong mi from midolwan long evri narafala pipol.” Olketa ansa: “Evri samting wea Jehovah hem talem, mifala willing for duim.” Nomata olsem, olketa followim barava difren gogo! (Exodus 19:5, 8; Psalm 106:12-43) Long difren wei, iumi mas acceptim and hol strong long olketa standard bilong God.
20 Wei for followim evribit olketa nambawan law wea Jehovah givim for leadim laef bilong iumi hem wise samting and savve givim hapi. (Psalm 19:7-11) For win long wei for duim diswan, iumi need tu for tinghae long wei wea olketa principle bilong God helpem iumi. Diswan nao bae iumi storyim long next article.
[Footnote]
a For moa information abaotem “law bilong Christ,” lukim Wastaoa, September 1, 1996, page 14-24.
Waswe, Iu Remember?
• Why nao iumi savve trustim wei wea olketa law bilong God helpem iumi?
• Wanem nao olketa reason why iumi shud barava tinghae long law bilong Jehovah?
• Long olketa wanem wei nao olketa law bilong God savve helpem man?
[Piksa long page 13]
Abraham kasem rich blessing from hem obeyim law bilong Jehovah
[Olketa Piksa long page 15]
Olketa wari bilong living distaem mekem planti no tingim law bilong God
[Piksa long page 17]
Olsem wanfala laethaos antap long wanfala bigfala ston, law bilong God hem stedy and kanduit change