Kwestin From Reader
Why nao Elisha ask for “tufala part” long strong bilong Elijah?
Just bifor Elijah hem finisim assignment bilong hem olsem wanfala profet long Israel, datfala young profet Elisha askem hem: “Plis, letem tufala part long strong bilong iu kam long mi.” (2 Kings 2:9) Luk olsem long spiritual wei Elisha hem ask for kasem tufala part wea hem samting wea wanfala firstborn hem fit for kasem. (Deuteronomy 21:17) Wei for lukluk long disfala story bae mekem diswan klia and helpem iumi for lanem olketa leson from samting wea happen.
From hem followim direction wea Jehovah givim, profet Elijah hem anointim Elisha olsem wan wea bae changem hem. (1 Kings 19:19-21) For samting olsem sixfala year, Elisha serve olsem faithful servant bilong Elijah and hem disaed strong for duim diswan for olowe. Nomata long last day bilong Elijah olsem profet long Israel, Elisha waka gud yet witim teacher bilong hem. Taem Elijah encouragem Elisha for no followim hem moa, datfala young profet sei olsem thrifala taem: “Mi bae no lusim iu.” (2 Kings 2:2, 4, 6; 3:11) Tru nao, Elisha ting long datfala olo profet olsem spiritual dadi bilong hem.—2 Kings 2:12.
Nomata olsem, no Elisha seleva nao spiritual son bilong Elijah. Elijah and Elisha part long wanfala grup bilong olketa man wea garem nem “olketa son bilong olketa profet.” (2 Kings 2:3) Story long Tu Kings showimaot hao olketa “son” hia feel klos long spiritual dadi bilong olketa, Elijah. (2 Kings 2:3, 5, 7, 15-17) Bat, from Elisha nao wan wea Elijah anointim for changem hem, hem nao main wan long olketa spiritual son bilong Elijah—hem olsem firstborn. Long Israel bifor, really firstborn son hem kasem tufala part long olketa samting bilong dadi bilong hem, bat olketa nara son kasem wanfala part nomoa. Dastawe Elisha askem Elijah for tufala part long spiritual present wea hem givim.
Why nao Elisha askem diswan long datfala taem? Bikos hem redy for duim wanfala important waka—hem nao for changem Elijah olsem profet long Israel. Elisha luksavve hao wei for fulfillim olketa responsibility wea join witim disfala barava serious assignment, hem needim spiritual paoa winim wanem hemseleva garem, paoa wea Jehovah nomoa savve givim. Hem need for garem fasin bilong Elijah for no fraet. (2 Kings 1:3, 4, 15, 16) Dastawe hem askem tufala part long strong bilong Elijah, strong for no fraet and wei for “jealous evribit for Jehovah”—olketa fasin wea spirit bilong God mekem grow. (1 Kings 19:10, 14) Wanem nao Elijah duim?
Elijah savve Elisha askem samting wea hem no fit for givim bat God nomoa savve givim. So Elijah hambol for ansa olsem: “Iu askim hardfala samting. Sapos iu lukim mi taem olketa tekem mi go from iu, bae iu kasem samting wea iu askem.” (2 Kings 2:10) And tru nao, Jehovah letem Elisha for lukim Elijah go ap long wanfala big wind. (2 Kings 2:11, 12) Elisha kasem samting wea hem askem. Jehovah givim hem strong wea hem needim for startim disfala niu waka wea hem kasem and for feisim olketa test wea bae kasem hem.
Distaem, olketa anointed Christian (wea samfala taem garem nem Elisha class) and olketa servant bilong God savve kasem bigfala encouragement from disfala story long Bible. Taem iumi kasem niu assignment, samfala taem iumi feel olsem hem hard tumas or iumi no garem savve for duim. Or maet iumi fraet for go ahed long waka for preachim Kingdom taem pipol long territory no interest or olketa againstim iumi. Nomata olsem, sapos iumi askem Jehovah for saportim iumi, bae hem givim iumi holy spirit taem iumi needim for deal witim olketa challenge and living wea change. (Luke 11:13; 2 Corinthians 4:7; Philippians 4:13) Tru nao, long sem wei wea Jehovah strongim Elisha for olketa bigfala responsibility bilong hem, bae hem helpem iumi evriwan, young and olo, for duim ministry bilong iumi.—2 Timothy 4:5.