HELP FOR FAMILI | LUKAFTAREM PIKININI
Protectim Pikinini blo Iu From Pornography
“Mifala savve dat hem barava nogud samting for lukim pornography, bat wat mifala no luksavve nao hem hao hem isi tumas for dota blo mifala for expose lo datwan.”—Nicole.
Lo disfala article
Wat iu shud savve
Olketa pikinini savve expose lo pornography taem olketa smol nomoa. Olketa wea duim research faendaot dat distaem average age wea pikinini maet lukim pornography for firstaem hem 11 years old.
Olketa pikinini savve expose lo pornography nomata olketa no go luk for hem. For example, maet olketa lukim samting wea connect lo pornography taem olketa duim research lo wanfala search engine or taem olketa lukluk lo social media. Olketa advertisement for pornography maet pop up taem olketa pleim online video game. Pornography hem available lo olketa difren format, most common wan nao hem olketa photo and olketa video. Bat, hem isi nomoa for faendem barava dirty information lo written form and lo olketa audio podcast, wea samwan savve streamim or daonlodim online.
Nara samting wea parents mas aware lo hem tu pipol savve sendem olketa pornographic message lo pikinini blo iu lo phone, thru lo olketa messaging apps. Lo wanfala research wea olketa askem 900 youths, klosap 90 percent lo olketa gele and 50 percent lo olketa boy sei olketa classmate blo olketa evritaem sendem olketa piksa and olketa video blo naked pipol.
Staka taem most popular pornography hem violent. Pornography wea hem most popular and isi for accessim hem violent staka taem, especially againstim olketa woman.
Pornography hem spoelem pikinini. Olketa wea duim research faendemaot dat staka pikinini wea expose lo pornography kasem olketa problem hia:
olketa no do gud lo skul
kasem anxiety, depression, and feel iusles
tingse dat hem normal samting for forcem narawan for duim sex
Main point blo diswan: Hem isi tumas for pornography spoelem olketa pikinini, and parents nao main wan wea savve protectim olketa pikinini.
Bible principle: “Olketa toktok hia wea mi komandim lo iufala tuday mas stap lo heart blo iufala, and iufala mas evritaem putim olketa toktok hia insaed heart blo olketa son blo iufala and storyim datwan lo olketa taem iufala sidaon lo haos and taem iufala wakabaot lo road, and taem iufala leidaon and taem iufala getap.”—Deuteronomy 6:6, 7.
Hao for protectim pikinini blo iu from pornography
Educatim iuseleva. Ting raonem wat taem and lo wea nao maet pikinini blo iu savve expose lo pornography. For example, hao, hem garem access lo Internet lo olketa brek taem lo skul, and no eni teacher stap for supervisem olketa?
Maet pikinini blo iu expose lo pornography from samfala difren source
Lanem olketa feature wea mobile blo hem garem wea iu savve onem for kontrolem information wea hem savve kasem, and savve gud which app hem iusim and olketa game hem pleim. For example, samfala messaging app hem garem “disappearing” message function wea man savve onem mekem eni dirty message, piksa, or video savve disappear bihaen lelebet taem. And distaem, staka online video games allowim olketa players for watchim pornography and even duim virtual sexual acts olsem part lo olketa online game hia.
“Mi experiencem diswan finis: If pikinini blo iu garem smartphone, parents shud savve hao for iusim, savve lo olketa setting blo phone hia mekem iu onem parental control, and monitorim wat pikinini blo iu duim lo device blo hem.”—David.
Bible principle: “Heart blo man wea garem wei for minim samting hem kasem knowledge.”—Proverbs 18:15.
Duim best for preventim pikinini blo iu for no expose lo eni pornography. Duim samting for daonem risk. For example: Adjustim olketa setting lo phone blo pikinini blo iu and lo evri device blo famili for blokem eni pornographic information. Activatim evri parental control blo evri device hia. And savve lo evri password wea pikinini blo iu iusim.
“Mi faendem hem gud for activatim parental control lo olketa device blo mifala, and restrictim olketa program wea son blo mifala savve accessim lo smart TV blo mifala, and mifala savve lo PIN blo smartphone blo hem.”—Maurizio.
“Mi no letem olketa boy blo mi klosim door lo rum blo olketa taem olketa watchim video. Taem olketa redi for sleep, mi no letem olketa for tekem device blo olketa go lo bedroom blo olketa.”—Gianluca.
Bible principle: “Wise man hem lukim danger and hem haed from datwan.”—Proverbs 22:3.
If happen pikinini expose lo pornography. Wanfala mami wea nem blo hem Flavia sei: “Samfala parents avoidim wei for story lo pikinini blo olketa abaotem pornography, and convincim olketa seleva dat pikinini bae never feisim problem hia.” Other parents maet wari and garem disfala tingting, ‘If mi storyim diswan, bae datwan just mekem pikinini blo mi go lukaotem.’ Kaen tingting olsem hem no stret. Parents wea wise bae educatim pikinini blo olketa abaotem olketa danger blo pornography bifor hem expose lo hem. Wat nao parents savve duim?
