Hao If Mi Addict lo Pornography?
Wat iu savve duim
Luksavve tru samting abaotem pornography. Tru samting abaotem pornography nao, hem degradim samting wea God creatim wea iumi shud respectim. If iu understandim datwan, bae hem helpem iu for “heitim nogud samting.”—Psalm 97:10.
Tingim consequences. Pornography hem degradim olketa wea actim datwan. And hem degradim tu eniwan wea watchim. Dastawe Bible sei: “Wise man hem lukim danger and hem haed from datwan.”—Proverbs 22:3.
Mekem vow. Faithful man Job hem sei: “Mi mekem wanfala vow for no lukluk lo wanfala gele witim rong tingting.” (Job 31:1, Today’s English Version) Lo daon hem samfala vow wea iu savve mekem:
Bae mi no iusim Internet taem mi stap seleva.
Bae mi kwiktaem klosim eni pop-up or site wea showim rabis piksa.
If mi foldaon moa lo pornography bae mi story witim wanfala mature fren.
Pornography hem garem barava strong effect—if iu gohed for watchim, bae hem hard for iu stop from datfala habit
Prea abaotem. Man wea raetem psalm begim Jehovah God olsem: “Tanem eye blo mi for no lukim iusles samting.” (Psalm 119:37) God laekem iu for succeed, and if iu prea lo hem, hem savve givim iu strong for duim stret samting!—Philippians 4:13.
Story lo samwan. Important step wea savve helpem iu for stop for duim datfala habit, hem for iu story witim samwan wea iu trustim.—Proverbs 17:17.
Rememberim diswan: Each taem wea iu avoidim pornography, iu winim wanfala important faet. Storyim datwan lo Jehovah God, and talem thankiu for strong wea hem givim for helpem iu. Taem iu avoidim pornography, iu mekem heart blo hem for hapi!—Proverbs 27:11.