Pornography​—Waswe, Hem Savve Spoelem Man?

Long world distaem pornography hem kamap big tumas.a Pipol savve lukim long olketa advertisement, movie, magasin, television, video game, mobile phone, Web site, and tu, staka music mekhae long datwan. Staka pipol distaem acceptim pornography. Distaem staka pipol lukluk long pornography winim enitaem bifor.—Lukim box “Samting for Savve Abaotem Pornography.”

Tingting bilong pipol abaotem pornography hem change distaem. Professor Gail Dines hem sei: “Olketa rabis video and piksa wea bifor pipol ting long hem olsem hem nogud tumas, distaem hem normal samting nomoa long pipol.”

Waswe, iu agree staka pipol lukluk long pornography and tingse hem normal samting nomoa? Waswe, pornography hem savve spoelem man or hem olraet nomoa? Jesus sei: “Evri gudfala tree bae garem gudfala frut, bat evri nogud tree bae garem rabis frut.” (Matthew 7:17) Olsem datfala scripture showimaot, iumi luksavve sapos samting hem gud or nogud taem iumi lukim samting wea kamaot from datwan. So taem man lukluk long pornography, hao nao datwan savve affectim hem and famili bilong hem? Bae iumi storyim samfala samting abaotem datwan.

Waswe, pornography savve spoelem man wanwan?

WANEM OLKETA SAVVEMAN TALEM: Pornography hem hard samting for man lusim. Samfala wea duim research abaotem diswan and olketa doctor sei wei for lukluk long pornography hem olsem man tekem strongfala drug.

Brianb wea evritaem lukluk long pornography long Internet hem sei: “Mi no savve kontrolem miseleva and mi no savve tingim eni nara samting. Body bilong mi savve seksek and hed bilong mi savve soa. Mi trae hard for stop, bat nomata staka year bihaen mi gohed yet for duim datwan.”

Staka taem pipol wea lukluk long pornography savve laea and haedem datwan. Olketa savve feel lonely, shame, wari, stress and kros. Samfala pipol laek for suisaed tu. Serge, wea bifor hem savve doanlodim pornography long mobile bilong hem klosap evri day, hem sei: “Mi tingim miseleva nomoa. Mi feel iusles, guilty, lonely, and mi no wei nao. Mi shame tumas and fraet for askem eniwan for helpem mi.”

Nomata man seknomoa lukim rabis piksa, datwan savve spoelem hem. Judith Reisman, wanfala doctor wea duim staka research abaotem pornography hem sei: “Taem man lukim olketa rabis piksa or video hem olsem piksa hia stap olowe long brain and hem hard for forgetim.” Susan, wea distaem hem 19 year, taem hem young pikinini hem lukim olketa rabis piksa long Internet. Hem sei: “Mi no savve forgetim olketa rabis piksa wea mi lukim and enitaem nomoa olketa piksa hia savve kamap long mind bilong mi. Hem olsem mi no savve aotem olketa piksa from mind bilong mi.”

TRU SAMTING ABAOTEM DISWAN: Pornography savve spoelem man wea lukluk long hem and hard for man lusim datwan.—2 Peter 2:19.

Waswe, pornography savve spoelem famili?

WANEM OLKETA SAVVEMAN TALEM: “Pornography savve spoelem olketa hasband and waef, and olketa pikinini tu.”—The Porn Trap, by Wendy and Larry Maltz.

Long wanem wei nao pornography spoelem olketa wea marit and famili bilong olketa?

• Hem spoelem trust, wei for fren, and love insaed marit.—Proverbs 2:12-17.

• Hem mekem man selfish, no tingim feeling bilong narawan, and no satisfae witim marit partner.—Ephesus 5:28, 29.

• Hem mekem man for garem rong tingting abaotem sex and laekem tumas for duim rabis samting olsem.—2 Peter 2:14.

• Hem mekem man for laek forcem partner for duim sex wea no followim Bible principle.—Ephesus 5:3, 4.

• Hem mekem man no faithful long marit partner.—Matthew 5:28.