Teachim olketa smol pikinini lo wat for duim if happen olketa expose lo eni dirty piksa. For example, olketa savve satem eye blo olketa or offem device. And encouragem olketa for storyim lo iu abaotem wat olketa lukim or herem.a
“Mifala start for story abaotem olketa danger blo pornography taem son blo mi smol nomoa. Taem hem abaot 11 years old, olketa advertisement blo pornography start for pop ap lo wanfala game wea hem daonlodim lo smartphone blo hem. Olketa advertisement hia garem tu olketa chat message wea invaetem hem for sendem olketa piksa blo hemseleva. Bikos mifala storyim finis wat for duim, hem kam lo mi stretawe and talem mi wat nao happen.”—Maurizio.
Bible principle: “Trainim smol pikinini for wakabaot followim road wea hem shud followim. Nomata taem hem olo bae hem no lusim datwan.”—Proverbs 22:6, footnote.
Helpem olketa big pikinini for againstim temptation for lukim pornography, lisin lo hem, or read abaotem. For example, iu savve helpem pikinini blo iu for raetem wanfala contract wea hem bae listim olketa famili rul, and wea talem klia wat hem bae duim if hem expose lo pornography and why hem bae laek for duim datwan. Insaed datfala contract bae hem raetem tu wat hem bae kasem if hem chus for watchim pornography, olsem for no respectim seleva, for parents no trustim hem, and hem spoelem frenship blo hem witim God.b
“Taem olketa pikinini start for big, helpem olketa for againstim temptation for watchim pornography lo wei for tingim olketa long-term consequences.”—Lauretta.
“If pikinini blo iumi no only understandim olketa danger blo pornography bat hao Jehovah ting abaotem datwan, bae hem moa isi for olketa againstim datwan.”—David.
Bible principle: “Wisdom hem protectim man.”—Ecclesiastes 7:12.
Story tugeta evritaem. Maet iumi tingse diswan no tru, bat olketa pikinini laek for story witim parents blo olketa abaotem olketa sexual issue, includim pornography. Dame Rachel de Souza, Children’s Commissioner for England hem sei: “Mifala faendaot dat [olketa pikinini] laek for storyim disfala topic taem olketa smol, and storyim staka taem. Olketa pikinini laekem parents for storyim diswan fitim age blo olketa, and continue for storyim taem olketa growap.”
“Taem mi growap, parents blo mi nating storyim samfala topic witim mi. Mi wish mifala garem moa open and free communication. From distaem mi wanfala mami, mi traem best for storyim olketa tings saed lo sex witim olketa pikinini blo mi evritaem, and mifala no serious tumas taem mifala storyim.”—Flavia.
If pikinini blo iu hem expose lo pornography
No panic. If iu faendaot dat pikinini blo iu hem watchim pornography, lisin lo hem, or read abaotem, traem best for kontrolem reaction blo iu. Maet hem already feel nogud, hem shock, or feel guilty lo samting wea happen. If iu kros, bae datwan mekem situation hem worse and maet mekem hem bae no kam storyim lo iu lo future.
Bible principle: “Man wea garem knowledge hem chusim gud olketa toktok blo hem, and man wea garem wei for luksavve bae stap kwaet nomoa.”—Proverbs 17:27.
Faendaot wat nao really happen. Instead for iu concludem wat nao happen, askem olketa kwestin wea bae helpem iu for luksavve hao pikinini hem expose lo pornography. For example, hao, samwan nao sendem datfala piksa lo hem, or hem go faendem seleva? Hao, diswan happen wantaem nomoa, or hem bin watchim pornography bifor? Hao, iufala onem olketa setting for blokem kaen samting olsem and parental control lo device wea hem iusim? If iufala duim datwan, hao, pikinini faendem nara wei mekem hem savve watchim pornography? Remember, goal blo iu hem for helpem pikinini for storyim olketa tings hia lo iu, no for kotem hem.
Bible principle: “Tingting wea stap insaed heart blo man hem olsem wata wea barava stap deep, bat man wea garem wei for luksavve hem savve pullim olketa kamap.”—Proverbs 20:5.
Tek akson. For example, if bae accident nomoa hem expose lo pornography, maet iu need for adjustim olketa setting lo parental controls and filters lo device blo hem.
If iu faendaot dat hem go search for pornography, givim hem discipline wea iu tok stret, bat duim lo loving wei. Strongim feeling blo pikinini blo iu for rejectim pornography taem iu story witim hem lo olketa scriptures olsem Job 31:1, Psalm 97:10, and Psalm 101:3.c And talem hem dat evri week bae iu chekap witim hem for lukim hao nao progress blo hem and if iu savve helpem hem lo eni nara samting.
Bible principle: “Mas no mekem olketa pikinini bilong iufala for kros, bat lukaftarem olketa gud long wei for stretem and trainim olketa followim samting wea Jehovah talem.”—Ephesus 6:4.
a For samfala moa idea lo hao for story abaotem sex lo pikinini blo iu fitim age blo hem, lukim article “Hao Nao Parents Savve Teachim Pikinini Bilong Olketa Abaotem Sex?”
b For samfala moa idea lo wat for includim lo contract iu mekem witim pikinini blo iu, lukim worksheet “How to Reject Pornography.”
c Maet hem gud for iutufala storyim tugeta article “Why Reject Pornography?”