Bible sei hasband and waef mas faithful long tufala. (Malachi 2:16) Wei for no faithful long marit partner savve spoelem marit and savve mekem hasband and waef for separate and divorce. Datwan savve spoelem olketa pikinini tu.

Sapos olketa rabis piksa stap long haos, datwan savve spoelem pikinini. Brian, wea iumi storyim finis, hem sei: “Taem mi samting olsem ten year, mi faendem magasin bilong dadi bilong mi wea garem olketa rabis piksa. Nomata mi savve olketa piksa hia nogud, mi gohed lukluk haed long olketa. Start long datfala taem mi gohed for duim datwan go kasem taem mi big.” Olketa wea duim research sei pornography savve spoelem tingting and feeling bilong olketa teenager. Hem savve mekem olketa tu for duim sex witim staka difren partner, for laek duim sex nomata olketa young tumas, and for raf witim.

TRU SAMTING ABAOTEM DISWAN: Pornography spoelem olketa famili and mekem olketa sorre and safa.—Proverbs 6:27.

Wanem nao Bible talem abaotem pornography?

BIBLE SEI: “So killim dae feeling bilong iufala for laek durong, for duim samting wea no klin, for ova tumas for laekem sex, for laekem tumas for duim nogud samting, and for greedy, wea datwan hem wei for worshipim idol.”—Colossae 3:5.

Jehovahc God hem heitim pornography. Diswan hem no bikos God tingim sex hem rong. Bat hem sei for duim sex hem for man and woman wea marit nomoa. Datwan savve mekem tufala hapi, fren gud tugeta, and for tufala garem pikinini.—James 1:17.

Why nao iumi savve sei Jehovah heitim pornography? Tingim olketa samting hia.

• Hem savve pornography savve spoelem laef bilong pipol.—Ephesus 4:17-19.

• Hem lovem iumi and hem laek for protectim iumi from nogud samting.—Isaiah 48:17, 18.

• Jehovah laekem hasband and waef and olketa pikinini for stap gud tugeta.—Matthew 19:4-6.

• Hem laekem iumi for garem gudfala konsens and for respectim narawan.—1 Thessalonica 4:3-6.

• Sex hem for olketa wea marit nomoa. Hem laekem iumi for respectim datwan and tufala wea marit mas followim olketa Bible principle saed long datwan.—Hebrew 13:4.

• Jehovah savve pornography hem mekem pipol selfish and garem tingting bilong Satan abaotem sex.—Genesis 6:2; Jude 6, 7.

TRU SAMTING ABAOTEM DISWAN: Pornography hem spoelem wei wea man hem fren witim God.—Rome 1:24.

Bat Jehovah laek for helpem olketa wea laek for lusim wei for lukluk long pornography. Bible sei: “Jehovah hem sorre long iumi and hem kaen, hem no savve kros kwiktaem and hem lovem iumi evritaem. Hem savve gud long iumi from hem nao wakem iumi, and hem savve iumi dust nomoa.” (Psalm 103:8, 14) Hem laekem olketa for no shame for kam bak long hem, ‘mekem hem showimaot mercy long olketa and kaen long olketa taem olketa needim help.’—Hebrew 4:16; lukim box “Lusim Wei for Lukluk Long Pornography.”

Staka pipol laekem God for helpem olketa. Bat waswe, God savve helpem olketa for lusim wei for lukluk long pornography? Bible storyim samfala wea lusim nogud samting wea olketa duim bifor. Hem sei: “God iusim spirit bilong hem for mekem iufala klin and mekem iufala holy, and long tingting bilong hem, iufala raeteous bikos long nem bilong Lord bilong iumi Jesus Christ.” (1 Corinth 6:11) Olketa savve talem sem toktok wea aposol Paul talem. Hem sei: “Nomata wanem samting hem kasem mi, paoa wea mi kasem from God nao hem strongim mi for gohed.”—Philippi 4:13.

Susan, wea lusim wei for lukluk long pornography, hem sei: “Jehovah nomoa savve helpem iu for winim datwan. Sapos iu askem hem for helpem iu, iu savve garem gudfala konsens moa. Iu savve trustim hem.”